Qazax Müalicə Diaqnostika Mərkəzində vətəndaşa saxta diaqnoz qoyulub

gundemxeber.az Bir neçə ildir ki, istifadəyə verilmiş Qazax Müalicə Diaqnostika Mərkəzi ən müasir tibbi avadanlıqlarla təchiz olunsa da, həmin avadanlıqlarla işləyəcək həkim mütəxəssislərin çatışmamazlığı hamını narahat edir. Elə diaqnostika mərkəzinin baş həkimi Kamandar İbrahimov da sözügedən müalicə mərkəzinə düşmüş təsadüfi həkimlərdəndir. Qəribə burasıdır ki, K.İbrahimov hələ Qazax Mərkəzi Xəstəxanasında işləyərkən elə də tanınmış həkimlər sırasında deyildi. Onun birdən-birə belə bacarıq və qabiliyyətə mindirilməsi heç də təsadüfi deyil. Rayon əhalisi yaxşı bilir ki, baş həkim öz başının gücünə deyil, sözükeçən qohumlarının hesabına diaqnostika mərkəzinə müdir təyin edilib. Özü kimi mütəxəssisləri də öz əli ilə müalicə mərkəzinə yığmışdır, desək heç də yanılmarıq. Nəinki Qazax Müalicə Diaqnostika Mərkəzi səhiyyə nazirliyinin tabeliyinə keçən gündən, hətta həmin sahə ARDNŞ-nin tabeçiliyində olanda da bura demək olar ki, müdiriyyətin xeyri üçün pullu xidmət kimi fəaliyyət göstərib. Elə lap indi də K.İbrahimov və onun komandası yazılmamış qanunlar kimi “müsəlmançılığa xas olan xüsusiyyətlə” pul uzadan xəstələrin də xətrinə dəyməyərək rahatca pullarını alıb ciblərinə qoyurlar. Hətta, xəstələrlə açıq-açığına qiymət də kəsilir. Belə olmasaydı, vaxtilə “Zaporoji” markalı minik avtomobili ilə mərkəzi xəstəxanada çalışmış K.İbrahimov indi çox şeylərin sahibi olmazdı...
Müalicə diaqnostikasında xəstələrlə alış-verişdən başqa burada artıq əmək intizamı da pozulmuş, texniki işçilər arasında dava-dalaşlar yaranmış, üstəlik işə ciddi laqeydlik də xüsusi yer almışdır. Bu bir yana, çox vaxt belə bir tibbi aparatların qarşısında onları işlədənlər də gobud səhvlərə yol verirlər. Bu da, birbaşa K.İbrahimovun baş həkim kimi nə özünün, nə də onun işə cəlb etdiyi istər həkim, istər tibb bacılarını, istərsə də texniki işçilərin yerində olmamasından xəbər verir.
Bu ilin iyun ayının 5-dən 6-na keçən gecə Ağstafa rayonunun Poylu kənd ərazisində avtomobil qəzasına düşmüş, 1993-cü il təvəllüdlü Arzu Baba oğlu Əliyev həmin gecə Ağstafa Mərkəzi Xəstəxanasına gətirilir, səhərisi isə daha yaxşı müayinədən keçməsi üçün Qazax Müalicə Diaqnostika Mərkəzinə çatdırılır. Mərkəzdə kompyuter tomoqrafiya müayinənin şöbə müdiri Fərhad Nağdalıyev xəstəni müayinə edərək protokol tərtib edir. Boyun nahiyəsindən zərbə alan xəstə haqqında F.Nağdalıyev müayinə protokolu tərtib edir və burada sadəcə olaraq “boyun lordozu bucaq altında dəyişmişdir, eyni zamanda C6-C7 fəqərəarası disklərdə yerdəyişmə aşkar olunmur, digər fəqərə cismlərinin hündürlüyü, konturları strukturası dəyişməmişdir” tibbi ifadəsini yazır. Getdikcə xəstəliyinin şiddətlənməsini hiss edən Arzu Baba oğlu yenidən Ağstafa Rayon Mərkəzi Xəstəxanasına çatdırlır. Bunu tam müayinə edən gənc həkim Teyyub Carçıyev 881 saylı epikrizdə isə bildirir: “Boynunun travması, onurğa beyninin sarsılması, 6-cı, 7-ci boyun fəqərələrinin travmatik sınığı. Travmatik şok”. İyun ayının 9-na qədər burada stansionar müalicə alan xəstə Arzu Əliyev həkimlərin dediyini bir daha dəqiqləşdirmək üçün 17 iyun tarixində Bakı şəhərinə, Mərkəzi Klinika Xəstəxanasına üz tutur. Eyni ilə mərkəzi klinikada aparılan müayinələr həkim Teyyub Carçıyevin qoyduğu diaqnozla üst-üstə düşür. Gənc xəstə A.Əliyev mrəkəzi klinikanın və Ağstafa RMX-nın müalicə həkimi T.Carçıyevin ciddi müalicəsi nəticəsində sağalır. Yəqin ki, Arzu Baba oğlu Əliyevin qismətinə də belə yazılıbmış.
Lakin, məsəl bunda da deyil. Fərz edək ki, həmin xəstə Qazax Diaqnostika Mərkəzinin şöbə müdiri Fərhad Nağdalıyevin “düzgün müayinəsinə” inanıb və kimsəsizliyinə görə şəfa tapdığı tibb ocaqlarına üz tutmasaydı, bəs onda bu gəncin taleyi necə olardı? Hippokrat andını qəbul etmiş həkimlər cüzi bir səhv üzündən xəstəni sağaltmaq əvəzinə onu ölümə doğru sürükləyirsə onda bu hansı andın ayağına yazılır? Bu cür səhv diaqnozları görən xəstələr Qazax Müalicə Diaqnostika Mərkəzinə, Kamandar İbrahimov kimi baş həkimin yanına necə üz tuta bilərlər?
Görünür, Qazax Müalicə Diaqnostikası dövlət tərəfindən hər cür müasir tipli tibbi avadanlıqlarla təchiz olunsa da, diaqnostikanın baş həkimi K.İbrahimov bu səhiyyə ocağını öz bildiyi kimi idarə edir. O, xəstələrə təcrübə bazası kimi baxaraq yalnız onlardan yararlanmağa çalışır. Əziyyət çəkən isə biçarə xəstələr olur.
Qarşı tərəfin də mövqeyini dinləməyə hazırıq.

Ələddin Kəsəmənli