Ləğv edilmiş MTN-nin tutduğu vərəm xəstəsi günahsız olduğunu bildirdi
Narkotik vasitələrin qaunsuz dövriyyəsində təqsirli bilinən Lənkəran sakinləri - Ağasadıx Ağayev, Tünzalə Qasımzadə və Sara Mardanovanın cinayət işi üzrə məhkəmə prosesi başa çatıb.
İttihama görə, ki, Ağasadıx Ağayev şəxsiyyətləri müəyyən
edilməyən İran İslam Respublikası vətəndaşları ilə cinayət əlaqəsinə girib. O, İrandan Azərbaycan ərazisinə
qaçaqmalçılıq yolu ilə keçiriləcək külli miqdarda narkotik vasitəni əldə edib və satmaq barədə
sövdələşib, qabaqcadan əlbir olduğu həmin şəxslər və eləcə də bu məqsədlə əlbir olduqları Tünzalə Qasımzadə və Sara Mardanovdan ibarət qrup yaradıb.
Belə ki, Ağasadıx Ağayev 11 iyun 2015-ci il tarixdə İran İslam
Respublikasının Astara şəhərində şəxsiyyətləri müəyyən edilməyən İran vətəndaşları ilə narkotik
vasitələrin qanunsuz satışından qazanc əldə etmək barədə sövdələşib qabaqcadan əlbir olan bir qrup təşkil edib. O, axırıncılar tərəfindən Azərbaycana qaçaqmalçılıq yolu ilə
göndərəcəkləri külli miqdarda narkotik vasitələri ölkəmizin ərazisində qəbul edib və digər bir şəxsə satmaq üçün təhvil verilməsi barədə sövdələşib.
Aralarındakı razılaşmaya
əsasən qrupun İrandakı üzvləri müəyyən pul müqabilində narkotik vasitəni Azərbaycan
Respublikasına üzərində daşıyaraq gətirə biləcək şəxsi təşkil etmək üçün tanışları Sara Mardanovaya müraciət edib və onunla da qabaqcadan əlbir olublar. Sara Mardanova öz
növbəsində tanışı Tünzalə Qasımzadəni 1000 manat pul müqabilində İrana gedib və orada şəxsiyyətləri müəyyən edilməyən qrupun üzvlərindən külli miqdarda narkotik vasitəni
götürüb, üzərində daşıyıb, gizli olaraq Azərbaycan Respublikasına gətirməyə sövq edib.
Habelə axırıncı ilə bunun müqabilində ona ödəniləcək 1000 manat puldan ona 200 manat verməsini razılaşdırıb və bu barədə qrupun üzvlərinə məlumat verib.
Bundan sonra Tünzalə
Qasımzadə Sara Mardanovanın təhriki ilə qrupun İrandakı üzvləri ilə telefon əlaqəsi saxlayıb və narkotik vasitələrin qaçaqmalçılığını etməyə razılaşıb və aralarında müəyyən etdikləri rollara əsasən o, 12 iyun 2015-ci il tarixdə Azərbaycan Respublikası gömrük sərhədindən keçməklə İİR-
nın Astara şəhərinə gəlib və orada qrupun üzvlərinin ona verdiyi külli miqdarda, 300,43 qram olan narkotik vasitə heroini satış məqsədi ilə qanunsuz olaraq onlardan əldə edib. O, narkotik vasitəni 3 bükümə qablaşdırmaqla cinsiyyət orqanına yerləşdirərək gizlədib.
Tünzalə Qasımzadə 13 iyun 2015-ci il tarixdə, saat 12:48-də Dövlət Gömrük Komitəsinin Astara Gömrük İdarəsinə gətirib və Azərbaycan Respublikasının gömrük sərhədindən gömrük nəzarətindən gizli keçirməklə qabaqcadan əlbir olan bir qrup şəxslə qaçaqmalçılıq edib və narkotik vasitəni ondan qəbul etməli olan Ağasadıx Ağayevə bu barədə məlumat verib. Onlar Lənkəran şəhəri ərazisində görüşməyi razılaşdıraraq bunun
üçün həmin narkotik vasitəni satış məqsədi ilə qanunsuz olaraq sərnişini olduğu “Mersedes-Benz” markalı 90-SM-839 dövlət qeydiyyat nişanlı taksi avtomobilində üzərində saxlayıb və Lənkəran şəhərinin “Samovar” dairəsi adlanan ərazisinə gətirib.
Tünzalə Qasımzadə qabaqcadan əlbir olduğu Ağasadıx Ağayevə narkotik vasitəni 900 manat pul müqabilində təhvil vermiklə satıb. Ağasadıx Ağayev isə ondan götürdüyü, yəni satış məqsədi ilə qanunsuz olaraq aldığı külli miqdarda narkotik vasitəni idarə etdiyi “VAZ 2107” markalı, 90-HD-515 dövlət qeydiyyat nişanlı avtomobilində yaşadığı Lənkəran rayonu, Göyşaban kəndindəki evinə gətirib. O, narkotik vasitəni bir plastik qaba yerləşdirməklə, evin zirzəmisində quma basdırıb.
Həmin gün ləğv edilmiş Milli Təhlükəsizlik Nazirliyinin əməkdaşları tərəfindən keçirilmiş əməliyyat-axtarış tədbirləri ilə
bağlı Ağasadıx Ağayevin yaşadığı evə baxış keçirilib və qeyd olunan 300,43 qram narkotik vasitə hesab edilən heroin həmin yerdən aşkar edilərək götürülüb, Tünzalə Qasımzadə isə Salyan rayonu ərazisində yaxalanıb. Sonra isə Sara Mardanova həbs edilib.
Təqsirləndirilən şəxslər Cinayət Məcəlləsinin 206.3.1-ci, 206.3.2-ci, (qabaqcadan əlbir olan bir qrup şəxs tərəfindən narkotik vasitələrin təkrar qaçaqmalçılığı), 234.4.1-ci, 234.4.2-ci və 234.4.3-cü (qabaqcadan əlbir olan bir qrup şəxs tərəfindən külli miqdarda narkotik vasitələri əldə etmə, daşıma, saxlama və ya satma, təkrar törətmə), 32.4-cü (iştirakçılıq) maddələri ilə ittiham ediliblər.
Lənkəran Ağır Cinayətlər Məhkəməsinin hökmü ilə Ağasadıx Ağayev 8 il, Tünzalə Qasımzadə 8 il 6 ay, Sara Mardanova isə 9 il müddətinə azadlıqdan məhrum ediliblər.
Bir neçə ay əvvəl Tünzalə Qasımzadə və Sara Mardanova tərəfindən ayrı-ayrılıqda verilmiş apelyasiya şikayətlərinə və dövlət ittihamçısı Tofiq Mirzəyev tərəfindən verilmiş apelyasiya protestinə Şirvan Apelyasiya Məhkəməsində baxılıb. Həmin vaxt hakim kollegiyası hər iki qadının şərti cəza alması barədə şikayətləri təmin edilməyib.
Amma prokurorun protesti qismən təmin edilib. Hökmdən
Tünzalə Qasımzadədən götürülmüş və Dövlət Təhlükəsizliyi Xidmətinin Maliyyə İdarəsinə təhvil verilmiş olan 900 manat məbləğində pulun onun sahibi olan Ağasadıx Ağayevin ailə üzvlərinə qaytarılmasına dair müddəalar xaric edilib. Həmin pul məbləğinin məcburi qaydada və əvəzsiz olaraq dövlət nəfinə xüsusi müsadirə olunub. Apelyasiya protesti cəzanın ağırlaşdırılması hissəsində təmin edilməyib.
Ağasadıx Ağayevin apelyasiya şikayətinə isə ayrıca icraatda baxılıb. Şirvan Apelyasiya Məhkəməsində, hakim Etibar Camalovun sədrliyi ilə keçirilən prosesdə Ağasadıx Ağayevin apelyasiya şikayətinin dəlilləri araşdırılıb.
Ağasadıx Ağayev bildirib ki, Lənkəran Ağır Cinayətlər Məhkəməsinin hökmü ona münasibətdə doğru olmayıb. O, barəsində aşağı həddə cəza təyin edlməsini və 900 manat pulun onun ailəsinə qaytarılmasını xahiş edib.
Apelyasiya şikayəti onunla əsaslandırılmışdır ki, o, ailəli olmaqla 4 övladı və 6 nəvəsi
var: "22 ildir ki, ağır vərəm xəstəsiyəm və 2-ci qrup əliləm. İbtidai istintaq və birinci instansiya məhkəməsində öz cinayətimi etiraf etmişəm və törətdiyim cinayətə görə səmimi peşiman olduğumu bildirmişəm. Cinayət Məcəlləsinin 206.3.2-ci maddəsi ilə özümü təqsirli bilmirəm. Ona görə ki, narkotiki
könüllü təhvil vermişəm və narkotiki Lənkəran şəhəri Samovar deyilən dairədə dostum Fərhadın dediyi Qasımzadə Tünzalə Hüseyn qızından təhvil almışam, ona doqquz yüz manat vermişəm. Sərhəd pozuntusuna yol verməmişəm, 11 iyun 2015-ci ildə İran İslam Respublikasının Astara şəhərinə vərəm xəstəliyimi müalicə etdirmək üçün getmişəm".
Təqsirləndirilən şəxs və onun vəkili verilmiş olan apelyasiya şikayətinin təmin edilməsini istəyiblər. Sonra çıxəş edən prokuror apelyasiya şikayətinin dəlillərinin əsassız olduğunu bildirib. O, apelyasiya şikayətinin təmin edilməməsini istəyib.
Apelyasiya şikayətinin dəlillərini araşdıran hakim heyəti sonda qərar elan edib. Qərara görə, apelyasiya şikayəti qismən təmin edilib və Lənkəran Ağır Cinayətlər Məhkəməsinin hökmü dəyişdirilib.
Yeni hökmə əsasən, Ağasadıx Ağayevin cəzası 6 il 6 aya endirilib. Hökm qalan hissədə dəyişdirilməyib.

Aslan
gundemxeber.az