“Qaçqınkom”un Sumqayıt fililalı şəhid ailəsini məskunlaşdığı yerdən çıxarmaq üçün sahibkarın xeyrinə sənəd saxtalaşdırıb
Sumqayıt şəhəri, 18-ci məhəllədəki "Məktəbli bazası"nda məskunlaşmış, Qubadlı rayonundan məcburi köçkün olan, şəhid anası Adilə Məhəmmədəli qızı Paşayeva ona qarşı olan haqsızlıqdan şəkayətçidir. Oğlu Səbahəddin Bayramovu Vətən yolunda fəda edən ağbirçək ana 1997-ci ildən Sumqayıt şəhərinə gəlib. Həyat yoldaşı Fazil Dadaş oğlu Bayramov və Qəmsiyyə Ağamalı qızı Əhmədova ilə birlikdə 18-ci məhəllədəki "Məktəbli bazası"nda məskunlaşıb. Elə o vaxtdan adıçəkilən ərazidə yaşayan Adilə Paşayeva və ailəsi burada özlərinə birtəhər şərait qurublar. Ancaq bəzi şəxslər onları burda da rahat yaşamağa qoymayıblar.
Şəhid anası bildirir ki, "Cırtdan" kafesinin sahibi Fikrət Salahov adlı şəxs onları yaşadığı evdən çıxarmaq istəyir. "Sahibkar bu məqsədlə 2012-ci il dekabrın 15-də məhkəməyə müraciət edib. Bu ilin yanvarın 15-də isə bu barədə məhkəmə qərarı almağa nail olub. Hara müraciət etmişiksə, xeyri olmayıb. Qaçqın və Məcburi Köçkünlərləİş üzrə Dövlət Komitəsinin Sumqayıt şəhər şöbəsindən bu barədə arayış alıblar. Bu arayışı hansı yolla əldə etdiyini bilmirəm. Yalnız onu bilirəm ki, gedəcək bir yerim yoxdur. Məhkəmə icraçıları bizi bazadan çıxarandan sonra nə edəcəyimi, yenidən evsiz-eşiksiz qalacağımı, bu dəfə kimə sığınacağımı düşünürəm". Biz gözləyirdik ki, məqalə dərc olunandan sonra aidiyyəti qurumlar problemlə üzləşən şəhid ailəsinə yardımçı olub onları düşdüyü vəziyyətdən çıxaracaqlar. Təəssüf ki, gözləntilərimiz özünü doğrultmadı. Dünən redaksiyamızla yenidən əlaqə saxlayan şəhid anası bildirdi ki, yazı qəzetdə çıxandan sonra müvafiq dövlət strukturlarından heç kim gəlib onların problemi ilə maraqlanmayıb: " Mənim oğlum Azərbayan uğrunda canından keçib. Mən o cür mərd oğul böyüdüb Vətən yolunda şəhid verdim. İndi həmin oğulun ailəsini yaşadığı evdən çölə atmaq istəyirlər. Bu nə deməkdir? Şəhidə qoyulan hörmət budur? Ölkə başçısı bütün məmurlara göstəriş verir ki, şəhid ailələrinə qarşı diqqətli olun, onların problemlərini həll edin. Bəzi məmurlar isə buna məhəl qoymayaraq mənim kimi şəhid analarını əzməyə çalışırlar.”
Şikayətçi onu da söylədi ki, kafenin sahibi Qaçqın və Məcburi Köçkünlərlə İş üzrə Dövlət Komitəsindən saxta arayış əldə edib: "Sahibkar bizim burda guya 2009-cu ildən yaşamağımız haqda "Qaçqınkomu"un Sumqayıt şöbəsindən arayış əldə edib. Komitənin sədri Əli Həsənovdan xahiş edirəm ki, bu məsələni araşdırsın. Bu işdə qurumun Sumqayıt şöbəsinin müdiri qanunsuzluğa yol verib. Sahibkarla əlbir olan şöbə müdiri bizi çıxılmaz vəziyyətə salıb".
İlqar