Sabirabad Ərazi Sınaq və Sertifikatlaşdırma şöbəsinin nəzarətində olan Sabirabad. Saatlı, İmişli və Beyləqan rayonlarında istehsal müəssisələrinin əksəriyyəti fəaliyyətini dayandırmaq məcburiyyətində qalır

Ölkə prezidenti dəfələrlə müxtəlif tədbirlər və regionlara səfərlərində hamıya sahibkarlığın inkişafı yolunda əllərindən gələni əsirgəməməyi tövsiyə edir. Ancaq təəssüf ki, bu və ya digər formada sahibkarlığın problemləri günü-gündən qabarır. Müxtəlif vəzifələrə təyin olunan şəxslər bir çox hallarda qohumluq, regionçuluq prinsipləri və rüşvət müqabilində vəzifəyə təyin olunurlar. Bu hal özünü əsasən də yerlərdə göstərir. Yeni təyin olunan icra başçıları da vəzifəyə gələr-gəlməz regiondakı gəlir mənbəyi olan sahələri öz inhisarlarına alır və belədə bu və ya digər formada sahibkarlara təzyiq edirlər. Həmin məmurlar uzun müddət təsərrüfat fəaliyyətilə məşğul olmuş sahibkarların bizneslərinin bir hissəsini müxtəlif təzyiq formaları vasitəsilə əllərindən alırlar. Dəfələrlə şahidi olmuşuq ki, müxtəlif rayonlara yeni icra başçıları təyin olunan zaman, orada olan ticarət mərkəzləri, bazarlar rekonstruksiya və rayonun arxitektur quruluşuna uyğun gəlməməsi bəhanəsilə sökülür. Belədə sahibkarların normal fəaliyyətinə əngəl olurlar. Hətta belə olaylar zamanı ölümlə nəticələnən hadisələr də baş verib
Redaksiyamıza müraciət edən sahibkarlar da onlara qarşı baş verən haqsızlıqdan şikayətlənir. Sabirabaddan bizə müraciət edən sahibkar iddia edir ki, son vaxtlar onlardan rüşvət tələb edən idarələrin cərgəsinə daha biri də əlavə olunub. O da Standartlaşdırma, Metrologiya və Patent üzrə Dövlət Komitəsidir. Sahibkar deyir ki, Sabirabad Ərazi Sınaq və Sertifikatlaşdırma şöbəsinin müdiri Saleh Səmədov Sabirabad. Saatlı, İmişli və Beyləqan sahibkarlarına qan uddurur. Onu da bildirək ki, “Azərbaycan Respublikasının Standartlaşdırma, Metrologiya və Patent üzrə Dövlət Komitəsinin fəaliyyətinin təkmilləşdirilməsi ilə bağlı tədbirlər haqqında” Azərbaycan Respublikası Prezidentinin 4 iyun 2012-ci il tarixli 604 nömrəli Fərmanı ilə A Standartlaşdırma, Metrologiya və Patent üzrə Dövlət Komitəsi yanında Texniki Tənzimləmə və Standartlaşdırma üzrə Dövlət Nəzarəti Xidməti, Dövlət Metrologiya Xidməti və Dövlət Akkreditasiya Xidməti yaradılıb. Bundan başqa, Standartlaşdırma, Metrologiya və Patent üzrə Dövlət Komitəsinin strukturuna daxil olan ərazi sınaq və sertifikatlaşdırma idarələrinin ləğvi ilə əlaqədar sertifikatlaşdırma üzrə qurumları akkreditasiyadan keçirməklə, sertifikatlaşdırma sahəsində işlərin səmərəli həyata keçirilməsini təmin etmək vəzifəsi Dövlət Komitəsinə həvalə olunub
Redaksiyamıza müraciət edən şikayətçinin sözlərinə görə Komitə əməkdaşlarının tələblərini ödəyə bilməyən xeyli kiçik müəssisə fəliyyətini dayandırmalı olub. Adının çəkilməsini istəməyən bu sahibkar iddia edir ki, bir müəssisə beş çeşiddə mal istehsal eləmək istəyirsə bunun hər birinə ayrı-ayrılıqda uyğunluq sertifikatı almaq tələb edilir. Həmin sertifikatın da hər biri üçün S.Səmədov 1400 manat pul tələb edir. Rüşvətlə bir yerdə gərək müəssisə 10 min manat pul verib işə başlasın. Ona görə də Sabirabad Ərazi Sınaq və Sertifikatlaşdırma şöbəsinin nəzarətində olan Sabirabad. Saatlı, İmişli və Beyləqan rayonlarında istehsal müəssisələrinin əksəriyyəti fəaliyyətini dayandırmaq məcburiyyətində qalır. Sahibkarın dediyinə görə, əvvəllər bir yerə rüsum, rüşvət verilirdisə son bir ildə adı çəkilən komitənin üç xidmətini ayrı-ayrılıqda “görmək” lazım olur.
Onu da bildirək ki, hələ ötən ilin sonlarında Tacirlər və İstehsalçılar birliyinin sahibkarlar arasında keçirdiyi sorğuda da sahibkarlar adı çəkilən Komitənin onların fəaliyyətinə ciddi əngəl törətdiklərini bildirmişdilər.