Etibar Əliyevin oğlu Kəramət Əliyev
bankın qeyri-rəsmi rəhbərinə çevrilib

Bir neçə dostunu ASC-nin filiallarında işə düzəldən bankir oğlu az yaşına baxmayaraq, özünə lüks şərait yaradıb . Azərbaycanın bank sektorunda son dövrlər maraqlı hadisələr baş verməkdədir. Bir-biri ilə daim rəqabətdə olan banklar çalışırlar ki, hər fürsətdə digərlərini zəiflətsinlər. Yəni banklar arasında sanki gizli savaş gedir. Bunun məntiqi nəticəsi olaraq ara-sıra hansısa bankların sıradan çıxarılaraq müflisləşdirilməsinin şahidi oluruq. Ölkə təcrübəsində belə şeyləri bir neçə dəfə görmüşük. Dayağı möhkəm olmayan maliyyə müəssisələri belə mübarizələrdə tab gətirə bilməyərək fəaliyyətlərini dayandırırlar.
Məlumunuz olduğu kimi, ötən ilin əvvəllərində "Texnikabank"la (indiki adı "Bank Technique") bağlı bəzi sensasiyalı məlumatlar. yayıldı. Bankda keçirilən yoxlamalar zamanı bir sıra qanun pozuntuları üzə çıxdı. Səbail rayon Məhkəməsinin 10 mart tarixli qərarı ilə bankın Müşahidə Şurasının sədri və səhmdarı Etibar Əliyevin barəsində 3 aylıq həbs-qətimkan qərarı çıxarıldı. Üç ayın tamamında bank sədrinin həbs müddəti bir neçə ay da uzadıldı. Qeyd edək ki, E.Əliyev Cinayət Məcəlləsinin (CM) 178-ci maddəsi ilə, yəni dələduzluqda təqsirləndirilərək həbs olunmuşdu.
Sədrin həbsindən sonra digər bank rəhbərləri "Texnikabank"ın fəaliyyətini dayandıracağı barədə fikirləşirdi. Amma belə bir məqamda hansısa qüvvələr bankın bağlanmasına mane oldular. Və E.Əliyevin oğlu Kəramət Əliyev rəsmi olmasa da, banka rəhbərliyi öz üzərinə götürdü. Məlumat üçün deyək ki, "Texnikabank" 1993-cü ildə yaradılıb. Hazırda bankın 35 filialı və 5 şöbəsi fəaliyyət göstərir. Bankın səhmdarları "World Wines Private Company" (75%), "Kazimir Caspian Fund Limited" (10%) və Etibar Əliyevdir (15%). E.Əliyevin 15 faizlik payını diri tutan oğlu onun həbsdə olduğu müddət ərzində bəzi gizli əməliyyatlar gerçəkləşdirib. Etibarlı qaynaqlardan əldə etdiyimiz məlumatlara görə, atasının həbsdə olmasından istifadə edən K.Əliyev tələbə yoldaşlarından özünə ən yaxın olanlarını bankın filial müdiri vəzifələrinə təyin edib. Faktiki olaraq "Texnikabank"da vəzifə tutmayan bankir oğlunun bunları necə həyata keçirməsi isə hər kəsə maraqlı olub. Məsələni araşdıran mənbə deyir ki, E.Əliyev içəridə olduğu vaxtda ordan bankın idarə işləri ilə maraqlanıb.
Müşahidə Şurasında təmsil olunan şəxslərə tapşırıb ki, oğlunun bir sözünü iki etməsinlər və ona şərait yaratsınlar. Beləcə, onun dediyi kimi də olub, oğlu öz yaxın tələbə yoldaşlarını vəzifə ilə təmin edib. Bankın filiallarında işə düzələn şəxslər "bank müdiri"nə "hörmət" də ediblər. Qısa müddət ərzində oğul Əliyevin maxinasiyaları milyonları keçib. Bunun hesabına şəxsi varidatını xeyli zənginləşdirib. Az yaşına baxmayaraq, özünə əməlli-başlı lüks şərait yaradıb.
Məlumatda yer alır ki, atası həbsdən çıxandan sonra oğlu bir müddət istirahət etməyə qərar verib və bu məqsədlə xarici ölkələrdən birinə gedib. Oradakı şəxsi evində dincəlib ölkəyə qayıtdıqdan sonra Bakının ən mənzərəli yerində özünə mənzil alıb. Bu mənzilin özəlliyi isə ondan ibarətdir ki, bir hündürmərtəbəli binanın 3 mərtəbəsini əhatə edir. Yəni K.Əliyev 14, 15 və 16-ci mərtəbələri alaraq özünə göydələndə villa şəraiti düz-qoş edib. Bunları yazmaqda məqsədimiz odur ki, K.Əliyev bankda heç bir vəzifə tutmaya-tutmaya necə kadr islahatları keçirib? Hansı yollarla milyonlara sahib çıxıb? Bankda baş verən maxinasiyalarla bağlı əlimizdə bəzi məlumatlar var. Sadəcə, hələlik araşdırma getdiyindən onları yaza bilmirik.
Gələn sayımızda daha geniş məlumat verməyə çalışacaq və "Texnikabank"ın nəyə görə "Bank Technique"ə çevrildiyini yazacağıq.
Elçin Əmirov