Kürdəmir rayonunda külli miqdarda narkotik maddə aşkarlanıb. Respublika Daxili İşlər nazirliyinin Baş Narkotiklərlə Mübarizə İdarəsinin və Kürdəmir rayon polis şöbəsinin əməkdaşlarının apardıqları birgə əməliyyat axtarış tədbirləri nəticəsində 5 nəfər - Ramin Muradov, İsmayil Seyidov, Akif Xəlil, Fizuli Əsgərov və Vuqar Bəşirovun evindən külli miqdarda narkotik maddə olan heroin və qurudulmuş marixuana aşkar edilərək götürülüb.
Əməliyyat zamanı həbs olunanlardan biri, Kürdəmir rayon Söyüdlü kənd sakini Fizuli Əsgərovun narkotik bitkilər becərdiyi də üzə çıxıb. Onun həyətyanı sahəsindən aqrotexniki qaydada qulluq edilmiş 166 ədəd ümumi çəkisi 32 kiloqrama yaxın olan çətənə kolu aşkarlanıb. Evindən isə 1 kiloqram qurudulmuş marixuana götürülüb.
Qeyd edək ki, Fizuli Ələsgərov yaşadığı Söyüdlər kənd orta məktəbində texniki işçi və həyət yoldaşı isə həmin məktəbdə kitabxana müdiri işləyir.
Hazırda hadisə ilə bağlı kürdəmir rayon polis şöbəsində cinayət məcəlləsinin müvafiq maddələri ilə istintaq aparılır.