Mehriban Zeynalova: “Prezidentə və əməkdaşlıq etdiyimiz beynəlxalq qurumlara müraciət etməyə hazırlaşırıq”
Məlum olduğu kimi “Təmiz Dünya ” Qadınlara İctimai Yardım Birliyinin İçərişəhər İlyas Əfəndiyev küçəsi 18-də yerləşən ofisi sökülüb. Buna səbəb ofisin arxasında tikinti şirkətinin inşaat işi həyata keçirməsi, başqa sözlə prezidentin İçərişəhər də tikinti aparmamaqla bağlı sərəncamına zidd addımlar atması olub. Belə ki, “Təmiz Dünya” nın yerləşdiyi ofisin arxa hissəsi gecə saatlarında qazılıb və orada otel inşa edilməsi üçün bərkitmə işləri həyata keçirilib. Səhər saatlarında isə ofisin divarlarında çatlar əmələ gəlib. Ofis qəzalı vəziyyətdə olduğundan evakuasiya prosesinə başlanılıb. Bu prosesi inşaat işini həyata keçirən şirkətin fəhlələri həyata keçirib. Hadisədən bir gün sonra isə şirkətin nümayəndələri “yoxa” çıxıb, əvəzində İçərişəhər qoruğunun nümayəndələri ortaya çıxaraq problemlə “məşğul” olmağa başlayıb. “Təmiz Dünya” nın ofisi dağıdıldığı üçün ona müvəqqəti bir otaqlı ofis verilib və ofisin kirayəsini şirkət öz boynuna götürüb. Ancaq hadisənin üzərindən 5 gün keçməsinə baxmayaraq vəziyyət dəyişməyib. Başqa sözlə, bir neçə ailənin evini dağıtmağa səbəb olan şirkət sanki belə bir iş tutmayıb. Əvəzində isə özü gizlənərək sakinlərlər İçərişəhər Dövlət Qoruğunu üz-üzə qoyub.
Son hadisələrlə bağlı məlumat verən “Təmiz Dünya” Qadınlara Yardım İctimai Birliyinin sədri, hüquq müdafiəçisi Mehriban Zeynalova bildirib ki, vəziyyət olduğu kimi qalır və heç bir irəliləyiş yoxdur. O, əlavə edib ki, bu cür vəziyyət uzun müddət davam edə bilməz: “Bizə müvəqqəti olaraq və bir ay müddətində bir otaqlı ofis veriblər. Orada işləmək mümkün deyil. Üstəlik təşkilatın zorakılığa məruz qalan qadın sığınacağı yerlə-yeksan olunub, köməksiz vəziyyətdə qalan onlarla qadın pis duruma düşüb. Bizim Azərbaycan hökuməti ilə yanaşı bir sıra nüfuzlu beynəlxalq təşkilatlarla layihələrimiz var, ancaq bu layihələrin həyata keçirə bilmirik, çünki ortada ciddi problem var. Faktiki olaraq ofisimiz yoxdur, işləmək imkanları sıfıra bərabərdir. Artıq ATƏT baş verən hadisə ilə maraqlanıb və ofisimizə baxış keçirib”.
Hüquq müdafiəçisi əlavə edib ki, hadisəyə səbəb olan qarşı tərəf problemi aradan qaldırmaq üçün təcili tədbirlər görmədiyi üçün onlar müəyyən addımlar atmaq zorunda qalıblar: “Biz ilkin olaraq mətbuat konfransı keçirməyi və bu məsələni ictimailəşdirməyi düşünürük. Eyni zamanda imza toplama kampaniyasına start verəcəyik. Bundan savayı, Azərbaycan prezidenti İlham Əliyevə, eləcədə əməkdaşlıq etdiyimiz yerli və beynəlxalq təşkilatlara müraciətlərimiz olacaq. Əgər bu cür davam eləsə, biz öz ofisimizin yanında çadır qurub fəaliyyətimizi davam etdirməyə cəhdlər edəcəyik. Lazım gəlsə məhkəməyə üz tutacağıq və bütün proseduraları keçəcəyik. Nəzərə almaq lazımdır ki, bu bizim mülkiyyətimizdir və heç kim onu uçurub sonra isə asanlıqla ona sahib çıxa bilməz. Azərbaycan demokratik hüququ ölkədirsə, bizim mülkiyyət hüququmuz qorunmalıdır”.
Mehriban Zeynalova əlavə edib ki, onların fəaliyyəti zamanı heç biri evi, mənzili və ya mülkiyyəti dağıdılmayıb: “Ancaq hansısa şirkət gəlib ofisimizin arxasında bizə xəbər vermədən qazıntı işləri həyata keçirib və bu səbəbdən də ofisimiz dağılıb. Artıq biz neçə gündür ki, əsəb, stress keçiririk, toz, dumanın içində qalmışıq, işimiz iflic edilib. Bəs bunun kompensasiyasını kim ödəməlidir?. Biz il ərzində minə yaxın vətəndaşa hüquqi yardım göstəririk, zorakılığa məruz qalan qadınların hüquqlarını qoruyuruq. Hər kəs də bilməlidir ki, biz öz hüququmuzu da qorumağı bacarırıq və bunun yollarını da bilirik”.