“Bu il buraxılış imtahanlarında “2” alan şagirdlər də qəbul imtahanlarında iştirak edə biləcəklər”. Bu sözləri Tələbə Qəbulu üzrə Dövlət Komissiyasının mətbuat katibi Elnur Nağızadə deyib. O, qeyd edib ki, bu il şagirdlərin attestasiya qaydalarına edilən dəyişikliklərə əsasən, şagirdlərin buraxılış imtahanlarında aldıqları qiymətlər IX sinif şagirdlərinin şəhadətnaməsi, XI sinif şagirdlərinin isə attestatında qeyd olunacaq.

“Buraxılış imtahanlarından “2” alan şagird qəbul imtahanlarında yaxşı nəticə göstərərək ali məktəbdə təhsil almaq hüququ qazana bilər”.

Qeyd edək ki, iyunun 7-də keçirilən imtahanda IX sinif şagirdlərinin 87.45, XI sinif şagirdlərinin isə 60.71 %-i “2” alıb. İyunun 2-də keçirilən imtahanlarda XI siniflər üzrə isə 7 faiz şagird “2” qiyməti alıb.

Xatırladaq ki, bu ilə kimi buraxılış imtahanlarından kəsilən IX sinif şagirdləri üçün payız aylarında əlavə şans yaradılırdı. Bundan əlavə, IX və XI sinif şagirdləri buraxılış imtahanlarından “2” qiyməti aldıqları halda ali məktəblərə qəbul imtahanlarında iştirak etmək hüququndan məhrum olurdular.