ARDNŞ-də mənzil siyahısında 6238 adam növbə gözləyir


Uzun müddət hardasa çalışmağın əvəzində dövlət tərəfindən bu əziyyətin bəhrəsini görmək, pulsuz evlə təmin olunmaq çox keçmişdə qaldı. Artıq mənzil almaq istəyən işçi dövlət qurumundan heç nə ummamalı, öz cibinə güvənməlidir. Axı indi çox az sayda dövlət qurumu var ki, öz işçilərinin mənzil şəraitini yaxşılaşdırmaq istiqamətində hansısa addım atır. Modern.az-ın əməkdaşı dövlət qurumları ilə əlaqə saxlayaraq, onlardan hansının öz əməkdaşlarının mənzil şəraitini yaxşılaşdırmaq üçün çalışdığını araşdırıb.

İqtisadi İnkişaf Nazirliyinin mətbuat katibi Abbas Əliyev bildirib ki, bu dövlət qurumu öz işçiləri üçün yaşayış binası tikmir və perspektivdə də bununla bağlı hər hansı plan yoxdur.

Rabitə və İnformasiya Texnologiyaları Nazirliyinin mətbuat xidmətinin rəhbəri Müşviq Əmirov isə əksinə, bildirib ki, bu dövlət orqanı özünün evsiz işçilərinə mənzil verib:
“Nazirlik Sulutəpədə bina tikərək, öz işçilərinə paylayıb. Artıq 200 nəfər işçimiz mənzillə təmin olunub. Amma bundan yeni mənzillərin tikilməsi nəzərdə tutulmayıb”.

Gənclər və İdman Nazirliyinin mətbuat katibi Qabil Mehdiyev bildirib ki, nazirliyin belə bir təcrübəsi olmayıb: “Yaxın illərdə ev tikilməsi də nəzərdə tutulmur. Ümumiyyətlə nazirliyin belə bir təcrübəsi yoxdur. Odur ki, nazirlik tərəfindən heç bir işçiyə ev verilməyib”.

Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsinin müdir müavini İlham Məmmədov da onlarda belə bir tikintinin getmədiyini deyib: “Yaxın illərdə belə bir tikinti nəzərdə tutulmur. Nazirlikdə çalışan işçilərə ev verilməyib”.

Azərbaycan Respublikası Dövlət Neft Şirkətində (ARDNŞ) isə mənzil növbəsi hələ də öz qüvvəsindədir. Şirkətin mətbuat xidmətinin rəhbəri Nizaməddin Quliyevin sözlərinə görə, yeni Mənzil Məcəlləsi qəbul olunana qədər şirkətin hesabına mənzil tikilişi mövcud idi. Yeni qəbul olunan Mənzil Məcəlləsində belə bir məsələ olmadığından əməkdaşların yaşayış sahəsi ilə təmin edilməsi üçün “Neftçi” Mənzil Tikinti Kooperativi (MTK) təsis edilib. Bu ilin sentyabr ayında iki bina istifadəyə verilib. Kooperativ hazırda daha iki binanın tikintisini aparır.
2012-ci ilin əvvəlinə ARDNŞ üzrə 6238 işçi mənzil növbəsindədir. Onların 5743 nəfəri Bakı şəhəri üzrə, 495 nəfəri isə müxtəlif şəhər və rayonlar üzrə uçota götürülüb. Gələcəkdə ARDNŞ üzrə mənzil uçotunda olmayan və mənzil şəraitini yaxşılaşdırmağa ehtiyacı olan işçilərin də “Neftçi” MTK tərəfindən mənzillə təmin edilmələri nəzərdə tutulur.

“Azərbaycan Dəmir Yolları” QSC-in mətbuat xidmətinin rəhbəri Nadir Əzməmmədov deyib ki, Azərbaycanda dəmiryolçuların yaşayış-məişət tələbatının təmin edilməsi üçün mənzil növbəsində duranlara yeni tikililərdə 150 yeni mənzil veriləcək. Müsahibimiz onu da bildirib ki, indiyədək bu məqsədlə QSC və onun Həmkarlar İttifaqı tərəfindən ümumi sahəsi 1400 kv. metr olan 60 mənzil alınaraq dəmiryolçulara verilib.

Kənd Təsərrüfatı Nazirliyinin mətbuat xidmətinin rəhbəri Murtuzəli Hacıyev bildirib ki, sovet dönəmində işçilərə pulsuz ev verilsə də, bu iş 1993-cü ildən dayandırılıb: “İndi nazirlik tərəfindən hər hansı yaşayış binası tikilmir. Heç bir işçiyə mənzil vermək mümkün deyil”.

Mədəniyyət və Turizm Nazirliyinin mətbuat xidmətinin əməkdaşı Zöhrə Əliyeva isə deyir ki, belə bir məsələ gündəmdə yoxdur. Amma nazirliyin maliyyə saxlancı olduğu təqdirdə nazirlik əməkdaşlarının mənzillə təmin edilməsi niyə də olmasın? Nazirlik rəsmisinin dediyinə görə, hələ ki, belə bir məsələ müzakirə edilməyib.

Maliyyə Nazirliyi də dövlət büdcəsində mərkəzi icra hakimiyyəti orqanının işçilərinə yaşayış binalarının tikintisi və ya fərdi mənzillərin alınması üçün vəsait nəzərdə tutmayıb. Ona görə də Maliyyə Nazirliyi işçiləri üçün yaşayış binası tikmir və hal-hazırda ümumiyyətlə bu məsələ müzakirə mövzusu deyil.

Digər nazirliklərdən də ümidverici xəbər verilmədi...

Gültəkin Ələsgər