Azərbaycan Beynəlxalq Bankının qeyri-rəsmi nəzarəti altında fəaliyyət göstərən «Bank Technique» ASC ilə adı müxtəlif qalmaqallarda, hətta güllələnmə olayında hallanan «Şahbulaq» MTK və qeyriləri arasında məhkəmə çəkişməsi yaşanır.

Adıçəkilən və cavabdeh qismində adı göstərilən MTK və onun sədri Əliyev Nəsib Yusif oğlu, 2006-2010-cu illərdə “Badu-Kübə” MTK-nın təsisçisi olan kürəkəni Cabbarov Zaur Zeynal oğlu və “Texnikabank” ASC-nin («Bank Technique» ASC) Səbail rayon filialının müdiri vəzifəsində işləmiş oğlu Elton Əliyev Bakı şəhərində çoxmərtəbəli yaşayış binaları inşa etmək məqsədiylə bankdan iri məbləğdə kredit alıblar. Lakin sonradan şirkətdə baş verən olaylar adıçəkilənlərin krediti vaxtında ödəmələrində ciddi problemlər ortaya çıxarıb. Belə ki, Baş Prokurorluqdan o zaman verilən məlumata görə, “Şahbulaq” MTK-nın sədri kimi Nəsib Əliyev 2006-2010-cu illərdə “Badu-Kübə” MTK-nın təsisçisi olan kürəkəni Zaur Cabbarov və «Bank Technique» ASC-nin (“Texnikabank”) Səbail rayon filialının müdiri vəzifəsində işləmiş oğlu Elton Əliyevlə qabaqcadan əlbir olub Bakı şəhərində çoxmərtəbəli yaşayış binaları inşa edən «Badu-Kübə» və «Şahbulaq» MTK-larının adından saxta alqı-satqı müqavilələri və maliyyə arayışları əsasında ümumilikdə 12 min 621 kvadratmetr sahəsi olan 159 mənzili və 1 qeyri-yaşayış sahəsini 119 nəfərə satıblar.

Bundan sonra müvafiq maliyyə-mühasibat uçotu sənədləri tərtib etmədən əldə olunmuş 4 milyon 635 min 738 manat pulun 2 milyon 22 min 359 manatını “Badu-Kübə” MTK-nın inşa etdiyi binanın tikintisinə sərf edib, qalan 2 milyon 613 min 379 manat məbləğində özgənin külli miqdarda əmlakını isə aldatma yolu ilə ələ keçirərək dələduzluq edib. Məhz buna görə də Nəsib Əliyevə Cinayət Məcəlləsinin 178.3.2 (dələduzluq) və 308.2-ci (vəzifə səlahiyyətlərindən sui-istifadə) maddələri, Zaur Cabbarova isə Cinayət Məcəlləsinin 178.3.2-ci maddəsi ilə ittiham elan edilmiş və onlar Bakı Ağır Cinayətlər Məhkəməsinin hökmü ilə cəzalandırılıblar. Maraqlı burasıdır ki, istintaq materiallarında göstərilib ki, istintaq gedişində 36 zərərçəkmişlə tikintini davam etdirən ”Badu-Kübə” MTK arasında yeni müqavilələr bağlanılmaqla binadan ümumi dəyəri 1 milyon 86 min 233 manat dəyərində mənzillərlə təmin edilməklə vətəndaşların pozulmuş mənzil hüquqları bərpa edilib. Cinayət işi üzrə Elton Əliyev barəsində Cinayət Məcəlləsinin 178.3.2 və 308.2-ci maddələri ilə təqsirləndirilən şəxs qismində cəlb edilmə barədə qərar qəbul edilmiş, lakin o, istintaqdan yayındığına görə ittihamın elan edilməsi mümkün olmamış və barəsində axtarış elan edilib.

Hadisələrin belə yöndə cərəyan etdiyi bir ərəfədə isə “Badi-Kübə” MTK-nin sahibinin güllələnməsi də durumu daha da ağırlaşdırıb. Belə ki, Baş Prokurorluğun rəsmi məlumatına görə, ötən ilin iyunun ayının 5-də Suraxanı rayonunda fəaliyyət göstərən “Altun” istirahət mərkəzinin sahibi Asif Əsədullazadənin oğlu Türkel həmin rayonun Yeni Günəşli qəsəbəsində yerləşən “Badi-Kübə” Mənzil-tikinti kooperativinə məxsus binanın qarşısında atasına məxsus ov tüfəngindən atəşlər açaraq MTK-nın sədri Məmmədov Samid Abış oğlunu qəsdən öldürmüş, sonuncunun xalası oğlu, həmçinin MTK-nın təsisçisi Qəmbərov Ədalət Nəcəf oğlunu isə qəsdən öldürməyə cəhd edərək bədən xəsarəti yetirib. Səbəb isə 2003-cü ildən təsis edilən “Badü-Kubə” Mənzil-tikinti kooperativi alqı-satqı müqaviləsi əsasında 2007-ci ildə alan Ədalət Qəmbərovun razılaşmanı pozması olub. Belə ki, Ə.Qəmbərov Yeni Günəşli qəsəbəsində 0.40 ha torpaq sahəsində tikdiyi yaşayış binasının torpaq sahəsinin sahibi olan “Altun” istirahət mərkəzinin sahibi A.Əsədullazadəyə vəd verib ki, ona hazır binadan 3500-4000 kvadrat metr yaşayış sahəsi verəcək. Bu və ya digər məsələlərlə bağlı yaranan mübahisə isə sonda bir neçə nəfərin güllələnməsi ilə nəticələnib.

İndisə bu hadisələr səbəbindən ödənilməyən kredit borcları bank rəhbərliyini hərəkətə gətirib.

Mia.az-ın xəbərinə görə, «Bank Technique» ASC «Şahbulaq» MTK və digərlərinə qarşı kredit borcun tutulması tələbi ilə məhkəmədə iddia qaldırıb. Artıq iddiaya birinci məhkəmə instansiyasında baxılıb. İş hazırda Bakı Apellyasiya Məhkəməsində araşdırılıb: «Şikayətə Bakı Apellyasiya Məhkəməsinin hakimi Xuraman Məhərrəmovanın sədrliyi ilə baxılıb. Hakim ötən həftə Binəqədi rayon Məhkəməsinin bank hesabına və ipoteka edilmiş əmlaklarla həbs qoyulması ilə bağlı verdiyi qərardadı ləğv edib. Və işi yenidən birinci məhkəmə instansiyasına geri qaytarıb».