Maliyyə Nazirliyinin neçə rəhbəri var?;Nazir müavini İlqar Fətizadə özünü nazir kimi aparır
Maliyyə naziri Samir Şərifovun haqqında müxtəlif Kütləvi İnformasiya Vasitələrində (KİV) dəfələrlə tənqidi fikirlər səsləndirilib. Bunların əksəriyyəti isə nazirin ölkənin maliyyə sisteminə nəzarət edə bilməməsi, büdcədən maliyyələşən qurumların işini düzgün qaydada yoxlamaması və digər səbəblərlə bağlı olub. Məlumat üçün qeyd edək ki, Maliyyə Nazirliyi (MN) ölkənin maliyyə siyasətini işləyib hazırlayan və həyata keçirən, dövlət maliyyəsinin idarə olunmasını təşkil edən, dövlət və icmal büdcələrin layihələrini hazırlayan və dövlət büdcəsinin kassa icrasını təmin edən, sığorta fəaliyyəti, dövlət borcunun idarə edilməsi, mühasibat uçotunun təşkili və aparılması sahələrində dövlət tənzimlənməsinin, dövlət büdcəsi vəsaitindən istifadə, qiymətli metalların və qiymətli daşların istehsalı, emalı və dövriyyəsi sahələrində dövlət nəzarətinin həyata keçirilməsini təmin edən mərkəzi icra hakimiyyəti orqanıdır.
Səlahiyyətində geniş vəzifələrin olmasına baxmayaraq, bu gün Maliyyə Nazirliyinin fəaliyyəti bir çoxları tərəfindən razılıqla qarşılanmır. Hakimiyyətin yuxarı təqəbəsində təmsil olunan şəxslərin əksəriyyəti də nazir barəsində müsbət fikirdə deyillər. Yeddi ildir nazir postunda oturan Samir Şərifov düzgün idarəetmə sistemi qurmadığından hazırda nazirliyin yerli şöbələrində qanunsuz hallar göz çıxarır. İstər biz, istərsə də digər mətbuat orqanları bununla bağlı dəfələrlə yazmışıq və ortaya faktlar qoymuşuq ki, hansı maliyyə idarələrində nə kimi qaranlıq işlər cərəyan edir.
Təəssüflər olsun ki, nazir bunların heç birinə reaksiya vermir. Bu səbəbdən də yerli maliyyə idarələrində özbaşınalıq adi hala çevrilib. Dünən etibarlı mənbələrdən əldə etdiyimiz məlumatlara görə, Maliyyə Nazirliyinin rəhbəri Samir Şərifov olsa da, onun müavini İlqar Fətizadə özünü nazir kimi aparır. Bu barədə məlumatlı olan şəxsin bizimlə paylaşdığı xəbərə görə, nazir müavini bəzi məsələlərdə nazirdən məsləhət almır, təkbaşına qərarlar verir və özünü qurumun şefi kimi göstərməyə çalışır: «Nazirlikdə çoxlarına məlumdur ki, İlqar Fətizadənin yaxın adamları ayrı-ayrı maliyyə şöbələrində və nazirliyə tabe olan xidmət və agentliklərdə rəhbər vəzifələrdə işləyirlər. Bu gün problem içində itib-batan maliyyə şöbələrinin bir neçəsinin rəhbəri nazir müavininin kadrlarıdır. Onlar Samir Şərifovun müavininə arxayındırlar və bilirlər ki, nəysə problem yaranacağı təqdirdə sudan quru çıxacaqlar. Bəzi rayonların maliyyə idarələri vəzifələrini qanuni şəkildə icra edə bilmirlər.
Vəzifə səlahiyyətlərini aşaraq bir idarəni ildə beş-altı dəfə yoxlayırlar. Qanun isə bunu qadağan edir. Mövcud qanunvericiliyə görə, büdcədən maliyyə dəstəyi alan idarə və təşkilatlar üç ildən bir yoxlanmalıdır. Nazir müavininin qohumları isə buna əhəmiyyət vermir». Qaynağın iddiasına görə, nazir bu sahədə yaranan problemləri müşahidə etsə də, təqsiri olan şəxsləri cəzalandırmır: «Məndə olan məlumata görə, heç bir müavini, əsasən də İlqar Fətizadə nazirdən zərrə qədər də olsun çəkinmir. Nazirin xəbəri ola-ola qanunsuz işlərə imza atır. Buna baxmayaraq, heç bir danlaq eşitmir. Ona görə ki, o da nazirin qeyri-qanuni əməllərindən xəbərdardır. Nazir ehtiyat edir ki, birdən həyata keçirdiyi işlər barədə müavini kimlərəsə məlumat çatdırar. Bu sahədə yaranan problemlərin əsas səbəblərindən biri də Samir Şərifovun biznesi ilə əlaqəlidir. Yəni nazir bizneslə məşğul olduğu üçün vəzifəsinə aid olan işləri yaddan çıxarıb. Bildiyim qədəri ilə o, xaricdən ölkəyə brilliant və qiymətli daş-qaşlar gətirir. Bundan başqa, Şamaxı rayonunda böyük fermer təsərrüfatı var. Şamaxının Seyid Əzim Şirvani küçəsində üç mərtəbəli ticarət mərkəzi, M.Ə.Sabirin heykəlinin yaxınlığında böyük imarət tikdirib. Bakıda da onlarla mənzili və obyektləri var». Gələn saylarımızda neqativ halların yaşandığı maliyyə idarələri haqqında və nazirin ABŞ-dakı biznesi barədə məlumat verməyə çalışacağıq. Yazı ilə bağlı qarşı tərəflər münasibət bildirmək istəsə, dərc etməyə hazırıq.
Elçin