Renat Yusifov: “Yoxlayıcıları restorana, saunaya və digər yerlərə aparmaq üçün hər birimizdən min manat da yığıldı”
Milli Ordunun sabiq zabiti, hazırda 2 saylı cəzaçəkmə müəssisəsində həbsdə olan Renat Yusifov prezidentə Müdafiə Nazirliyində (MN)büdcə vəsaitlərinin oğurlanması ilə bağlı növbəti məktubla müraciət edib.
Məktub müəllifi həbs olunan günə qədər Şəmkir korpusuna daxil olan 812 saylı hərbi hissənin maliyyə şöbəsinin rəisi olub.
O, prezidentə əvvəlki məktubunda jurnalist, tənqidçi və müxalifətçi olmadığını yazır. Qeyd edir ki, həbsdə olduğu illər ərzində işinə ədalətlə baxılacağı ümidi ilə ən müxtəlif dövlət orqanlarına çoxsaylı müraciətlər edib, amma məmurlardan ədalət görməyib. Bu səbəbdən də mətbuat vasitəsi ilə prezidentə müraciət edib Müdafiə Nazirliyində baş verən qanunsuzluqlar və ədalətsizliklər haqda məlumat vermək məcburiyyətindədir: “Sizdən kömək istəyirəm”.
Sonuncu məktubunda R.Yusifov yazır:
- İstintaqın Müdafiə Nazirliyinin maliyyələşdirmə sistemindəki büdcə oğurluqlarını həyata keçirən mütəşəkkil cinayətkar qrupun başında kimlərin dayanması haqda suala aydınlıq gətirmədiyini yazmışdım. Daha doğrusu istintaq həmin mütəşəkkil cinayətkar qrupun təşkilatçısını müəyən etmək istəməmişdi. Necə ki, 2008-ci ildə Müdafiə Nazirliyi Ümumi Nəzarət şöbəsinin yoxlayıcıları Şəmkir korpusunda maliyyə vəziyyətini yoxlayanda böyük pul oğurluqlarını “görməmişdi”, eləcə də, istintaq qrup rəhbərini “müəyyən edə bilməyib”. Bu cür görməməzliklər və müəyyən edə bilməmələr necə baş verib sualının cavabını Ali baş komandan kimi sizin diqqətinizə çatdırmaq istəyirəm. Keçmiş cinayətkar, artıq islah olunmuş bir məhbus kimi sizin orduya xüsusi diqqətinizi nəzərə alaraq aşağıdakıları qeyd edirəm. 2007-ci ilin fevralında Müdafiə Nazirliyinin baş mühasibi Sənan Eyvazov Maliyə İdarəsinin rəisi əvəzi təyin olundu.
Həmin ilin mart ayında isə Şəmkir korpusuna daxil olan 157 və 130 saylı hərbi hissələrdə hərbi prokurorluq yoxlamalar başladı. Nətəcədə yüz minlərlə manat büdcə pullarının oğurlandığı üzə çıxarıldı. Bu yoxlamalar aparılan zaman Müdafiə Nazirliyi sistemində çalışan bütün maliyyə şöbələrinin əməkdaşları çaşqınlıq və qorxu içində idi. Çünki belə yoxlama bundan əvvəl heç vaxt keçirilməmişdi. Heç kimə də bəlli deyildi ki, növbəti yoxlama hansı hərbi hissədə keçiriləcək. Belə bir vəziyyətdə bütün ümidlər Sənan Eyvazova idi. O bütün hərbi hissələrin maliyyə şöbələrinin rəislərini şəxsən tanıyırdı. Rəisə ildə 3 dəfə ona maliyyə vəziyyəti ilə bağlı hesabat verirdir. Üstəlik onu “hörmət” də olunurdu. Belə “hörmət”in miqdarı 20 manatdan 200 manata qədər olurdu. Azərbaycan reallıqlarında Sənan Eyvazovu demokratik rəis adlandırmaq olardı. Məsələn onun qəbuluna düşmək hər zaman mümkün idi və bütün problemləri açıq şəkildə ona deyib müzakirə edirdik. 2007-ci ilin həmin həyəcanlı günlərində Eyvazovun qəbuluna gələnlərin sayının həddən artıq olması da bununla əlaqədardı. Hamı ondan vəziyyəti dəyişəcək və hamını prokurorluğun yoxlamalarından qurtaracaq qərar gözləyirdi. Sonda belə bir qərar verildi. Sənan Eyvazov bütün hərbi hissələrdə qısa müddətdə maliyyə təftişinin həyata keçirilməsini və sonda bütün maliyyə səbədlərinin məhv olunması qərarını verdi. O bu qərarı verərkən maliyyə sənədlərinin saxlanması, arxivləşdirilməsi haqda normativ aktların, müvafiq qərarların olmamasından istifadə etdi. Belə sənədlərin ləğvini yasaqlayan bircə sənəd SSRİ müdafiə nazirinin köhnəlmiş qərarı idi. Bu məsələnin üstü açılandan və sənədlərin məhv olunmasına görə səs-küy qalxandan sonra Müdafiə Nazirliyinin rəhbərliyi köhnə tarixlə bu sferanı tənzimləyən qərar verdi. Sənədlərin məhvi məsələsinin qığılcımı bütün Silahlı qüvvələrə yayıldı və sənəd yandırılması əməliyyatına qeyri-rəsmi olaraq tonqal adı verildi. Bu əməliyyatdan dərhal sonra prokurorluq 181və 172 saylı hərbi hissələrdə yoxlamalar başladı. Sonradan da məlum oldu ki, prokurorluq bütün yandırılmış sənədlərin bərpa olunmasını tələb edir.
Məktub müəllifi yazır ki, bu tələbdən sonra Müdafiə Nazirliyinin tabeliyindəki hərbi birləşmə və hissələrin maliyyə şöbələrində çalışanlar yenidən təşviş içində S.Eyvazovun qəbuluna gediblər. Ondan məsələnin həll olunmasını istəyiblər. Az sonra isə S.Eyvazov bütün maliyyəçilərə xəbər göndərib ki, məsələ həll olunub və bir daha əvvəlcədən xəbərdarlıq olunmadan heç bir yoxlama olmayacaq. Bunun müqabilində isə bütün maliyyə şöbələrinə 20 min ABŞ dolları yığmaq tapşırılıb:
- Sonradan bu tapşırığa korrektə olundu, yığılan vəsaitin dollarla deyil, manatla verilməsi tapşırığı verildi. Ümumilikdə 1 milyon manat yığıldı. İstintaqçılarla əldə olunan razılığa görə Sənan Eyvazov aydan asılı olaraq onlara 50 və ya 100 min manat verməli idi. Bunun qarşılığında gözlənilməz yoxlamalar olmayacaqdı, plan üzrə yoxlamalar zamanı isə oğurluq faktlarına göz yumulacaqdı. Məhz belə bir razılıq əldə olunandan sonra – 2008-ci ilin mayında Şəmkir korpusunda formal yoxlama həyata keçirildi və heç bir oğurluq faktı müəyyən olunmadı. Yoxlayıcıların bu cür yaxşılığının qarşılığını vermək üçün korpusun baş maliyyəçisi Elşən Əsgərov ona tabe olan şöbə rəislərinin hər birindən 10 min manat pul alıb onlara verdi. Üstəlik yoxlayıcıların restorana, saunaya və digər yerlərə aparmaq üçün hər birimizdən min manat da yığıldı. Qayıdaq 2007-ci ilə. İstintaqçılarla dil tapdıqdan sonra Sənan Eyvazov və Azad Şəfiyev (Müdafiə Nazirliyinin maliyyələşmənin planlanması şöbəsinin rəisi – E.M) heç kimdən çəkinmədən maliyyə oğurluqlarını açıq müstəviyə keçirdilər. Bundan sonra hər bir maliyyə şöbəsinin rəisi çəkinmədən onlarla razılaşıb istədikləri məbləği özləri üçün yazıb götürə bilirdi. Bunun üçün mənimsəniləcək məbləğin 25 faizini onlara əvvəlcədən ödəmək lazım idi. Azad Şəfiyev hər bir hərbi hissənin maliyyə dövriyyəsindən asılı olaraq hər ay 20 min manatdan başlayıb 200 min manata qədər “əlavə” maliyyə vəsaiti ayırırdı. Bu cür qaydalardan hamı razı idi. Təkcə bütün dünyaya qəzəbi olan Elçin Mehdiyevdən (o vaxt Müdafiə Nazirliyi Təftiş və Nəzarət şöbəsinin inspektoru olub, hazırda Müdafiə Nazirliyi Maliyyə və Büdcə İdarəsinin rəis (MBİ) əvəzi- E.M) savayı.
Məktub müəllifi məktublarının davamının olacağını da qeyd edib.

E.MƏMMƏDƏLİYEV

P.S. Renat Yusifovun prezidentə ünvanladığı məktubunda adını çəkdiyi hər bir kəsi dinləməyə, mövqeyini dərc etməyə hazırıq.