“Müəllim və həkimlərə dövlət qulluğu statusunun verilməsi ilə bağlı konsepsiya hazırlanır”. Modern.az xəbər verir ki, bu sözləri Dövlət Qulluğu Məsələləri üzrə Dövlət Komissiyasının sədri Bəhram Xəlilov deyib. O, qeyd edib ki, konsepsiyaya müvafiq orqanların rəyi alınandan sonra nəticə yekunlaşacaq. “Komissiyada həmin konsepsiyaya baxmışıq və təkliflərimizi vermişik”, – deyə B. Xəlilov əlavə edib.

Bəhram Xəlilov dövlət qulluğu imtahanlarının regionlarda keçirilməsi məsələsinə də aydınlıq gətirib. O bildirib ki, texniki baza olsa regionlarda imtahanların keçirilməsi üçün problem olmaz.
“Çünki artıq 3 ildir ki, biz test imtahanlarını kompüter vasitəsilə həyata keçiririk. Müvafiq proqramımız və test bankımız, təcrübəmiz də var. Yalnız məsələ imtahanların keçirilməsini təmin edilməsi üçün yerlərin, müvafiq avadanlığın olmamasıdır”.

Dövlət Qulluğu Məsələləri üzrə Komissiyanın sədri Bəhram Xəlilov Modern.az-a deyib ki, Azərbaycanda bütün sahələrdə olduğu kimi dövlət qulluğu sahəsində də islahatlar aparılır.

“2006-cı ildən başlayaraq Prezidentin sərəncamı ilə 23 iyun günü dövlət qulluqçularının peşə bayramı kimi qeyd edirik. Bu gün konfransımızda dövlət qulluğunun inkişaf perspektivlərinə, dövlət qulluqçularının vəzifələri barəsində işlərə nəzərə salacağıq. Burada dövlət orqanlarının nümayəndələri, mütəxəssisləri də iştirak edir. Azərbaycanda bütün sahələrdə olduğu kimi dövlət qulluğu sahəsində də islahatlar aparılır. Bugünki konfransda qarşıda duran problemlərin həlli barədə danışacağıq. Problemlər deyəndə nəzərdə tuturuq ki, dövlət qulluqçusu daim təkmilləşdirilməlidir və ilk növbədə dövlət qulluğu yeni yaranan münasibətlərə uyğun olmalıdır. Əsas vəzifəmiz dövlət qulluğuna peşəkar, potensialı yüksək olan gəncləri dəvət etməkdir”.

B. Xəlilovun sözlərinə görə, bir neçə ildir gənclərin işə qəbul olunması müsabiqə əsasında həyata keçirilir və bu sahədə rəhbərlik etdiyi qurumun təcrübəsi var.

“Bu çox çətin prosesdir. Prosesin formal keçməməsi üçün 4 ildir hazırlıq işləri aparırıq. Bundan başqa biz bir sıra dövlət proqramları qəbul etmişik. Açıq hökumət tərəfdaşlığı milli fəaliyyət proqramı və korrupsiya qarşı milli fəaliyyət proqramları qəbul edilib və orada bir çox məsələlər, o cümlədən komissiyanın üzərinə düşür. Biz bu sahədə işləyirik. Əsas problem dövlət qulluğunda şəffaflığın təmin edilməsidir. Şəffaflıq nə qədər çox olarsa, korrupsiyaya yer az qalar”, – deyə DQMK-nın sədri vurğulayıb.