Bir necə gündən sonra ayların ən müqəddəsi, on bir ayın sultanı Ramazan başlayır. Bu il bu müqəddəs ay ilin ən isti fəslinə - günlərinə təsadüf edir.

ANS PRESS İlahiyyatçı İsmayıl Əhmədovla bu ayın özəlliyi, isti günlərdə daha gec acmaq və susuzlamaq yolları barədə söhbət edib.

-Bu ayın özəlliyi nədədir?

Quranda on iki aydan yalnız mübarək Ramazan ayının adı çəkilir. Bu ay özünün bütün xüsusiyyətləri ilə digər aylardan fərqlənir. Həm oruc hökmünün verilməsi, həm Quranın nazil olması, həm də Peyğəmbərdən (s) sonra insanların ən yaxşısını şəhadət şərbətini içməsi ilə. Bu ayda digər aylarda halal olan bir sıra əməllər haram olur. İnsan özünü bir sıra ləzzətlərdən məhrum edir. Yoxsul təbəqənin həyatı boyu yaşadığı hal və hisləri dərk etmək üçün süni şəkildə aclıq və susuzluğun nə olduğunu yaşayırıq. Bir sözlə cismimi ac saxlayırıq ki, ruhumuzu doyuraq. Ramazan maddi və mənəvi nemətlərin şükrünü yerinə yetirmək ayıdır. Şükrü yerinə yetirmək məqsədə uyğun istifadə etməkdir. Allah gülü iyləmək üçün yaratdı, onu iyləməklə şükrünü yerinə yetirmiş oluruq. Əgər gülü iyləyəcək bir şəxs olmasaydı Allah onu yaratmazdı. Ramazan ayının bərəkətli qədr gecələrində gülü yaradan Allah Quranı nazil etdi. Quranın şükrünü də yerinə yetirməyimizi istədi. Quranın şükrü isə onu dərk edərək oxumaqla geçəkləşə bilər. Amma bu aya dəyər verən orucluq hökmünün bu ayda verilməsi deyil, Quranın nazil olmasıdır.

-Bu ayda Allahın bizdən istədiyi nədir?

İlin bütün aylarında olduğu kimi, bu ayda da Allah bizdən Ona saf niyyətlə bəndəlik etməyi, başqalarına diqqət yetirməyimizi istəyir. Bu ayda ibadət və xeyirxahlığa xüsusi yer ayrılır. Xüsusi yer ayrıldığı üçün də daha çox savab verilir. Quran təbiri ilə desək bu ayın gecələri min aydan üstündür. Bu ayda ac-susuz qalmaqla Allah bizdən yoxsulların keçirdikləri hisləri yaşamağı bizə əmr edir. Ramazan ayının son günü ehtiyacı olanlara fitrə zəkatı verilir, bayram namazı qılınır ki, bu da həmrəyliyin bariz nümunəsidir.

-Bu il Ramazan ayı yayın isti günlərinə düşür bu barədə nə məsləhət görə bilərsiniz?

-Bəli, bu neçə ildir belə davam edir və hələ bir neçə il davam edəcək. Bunu üçün də Allaha bəndəlik etmək istəyənlər gərək həyat proqramlarını elə tənzimləməlidirlər ki, çətinliyə düşməsinlər. İş qrafiklərini elə qurmalıdırlar ki, həm işlərini görə bilsinlər, həm də oruclarını tuta bilsinlər. Ali məktəblərə imtahana hazırlaşan tələbələrə isə gecələr dərs oxumağı gündüzlər yatmağı məsləhət görərdim.

-Ramazan ayında necə qidalanmaq lazımdır?

-İftar və imsak vaxtlarında qəbul olunan qidalara xüsusi diqqət yetirmək lazımdır. Susuzluğa səbəb olan təziqi aşağı salan yeməklərdən çəkinmək lazımdır. Həm imsakda, həm də iftarda yumurta, zeytun, yağ, pendir, kolbasa kimi qida məhsulları, südlü yeməklər məsləhət görülür. İftar zamanı xurma, süd (südlü yeməklər), şorbadan istifadə etmək lazımdır ki, mədə rahat həzm edə bilsin.

-İftar məclisləri necə təşkil olunmalıdır?

-Yaxşı olar ki, iftar məclisləri məscidlərdə təşkil olunsun və oraya əhalinin yoxsul təbəqəsi dəvət olunsun. Oruc tutmayanları belə dəvət etmək . Bununla onlarda dinə olan marağı dahada artırmış olarıq. Lakin heç bir harda israfçılığa yol vermək olmaz. Yəni nə oruc tutanlar bir nəfərin yerinə oruc tutub üç nəfərin yerinə iftar etməməli, nədə iftar verən şəxslər nəzərdə tutduğu şəxslərin sayından artıq yemək tədarük görməməlidirlər.

-Hər il Ramazan ayının fərqli cədvəlləri çap olunur və əhalidə çaşqınlıq yaranır. Onlardan hansı birinə istinad etmək olar?

-QMİ dərc etdiyi cədvəl Şamaxı Astrofizika rəsədxanasının hesablamaları əsasında hazırlanır. Bu cədvələndən istifadə etməklər imsak və iftar vaxtlarını dəqiq müəyyən edə bilərsiniz.

Allah oruc-namazlarınızı qəbul etsin!