Film gerçək hadisələrdən bəhs edir və obrazların hamısı real həyatda olan adamlardan götürülüb

Baş prokurorun keçmiş müavini, hazırda Konstitusiya Məhkəməsinin hakimi olan İsa Nəcəfovun "Gecə yarısı qətl” əsərinin əsasında, 2003-cü ildə çəkilən filmdə 1994-1995-ci illər ərzində Azərbaycanda baş verən hadisələrdən danışılır.

Siyasi triller janrında olan film iki aparıcı süjet xəttinə malikdir. Film 1994-cü ildə prezident yanında xüsusi şöbənin rəisi Şəmsi Rəhimov və Azərbaycan parlamentinin vitse-spikeri Afiyəddin Cəlilovun öldürülməsi ilə başlayır və 1994-1995-ci illər ərzində baş vermiş dövlət çevrilişlərini əks etdirir. Diqqəti çəkən məqamlardan biri də budur ki, film gerçək hadisələrdən bəhs edir və obrazların hamısı real həyatda olan adamlardan götürülüb.

Filmdəki obrazlardan biri də son zamanlar adı tez-tez çəkilən baş prokurorun keçmiş müavini, daha sonra baş prokuror olan, hal-hazırda Azərbaycanın Serbiya Respublikasında, Monteneqro, Bosniya və Herseqovinada fövqəladə və səlahiyyətli səfiri vəzifəsində çalışan Eldar Həsənov obrazıdır. Filmdə Eldar Həsənov düşdüyü hər vəziyyətdə öz maraqlarına uyğun hərəkət edib, maksimum mənfəət əldə edən şəxs olaraq göstərilir.

Qeyd edək ki, son günlər keçmiş baş prokurorun 1994-1995-ci illərin dövlət çevrilişlərindəki rolundan tez-tez bəhs edilməkdədir. Maraqlısı budur ki, indiyə qədər buna bənzər iddia 2003-cü ildə İsa Nəcəfovun əsərinin əsasında çəkilən "Bir anın həqiqəti” filmində ekranlaşdırılıb.

Film 1994-cü ilin 12 sentyabrında Gülüstan sarayında imzalanan "Əsrin kontraktı" müqaviləsinin mərasimi zamanı, baş prokuror Əli Ömərovun Eldar Həsənova Mahir Cavadovdan danışması ilə başlayır. Həmin sujetdə Eldar Həsənovun Mahir Cavadovu müdafiə etdiyi göstərilir. Sonra isə Eldar Həsənovun Cavadov qardaşları ilə isti görüşü Əli Ömərovu təəcübləndirir.

İkinci sujetdə, xüsusi idarənin rəisi Şəmsi Rəhimov və parlamentin vitse-spikeri Afiyəddin Cəlilovun qətli ilə bağlı Respublika Prokurorluğunda kollegiya iclası keçirən Əli Ömərova Mahir Cavadovun evinin nömrəsini Eldar Həsənovun verdiyi göstərilir.

Filmdə ən maraqlı epizodlardan biri, OMON-çuların Respublika Baş Prokurorluğuna hücumudur. Hücum zamanı Eldar Həsənov prokurorluq əməkdaşlarına öz otağında toplanmasını əmr edir.

Bundan sonra Eldar Həsənovun Mahir Cavadovla isti görüşü, eyni zamanda Rövşən Cavadovun Respublika Baş Prokurorluğuna gəlib prezident Heydər Əliyevlə danışdıqdan sonra, Eldar Həsənovun Cavadovlara məsləhət verməsi də diqqəti çəkən məqamlardandır. E.Həsənov Cavadov qardaşlarına prezidentdən qarantiya istəməsini məsləhət görür və sonra, o zamanlar parlamentin spikeri olan Rəsul Quliyevlə gizli telefon danışığı apararaq, prezidentə vəziyyətin nəzarət altında olmasının çatdırılmasını istəyir.

Bütün bu sujetlər Eldar Həsənovun Prezident və Cavadovların maraqlarına uyğun şəkildə hərəkət etməsini və əvəzolunmaz şəxs obrazını yaratmasını aydın şəkildə göstərir.

Qeyd edək ki, Eldar Həsənovla İsa Nəcəfovun söhbəti ilə filmdəki Eldar Həsənov obrazı bitir.

Etatist.com İsa Nəcəfovun çox seriyalı "Bir anın həqiqəti” filmininin, Eldar Həsənovun obarzının canlandırıldığı bölümlərini təqdim edir: