Rüşvət əməliyyatı video lentə alındı

Tez-tez redaksiyamıza müxtəlif məzmunlu şikayət məktubları daxil olur. Bu məktublarda bölgələrdə yerli məmurların vətəndaşların haqqını tapdamasından, onları get-gələ salmasından başlamış rüşvətxorluq, korrupsiyaya qədər müxtəlif məsələlədən bəhs olunur. Təəssüf ki, Azərbaycanda diplom, lisenziyalar kimi sürücülük vəsiqələri də pulla satılır. Redaksiyamıza daxil olan növbəti şikayət məktubu da bu barədədir. O, da təəssüf doğurur ki, hətta hüquq-mühafizə orqanları sistemində, bu orqanlara bağlı qurumlarda da ciddi qanunsuzluqlar baş verir. Necə deyərlər, qanunçuluğu pozmağa cavabdeh olanlar özləri qanunları kobud şəkildə pozurlar. Məsələnin digər tərəfi də var. Belə ki, bu gün paytaxt və bölgələrdə tez-tez yol qəzalarının baş verdiyi heç kimə sirr deyil. Bunun bir səbəbi də sürücülük vəsiqələrinin bir çox hallarda pulla satılmasıdır. Müvafiq peşə məktəblərində oxumayan, pul hesabına sürücülük vəsiqələri alanlar avtomobil idarə etməyi lazımınca bacarmır və yollarda ağır qəzalar törədirlər ki, bu da neçə-neçə insanın həyatını itirməsi və ya ömürük şikəst olması kimi faciələrə səbəb olur.



Beləliklə, Göyçay rayonu, Bığır kənd sakini Mayılov Çingiz Sabir oğlu redaksiyamıza ünvanladığı məktubunda bildirir ki, 7 saylı Yevlax Qeydiyyat-İmtahan şöbəsinin rəisi Elxan Əliyev, onun müavini Mədət Cəfərov, eləc ədə şöbənin əməkdaşları Yelmar Həsənov, Rafael və Elmir onun qohumundan sürücülük vəsiqəsi üçün 850 manat pul alıblar. Şikayətçi yazır ki, o, həmin cinayət hadisəsini bütünlüklə video lentə alıb: “Məqsədim vəzifə səlahiyyətlərindən sui-istifadə edib cinayət əmələri ilə məşğul olan 7 saylı Yevlax Qeydiyyat-İmtahan şöbəsinin rəisi başda olmaqla bütün rüşvətxor əməkdaşlarını ifşa etməkdir. Həmin videoçəkilişi Prezident İlham Əliyevə və bütün aidiyyatı orqanlara göndərəcəyəm”.



Şikayətçi bildiri ki, yaxın qohumuna sürücülük vəsiqəsi almaq üçün 7 saylı Yevlax Qeydiyyat-İmtahan şöbəsinin rəisi Elxan Əliyevin qəbulunda olub : “Elxan Əliyev mənə “bu işləri müavinim Mədət Cəfərova həvalə etmişəm, sən onu gör, danış” dedi. Bundan sonra Mədət Cəfərov təkidlə mənə dedi ki, sənə hörmət edirlər, 850 manat verərsən.Çox xahiş-minnətdən sonra 850 manat rüşvəti Rafael adlı polis əməkdaşına sayıb-verib bütün bu korrupsiya cinayətini videoya çəkdim”.



Şikayətçi daha sonar qeyd edir ki, 7 saylı Yevlax Qeydiyyat-İmtahan şöbəsində bacısı oğlu Əliyev Samir Əlimövsüm oğlunun avtomobilini qeydiyyata aldırmaq üçün polis kapitanı Yelmar Həsənov ondan 130 manat rüşvət alıb və bu da video lentə alınıb: “Həmin video çəklişdə görünən odur ki, polis kapitanı Yelmar Həsənov bacım oğlu Samir Əliyevdən avtomobilini qeydiyyata aldırmaq üçün ilkin olaraq 350 manat rüşvət istəyir, çox xahiş-minnətdən sonra 130 manat alaraq avtomobili qeydiyyata alırlar. Həttda pulun az verilməsinə görə Yelmar Həsənovun açıq- aşkar bacım oğlunu təhqir etməsi də video lentə alınıb”.
Şikayətçi bildiri ki, bu korrupsiya cinayətini subut edən videogörüntülər əsas verir ki, 7 saylı Qeydiyyat-İmtahan şöbəsinin başda rəis Elxan Əliyev olmaqla adları keçən bütün əməkdaşları barələrində cinayət işi başlanılmalıdır: “Həmin video çəklişlərdən çıxarılmış fotoları sizə göndərirəm.Xahiş edirəm cinayət yuvası olan 7 saylı Yevlax Qeydiyyat-İmtahan şöbəsinin başda rəisi olmaqla bütün korrupsioner əməkdaşları barədə qanunu tədbirlər görülməsinə yardımçı olasınız.
Bildirirəm ki, Yevlax 7 saylı Qeydiyyat-İmtahan şöbəsi Mingəçevir, Ağdaş, Bərdə, Tərtər, Ucar, Göyçay və Kəlbəcər rayonlarının sakinlərinə xidmət göstərir”.



Göründüyü kimi, Göyçay rayonu, Bığır kənd sakini Mayılov Çingiz Sabir oğlu baş verənləri lentə aldığı bildirir. O, bunu sübut etməyə hazır olduğunu da vurğulayır. Şikayətçi konkret adlar çəkir və ondan kimin nə qədər rüşvət aldığını da qeyd edir.



Ümid edirik ki, aidiyyatı qurumlar şikayətçinin bu müraciətinə biganə qalmayacaqlar. Müvafiq qurumlar tərəfindən məsələ araşdırılacaq və günahkar şəxslər cəzalandırılacaqlar.

Cəfər