Qara dəniz sahilində olan bu kiçik şəhərin, Kobuletinin bəlkə də ən önəmli və yadda qalan xüsusiyyəti budur. Burdakı qiymətlər Azərbaycanın paytaxtındakı, hətta regionlarındakı qiymətlərdən çox aşağıdır.
Kobuleti Gürcüstanın Acarıstan muxtar vilayətinin əsas şəhərlərindən biridir. Şəhər 16-cı əsrdən etibarən Osmanlı imperiyasının sərhədlərinə daxilində olub, lakin 1877-1878 türk-rus müharibəsindən sonra Çar Rusiyasının tərkibinə keçib.
Şəhərin özünəməxsus turistik ab-havası, rəngarəng insanları, gözəl təbiəti var. Bir tərəfdə uzandıqca uzanan çimərliklər, digər tərəfdə istirahət üçün tikilmiş evlər, bağlar, otellər yerləşir. Burada müxtəlif ölkələrdən, şəhərlərdən; əsasən də Türkiyə, İran, Azərbaycan və Ermənistandan gəlmiş insanları görmək mümkündür. Hətta şəhər bəzi istirahət yerlərindən nə qədər uzaqda yerləşsə də, uzaqdan gələnlərin sayı az deyil.
Burada istirahət edənlər arasında İran vətəndaşları xüsusi diqqət çəkir. Tehranda yaşadığını deyən 32 yaşlı Tovhid Fəthipur buraya ailəsi ilə birgə gəldiyini və çox məmnun olduğunu söyləyir.
“Bu bizim Kobuletiyə birinci səfərimizdir. Əvvəllər Tiflisdə və Batumidə dincəlmişik. Yəqin bilirsiniz ki, İranda bəzi azadlıqlar məhduddur. Ona görə də buranı seçmişik. Düzdür, bəzən dil problemimiz olur, çünki biz nə gürcü, nə də rus dilini bilirik, yerlilərdən isə ingilis dilini bilənlər azdır. Amma birtəhər dərdimizi başa sala bilirik”
Azərbaycanda dincəlməyin onlar üçün daha asan ola biləcəyini deyən Tovhid düşünür ki, bunun üçün bəzi şərtlər dəyişməlidir.
“Düzdür, Azərbaycan bizə daha yaxındır, oraya getmək çox asandır. Amma bir sıra çətinliklər var. Məsələn, qiymətlər çox bahadır. Mən Bakıya bir dəfə iş üçün gəlmişdim, məndən təkcə bir gecəlik adi otel otağı üçün 150 dollar istədilər. Bəlkə də turistik bölgələrdə vəziyyət yaxşıdır, çünki ora getməmişəm, bilmirəm. Amma ümumilikdə sizin ölkədə hər şey çox bahadır” – deyə o təəssüflə qeyd edir
Turistlər arasında azərbaycanlılar da var. Onlar digər turistlərə nisbətən özlərini buraya daha doğma hiss etdiklərini deyirlər. Turan adlı azərbaycanlı gənc deyir ki, Gürcüstan onlara çox tanışdır və ona görə də burada istirahət etmək onun üçün çox rahatdır.
“10 gündür ki, Kobuletidəyəm. Özümü çox rahat və sərbəst hiss edirəm. Əvvəl dostlarla Qəbələyə getmək istədik, sonra isə keçən ilki pis təcrübəmiz yadımıza düşdü. Düzdür bura çox uzaqdır, təxminən bir gün yol gəlmişik, amma əziyyətimizə dəyir.”
Qiymətlər
Kobuletidə qiymətlər hər bit turistin qaldığı evə yemək və əyləncə tərcihinə görə müxtəlif cürdür. Burada çoxlu sayda gürcü ailələri öz evlərini kirayəyə verir. Orta şəraitli bir otağın qiyməti adam başına 10 laridir ( 5 AZN). Bu qiymət evin şəraitinə görə 15, 20 lariyə qalxa bilir. Lakin evin qiymətinə turistin yemək və digər xərcləri daxil deyil. Buradakı restoranlarda 10-20 lariyə yemək sifariş edə bilərsiniz, təbii ki, bu qiymətlər turistin seçiminə bağlıdır.
Əgər oteldə qalmaq istəyirsinizsə ən azı 30 lari ödəməlisiniz.
Çimərliklərdə isə özəlləşdirmə və ya hər hansı ərazini hasara alma demək olar ki, yoxdur. Ürəyiniz istədiyiniz yerdə, istədiyiniz qədər çimə bilərsiniz.
Böyük fərq
Acarıstan Turizm İdarəsinin məlumatına görə, təkcə keçən il regionu 239.742 nəfər ziyarət edib. 2012-ci ildə xarici qonaqların sayı 102.173 nəfər olub. Gürcüstan prezidenti M.Saakaşvili turizmlə bağlı çıxışında 2013-cü il üçün ölkə üzrə 5 milyon turist gözlədiklərini qeyd etmişdi. Ümumilikdə isə bu əraziyə istirahət üçün üz tutanların sayı il keçdikcə daha da artır və bu rəqəmlər Azərbaycana səyahət edən turist sayından qat-qat çoxdur. Müqayisə üçün qeyd edək ki, Azərbaycan Mədəniyyət və Turizm naziri Əbülfəz Qarayev 2017-ci il üçün ölkəyə gələn turistlərin sayını 4 milyona qədər artırmağı planlaşdırdıqlarını demişdi.
Maraqlıdır ki, Azərbaycanın da təbiəti Gürcüstandan geri qalmadığı halda, xeyli sayda turistik şəhərləriniz və rayonlarımız olsa da Qafqaza gələn turistlər Gürcüstanı seçir. Bu isə əlbəttə sadaladığımız səbəblərlə bağlıdır. Qiymətlər ucuzdur, istirahət rahatdır, şəhərlər və rayonlar turistlər üçün daha əlverişlidir. Kobuletidə olduğu kimi..