Təhsil Nazirliyi buraxılış imtahanlarında Bakı şəhəri məktəblərinin 9-cu sinif məzunlarının göstərdiyi nəticələrə dair hesabatı açıqlayıb

Təhsil Təhsil Nazirliyi 2013-cü ildə Tələbə Qəbulu üzrə Dövlət Komissiyası (TQDK) tərəfindən keçirilmiş buraxılış imtahanlarında Bakı şəhəri məktəblərinin 9-cu sinif məzunlarının göstərdiyi nəticələrə dair hesabatı açıqlayıb. ANS PRESS-in Təhsil Nazirliyinin saytına istinadən verdiyi məlumata görə, ümumilikdə tədqiqat 336 məktəb haqqında toplanılmış məlumat əsasında hazırlanıb. 2012-2013-cü tədris ilində Bakı məktəblərində (tədqiqata daxil edilmiş) 29651 şagird ümumi orta təhsil səviyyəsi üzrə məzun olub. Bu məktəblər üzrə 227 şagird Tələbə Qəbulu üzrə Dövlət Komissiyasının keçirdiyi buraxılış imtahanında iştirak etməyib. 3009 şagird (10.15%) həm ana dili, həm də riyaziyyat fənnlərindən “2” qiyməti alıb. Bir fəndən “2“ digərindən “3” qiyməti alanların sayı isə 3915 (13.20%) olub. Tədqiqat ümumi məzun sayına görə aparılıb.

Təhsil Nazirliyindən verilən məlumata görə, tədqiqatın məqsədi 2013-cü ildə TQDK tərəfindən keçirilmiş buraxılış imtahanlarında Bakı şəhərində fəaliyyət göstərən məktəblərin 9-cu sinif məzunlarının göstərdiyi nəticələrə əsasən, məktəblər arasında keyfiyyət fərqini müəyyən etməkdir. Tədqiqatın vəzifəsi 9-cu sinif məzunları üçün keçirilmiş buraxılış imtahanlarının nəticələrinə əsaslanaraq Bakı məktəblərinin reytinq siyahısını müəyyən etməkdir.

Qeyd edək ki, bu tədqiqat Bakı şəhərinin 12 rayonunda faəliyyət göstərən ümumtəhsil məktəbləri (ümumtəhsil məktəblərinin nəzdindəki qiyabi qruplar nəzərə alınmayıb), Təhsil Nazirliyinə tabe məktəblər, ali məktəblərin nəzdində fəaliyyət göstərən məktəbləri əhatə edir.