Dələduz qadına 3 il 6 ay cəza verildi, hökmdən narazı qalan qadın şikayət etdi

Dələduzluqda ittiham olunan Astara rayoн Şiyəkəran kəndində anadan olmuş 1972-ci il təvəllüdlü Fəxriyyə Hüseynovanın cinayət işi üzrə məhkəmə prosesi başa çatıb.

İttihama görə, Fəxriyyə Hüseynova özgə əmlakını ələ keçirmək qərarına gələrək 1 oktyabr 2015-ci il tarixdə, saat 10.00-da Qazax şəhər H.Əliyev prospektində yerləşən qızıl satışı mağazasına gəlib. O, yaxın vaxtlarda toy edəcəyini, bu məqsədlə aldığı qızıl zinət əşyalarını evə apararaq ərinə göstərdikdən sonra pulunu gətirəcəyini mağaza sahibi Oktay Kazımova bildirib.

Fəxriyyə Hüseynova Oktay Kazımovu inandıraraq etibarını qazanıb və bir ədəd 13,6 qram çəkidə 550 manat dəyərində qızıl sırqa-üzük, bir ədəd 15 qram çəkidə 550 manat dəyərində briliyant qaşlı klonu ilə birlikdə qızıl boyunbağı, bir ədəd 3 qram çəkidə 150 manat dəyərində qızıl kişi üzüyü, bir ədəd 10 qram çəkidə 500 manat dəyərində qızıl boyunbağını götürüb.

Oktay Kazımov sonradan edilən müraciətlərə baxmayaraq Fəxriyyə Hüseynova aldığı qızılların pulunun verilməsindən imtina edib və aldatma yolu ilə Oktay Kazımovun 1750 manat dəyərində əmlakını ələ keçirib.

Bundan başqa Fəxriyyə Hüseynova həmin ilin oktyabrın 1-də saat 11.00-da Qazax şəhər H.Əliyev prospektində yerləşən qızıl satışı mağazasına gələrək yaxın vaxtlarda toy edəcəyini, bu məqsədlə

aldığı qızıl zinət əşyalarını evə apararaq ərinə göstərdikdən sonra pulunu gətirəcəyini mağazada satıcı işləyən Minayə Məmmədovaya bildirib. O, Minayə Məmmədovanın inandıraraq etibarını qazanıb.

Fəxriyyə Hüseynova mağazanın satıcısından bir ədəd 45 qram çəkidə 1450 manat dəyərində qızıl boyunbağı və bir ədəd 10 qram çəkidə 550 manat dəyərində qızıl qolbağını götürərək gedib. O, satıcının müraciətlərinə baxmayaraq apardığı qızılları geri qaytarmayıb. Bu yolla Minayə Məmmədovaya 2000 manat dəyərində ziyan vurub.

6 oktyabr 2015-ci il tarixdə, saat 09.00 radələrində Fəxriyyə Hüseynova qeyri-rəsmi nikah münasibətində olduğu Qazax rayon Canallı kəndində yaşayan Nazim Hüseynovun evində yaşadığı müddətdə ona qarşı da dələduzluq edib. O, Nazim Hüseynovun mülkiyyətində olan bir ədəd 10 qram çəkidə, 200 manat dəyərində qızıl üzük, bir ədəd 10 qram çəkidə, 200 manat dəyərində qızıl üzük, bir ədəd 10 qram çəkidə, 200 manat dəyərində qızıl üzük, bir ədəd 200 manat dəyərində “Kreker” markalı avtomobil yuyan aparat və bir ədəd 100 manat dəyərində “Soni” markalı fotoaparatı götürüb. O

Bununla da Fəxriyyə Hüseynova qeyri-rəsmi yaşadığı Nazim Hüseynovun 900 manat dəyərində əmlakını ələ keçirib. Fəxriyyə Hüseynova zərərçəkmişlərin şikayətindən sonra həbs edilib.

Fəxriyyə Hüseynova Cinayət Məcəlləsinin 177.2.2-ci (təkrar oğurluq törətmək), 178.2.2-ci (təkrar dələduzluq törətmək) və

178.2.4-cü (xeyli miqdarda ziyan vurmaqla dələduzluq törətmək) maddələri ilə ittiham edilib.

Qazax rayon Məhkəməsinin hökmü ilə Fəxriyyə Hüseynova 3 il 6 ay müddətinə azadlıqdan məhrum edilib. Hökmdən narazı qalan Fəxriyyə Hüseynova apelyasiya şikayəti verib. Onun şikayəti araşdırılması üçün Gəncə Apelyasiya Məhkəməsinə göndərilib. Şikayət hakim Elşad Bayramovun sədrlik etdiyi prosesdə araşdırılıb.

Fəxriyyə Hüseynova apelyasiya şikayətində göstərib ki, heç kəsi aldatmaq fikri olmayıb, heç kimə qarşı dələduzluq etmyib: “Qızılları götürməkdə məqsədim həqiqətən oğluma toy etmək olub. Lakin sonradan oğlumun xəstəliyinə görə əldə etdiyim pulları onun müalicəsinə xərcləmişəm. Zərərçəkmişlərdən Oktay Kazımov və Nazim Hüseynov mənə qarşı şikayətçi deyillər. Məhkəmə işin bu hallarını nəzərə almayıb. Hazırda oğluma baxan yoxdur. Barəmdə Cinayət Məcəlləsinin 70-ci maddəsinin tətbiq edilməsini istəyirəm. Baş verənlərdən peşmanam, həbsdən azad olunaramsa zərərçəkənlərlə razılıq əldə edəcəm. Onlara dəymiş ziyanı ödəyəcəm. Vəziyyətimin yüngülləşdirilməsini, barəmdə şərti cəza təyin edilməsini xahiş edirəm”.

Dövlət ittihamçısı Qalib Rizvanov müdafiə tərəfinin apelyasiya şikayəti ilə razılaşmayıb. O, qeyd edib ki, Fəxriyyə Hüseynovanın apelyasiya şikayətinin təmin edilməsi üçün əsaslar yoxdur.

Həmçinin prokuror əlavə olaraq qeyd edib ki, 1 iyun 2016-ci il tarixdə qüvvəyə minmiş “Azərbaycan Respublikasının Cinayət Məcəlləsinə dəyişikliklər edilməsi haqqında” Azərbaycan

Respublikası 20 may 2016-cı il tarixli qanununa görə Cinayət Məcəlləsinin 177-ci maddəsinin “qeyd” hissəsinin 1-ci bəndində “177.1-ci maddəsində” sözləri “177.1, 178.1 və 179.1-ci maddələrində” sözləri ilə, “otuz manatdan min manatadək” sözləri “yüz manatdan yuxarı, lakin üç min manatdan artıq olmayan məbləğdə” sözləri ilə əvəz edilib.

Prokurorun bildirdiyinə görə, “qeyd” hissəsinin 2-ci bəndində “min manatdan yeddi min manatadək olan məbləğ, “külli miqdar” dedikdə isə yeddi” sözləri “üç min manatdan yuxarı, lakin on min manatdan artıq olmayan məbləğ, “küllü miqdar” dedikdə on” sözləri ilə əvəz edilib: “Yəni Cinayət Məcəlləsində olan göstərilən dəyişiklik nəzərə alınsa Fəxriyyə Hüseynovanın əməlində 178.2.4-cü maddəsi ilə nəzərdə tutulan cinayət tərkibi yoxdur. Həmin Qanunun 2.4-cü maddəsinə əsasən cinayət hesab olunmayan əməllərə dair məhkəmələrin, ibtidai istintaq və ya təhqiqat orqanlarının icraatında olan cinayət işləri və materiallara əməlin cinayət olmasını və cəzalanmalı olmasını aradan qaldıran yeni qanunun qüvvəyə minməsi ilə əlaqədar cinayət məsuliyyətindən azad edilmə əsasları ilə xitam verilir və ya cinayət təqibinin başlanması rədd edilir, bu əməllərin inzibati məsuliyyətə səbəb olması məsələsi araşdırılır. Cinayət Məcəlləsinin 10.3-cü maddəsinə görə əməlin cinayət sayılmasını və bu əmələ görə cəzanı aradan qaldıran, cəzanı yüngülləşdirən, yaxud cinayət etmiş şəxsin vəziyyətini başqa cür yaxşılaşdıran cinayət qanununun geriyə qüvvəsi vardır. Yəni həmin qanunun qüvvəyə minməsindən əvvəl müvafiq əməli törətmiş şəxslərə, habelə cəza çəkən, yaxud cəzasını çəkmiş, lakin məhkumluğu üstündən götürülməmiş və ya ödənilməmiş şəxslərə şamil edilir. Cinayət-Prosessual Məcəlləsinin

41.3-cü maddəsinə əsasən dövlət ittihamçısı məhkəmədə cinayət təqibini istisna edən halları aşkar edərsə, təqsirləndirilən şəxs barəsində cinayət təqibindən imtina edilməsini bildirməlidir. Ona görə də məhkum Fəxriyyə Hüseynovaya münasibətdə qanunda edilmiş dəyişikliklər Cinayət Məcəlləsinin 10.3-cü maddəsinin təsiri altına düşür. Ona Cinayət Məcəlləsinin 178.2.4-cü maddəsi ilə verilmiş ittihamdan imtina edir”.

Dövlət ittihamçısı qeyd edib ki, Fəxriyyə Hüseynovanın ona qarşı irəli sürülən digər ittihamlarla nəzərdə tutulan əməlləri törətməsi isə sübut olunub: “Onun təqsirli olması özünün ifadələri ilə yanaşı, həmçinin istintaq orqanının topladığı çoxsaylı sübutların məcmusu ilə tamamilə təsdiqini tapıb. Təyin edilən cəza işin hallarına, əməlin ictimai təhlükəliliyinə, məhkumun şəxsiyyətinə tam uyğundur”.

Tərəfləri dinləyən hakim heyəti sonda qərar elan edib. Qərara görə, Fəxriyyə Hüseynovanın apelyasiya şikayəti təmin edilməyib. Amma ona təyin edilmiş hökm dəyişdirilib.

Yeni hökmə əsasən, Fəxriyyə Hüseynovanın barəsində olan Cinayət Məcəlləsinin 178.2.4-cü maddəsi ilə olan hissəsindən dövlət ittihamçısının imtina etməsi qəbul edilib və həmin maddə üzrə irəli sürülmüş ittiham üzrə cinayət təqibinə xitam verilib.