Məhkəmənin qərarı ilə fəaliyyəti dayandırılmış ANS Müstəqil Yayım və Media Şirkətinin rəhbəri Vahid Mustafayev yeni agentlik yaratmaq istəyir.

gundemxeber.az xəbər verir ki, bu barədə Missiya.az saytı məlumat yayıb. Məlumata görə, şirkət rəhbəri ötən gün Ali Məhkəmədə hakim Sevda Hüseynovanın sədrliyi ilə keçirilən prosesdən sonra qərar verib.

Məlumata görə, V.Mustafayev agentlik yaradaraq şirkətdə çalışmış işçilərini işə götürəcək. O, sabiq əməkdaşlarının iştirakı ilə, bu gün keçirilmiş toplantıda da öz yeni ideyası barədə məlumat verib.

Qeyd edək ki, Milli Televiziya və Radio Şurası (MTRŞ) Türkiyə ilə Azərbaycan arasında strateji tərəfdaşlıq münasibətlərinin pozulmasına yönəlmiş təxribatın qarşısını almaq, açıq şəkildə terrorizmin təbliğatına yol verməmək məqsədilə, Azərbaycan Respublikası Baş Prokurorluğunun 18 iyul 2016-cı il tarixli müraciətini, “Televiziya və radio yayımı haqqında” Azərbaycan Respublikası Qanununun 11, 23, 32-ci maddələrinin tələblərini rəhbər tutaraq “ANS Müstəqil Yayım və Media” Şirkətinin yayımının 18 iyul 2016-cı il tarixdən saat 18:30-dan etibarən 1 ay müddətinə dayandırılması barədə qərar qəbul edib. Eyni zamanda, MTRŞ 25 oktyabr 2013-cü il tarixli TR 099 saylı xüsusi razılığın (lisenziyanın) qüvvəsinə xitam verilməsi barədə məhkəmədə iddia qaldırıb. Bakı Apellyasiya Məhkəməsində isə ANS-in lisenziyasına xitam verilməsi ilə bağlı qərar qəbul olunub.