Azərbaycan Silahlı Qüvvələrinin zabiti Ramil Səfərov haqqında son günlər mətbuatda dərc olunan bəzi təsdiqlənməmiş məlumatlar onun ailəsini hiddətləndirib.

Modern.az saytının xəbərinə görə, Ramil Səfərovun həyat yoldaşı Şəbnəm Səfərova jurnalistləri zabit haqqında sensasiya axtarmaqda qınayaraq, KİV nümayəndələrindən onların ailə işlərinə qarışmamağı tələb edib.

“Azərbaycan mətbuatı ölüb, sadəcə onu bir ürəkdən ağlayıb basdıranı yoxdu. Qalıb ortada. Artıq neçə ildi ki, ölkədə ya xaricdə olan hadisələri bizim mətbuatdan izləmirəm. Amma son bir neçə gündə ailəmlə bağlı "xəbərlər" gördüm və dəhşətə gəldim”.

Şəbnəm Səfərova mediada “Ramil Səfərov ata olacaq”, “Ramil Səfərova icra başçısına zəng edib torpaq istəyib, o da imtina edib” başlıqlarıyla yayımlanan xəbərləri təkzib edib.

“1.Biz valideyn olmağa hazırlaşmırıq, belə bir şey yoxdu. Olsa da, bu məni və həyat yoldaşımı ilgiləndirəcək şeylərdi. İnsanlara öz həyatları, problemləri bəs eləyir. Onları bir də belə, həm də yalan xəbərlərlə yormayın.

2. Ramil heç kimdən heç nə istəməyib və istəmək fikri də yoxdu. Hansısa məmuru "vurmaq" istəyirsinizsə, öz çirkin yöntəmlərinizi özünüzə saxlayın”-deyə zabitin xanımı qəzəbli şəkildə vurğulayıb.

Bununla yanaşı, xanım Səfərova qeyd edib ki, düzdü, onlar ucqar rayonların hansısa ucqar kəndindən kiçik ev almaq istəyiblər, amma buna görə, heç bir məmura ağız açmayıblar:

” Düzdü, biz ucqar rayonların hansısa ucqar kəndindən kiçik ev almaq istəmişik. Çünki, bu şəhərin yükü, böyüklüyü əzir adamı. Müəyyən yaşımızdan sonra ora köçüb sakit həyat yaşamaq istəyirik. Bununçün soraqlaşıb torpağını satan bir adamdan halal pulumuzla torpaq almaq istəmişik. Amma bürokratik sənədləşmə işlərinin çətinliyindən vaz keçmişik. Çünki yeni qanuna görə o adam torpağını satmaqçün auksiona çıxarmalıymış, sonra biz haralarasa ərizə yazıb auksionda iştirak etməliymişik və s. Bu uzunçuluğa görə torpaq sahibinə üzrxahlıq edib sağollaşdıq. Yenə deyirəm, kiməsə zəng, ya da xahiş olmayıb”.

Sonda Ramil Səfərovun xanımı dedi-qodu yazan jurnalistlərə üz tutaraq deyib: “Əzizlərim, sizdən jurnalist olmayıb və olmayacaq. Gedin özünüzə peşə tapın, Zərdabini gündə 5 dəfə qəbirdə o yan-bu yanlıq etməyin”.

Ramil Səfərovla Şəbnəm xanımın toyu ötən il oktyabrın 9-da olub.