Mədət Quliyevlə müavini Hüseyn Əlixanovun yeri dəyişdiriləcək bilər; Cəzaçəkmə müəssisələrindəki xoşagəlməz vəziyyət general-leytenanta öz təsirini göstərir
Son günlər cəzaçəkmə müəssisələrində davamlı olaraq müxtəlif problemlərin meydana gəlməsi bütün diqqətləri Ədliyyə Nazirliyinin Penitensiar Xidmətinin rəisi, general-leytenant Mədət Quliyevə yönəldib. Məlumat üçün qeyd edək ki, təkcə son bir ayda müxtəlif cəzaçəkmə müəssisələrində məhbuslara işgəncə verilməsi faktları üzə çıxıb və buna görə həmin həbsxanaların rəisləri dəyişdirilib. Bir neçə gün öncə 17 saylı cəzaçəkmə müəssisəsində də daxili nizam-intizam qaydaları pozulmuşdu.
Məlum olmuşdu ki, həbsxana rəhbərliyi tərəfindən məhbuslara qarşı qeyri-insani hərəkətlər edilib. Məsələ ictimailəşdiyi üçün xidmət rəisinin əmri ilə sözügedən müəssisənin rəisi Arif Mirzəyev sərəncama göndərildi. Onun yerinə isə Elçin Əlicanov rəis təyin olunub. O, bu posta 3 saylı İxtisaslaşdırılmış Müalicə Müəssisəsinin rəis müavini vəzifəsindən gətirilib. Bu haqda məlumat verən gundelik-baku.com saytı bildirir ki, Mədət Quliyev Penitensiar Xidmətə rəis təyin olunandan sonra burda bir neçə dəfə rəis dəyişikliyi baş verib. Belə ki, əvvəllər də 17 saylı həbsxanada məhbusların rəhbərliyə qarşı etirazı qeydə alınmış və rəis Ərşad Həsənov vəzifədən çıxarılmışdı. Bu hadisənin üstündən heç bir həftə ötmədi ki, xidmətin 11 saylı cəzaçəkmə müəssisəsində ölüm hadisəsi baş verdi. Binəqədi rayonu ərazisində yerləşən müəssisədə cəzaçəkən, 2004-cü ildə Bakı Ağır Cinayətlər Məhkəməsi tərəfindən 13 il müddətinə azadlıqdan məhrum edilən 1955-ci il təvəllüdlü Hüseynov Novruz Məmməd oğlu qəfil ölüb. O, müəssisənin 2 saylı yataqxanasının dəhlizində qəfil yıxılıb və yerindəcə keçinib. Məhbusun hansı səbəblərdən həyatını itirməsi barədə mətbuata rəsmi açıqlama verilməsə də, qeyri-rəsmi məlumatlara görə, ölən şəxs dəfələrlə türmə rəhbərliyi tərəfindən müxtəlif təzyiqlərə məruz qalıb. Hadisənin əsl səbəbini bilmədiyimiz üçün bu haqda konkret bir şey söyləyə bilmərik. Rəsmi mənbələrdən əldə etdiyimiz bilgilər isə olduqca maraqlıdır. Məlumatlı şəxsin redaksiyamıza sızdırdığı xəbərlərə görə, Penitensiar Xidmət daxilində müşahidə olunan bütün hadisələr ölkə rəhbərliyi tərəfindən narahatlıqla qarşılanıb: "Xidmət rəisinin dəyişdirilməsi ilə bağlı təklif irəli sürülüb. Bunu deyən vəzifəli şəxslər xidmətin hazırkı rəhbərinin fəaliyyətinin qənaətedici olmadığını söyləyiblər. Müzakirədə iştirak edənlərin əksəriyyəti təklifi dəstəkləyiblər. Onlar Mədət Quliyevin yerinə başqasının gətirilməli olduğunu bildiriblər". Mənbənin iddiasına görə, xidmətin yeni rəisi postuna ən şanslı namizəd hazırda qurumda rəis müavini işləyən Hüseyn Əlixanovdur: "Ədliyyə sistemində böyük təcrübəyə malik olan müavinin rəis vəzifəsinə keçirilməsi ən real variantlardan biridir. İndiki rəis polis sistemindən bu vəzifəyə gəlibsə, müavin neçə illərdir ki, ədliyyə orqanlarında çalışır. Bu baxımdan ehtimalların həqiqətə çevrilməsi gözləniləndir. Digər tərəfdən, belə bir dəyişiklik gerçəkləşsə, rəis də müavin vəzifəsinə təyin edilə bilər". Qeyd edək ki, Əlixanov Hüseyn Ənvər oğlu 1953-cü ildə Quba rayonunda anadan olub. 1980-ci ildə Azərbaycan Dövlət Universitetinin hüquq fakultəsini bitirib. Hüquq-mühafizə orqanlarında əmək fəaliyyətinə 1981-ci ildən başlayıb. Bakı Şəhər Prokurorluğunun baş müstəntiqi, Gəncə şəhər prokuroru, Bakı şəhər prokurorluğunun daxili işlər orqanlarında qanunların icrasına nəzarət şöbəsinin rəisi, Bakı şəhər prokurorunun birinci müavini vəzifələrində qulluq edib. 2004-cü ildən ədliyyə orqanlarında xidmətə keçirilərək Ədliyyə Nazirliyinin Məhkəmə İcraçıları Baş İdarəsinin rəisi təyin edilib. 2007-ci ildən Penitensiar Xidmətin rəis müavinidir. Ədliyyə general-mayorudur.
Elgün Sədalı