“Siyasi məhbuslarsız Azərbaycan” ictimai alyansı Ədliyyə Nazirliyinin Penitensiar Xidmətini bu hüquq-müdafiə təşkilatının informasiya sorğularına cavab verməkdən imtina etməsi ilə əlaqədar məhkəməyə verib.

Xüsusən, “Həbs yerlərində saxlanma şəraiti və məhbusların və məhkumların hüquqları haqqında” illik hesabatın tərtib edilməsi məqsədilə alyans cəzaçəkmə yerlərində monitorinq aparmağa icazə verilməsi xahişi ilə Penitensiar Xidmət rəhbərliyinə müraciət edib. Lakin Penitensiar Xidmət sorğuya cavab verməyib və monitorinq aparılmasına icazə verməyib.
Alyans Penitensiar Xidmət rəhbərliyindən aşağıdakı suallara cavab verməyi xahiş edib:
- Ədliyyə Nazirliyinin sərəncamında neçə istintaq təcridxanası və cəzaçəkmə müəssisəsi var?
- bu müəssisələrin texniki vəziyyəti necədir, regionlarda neçə yeni penitensiar müəssisə var?
- istintaq təcridxanalarında neçə nəfər saxlanılır və cəza çəkir?
- “Həbs yerlədində saxlanılan şəxslərin hüquq və azadlıqlarının təmin edilməsi haqqında” qanunun icrası üçün hansı addımlar atılır?
- niyə bir çox hüquq müdafiəçilərinin penitensiar müəssisələrə baş çəkməsinə icazə verilmir?
- 2011-2012-ci illərdə dövlət büdcəsindən məhbusların qidasının, tibbi xidmətin yaxşılaşdırılmasına və sosial problemlərinin həllinə nə qədər vəsait ayrılıb? 1 məhbus üçün dövlət büdcəsindən nə qədər vəsait xərclənir?
- 2012-ci ildə həbs yerlərində neçə nəfər ölüb?
- Ədliyyə Nazirliyinin Tibb Müəssisəsinə müalicə üçün neçə məhbus göndərilib?
- Məhbuslar ən çox hansı xəstəliklərdən şikayət edir?
Alyans bu suallara cavab almayıb. Monitorinq keçirilməsi haqqında xahişə Ədliyyə Nazirliyi nəzdində İctimai Müşahidə Komitəsinə müraciət etmək lazım olduğu haqqında cavab verilib. Bu cavab alyans rəhbərliyini qane etməyib.
Bununla əlaqədar olaraq alyans 1 saylı Bakı İnzibati İqtisad Məhkəməsinə Penitensiar Xidmətə qarşı iddia ərizəsi verib. İş icraata qəbul olunub və hakim Şərafət Məmmədova tərəfindən baxılacaq. -06