Rüşvət videosuna görə yeni qalmaqal gəlir; Sabiq deputat prosesin qapalı keçirilməsində israrlıdır; istintaq materiallarında nələr var?
Sabiq millət vəkili Gülər Əhmədovanın cinayət işi məhkəməyə göndərilib. Baş Prokurorluqdan APA-ya verilən məlumata görə, Əhmədova Gülər Mikayıl qızının Cinayət Məcəlləsinin 178.3.2 (dələduzluq, külli miqdarda ziyan vurmaqla törədildikdə) və 307.2-ci (cinayət barəsində xəbər verməmə və ya qabaqcadan vəd etmədən ağır cinayəti gizlətmə) maddələri ilə təqsirləndirilməsinə dair cinayət işi üzrə istintaq tamamlanaraq sentyabrın 23-də aidiyyəti üzrə baxılması üçün Bakı Ağır Cinayətlər Məhkəməsinə göndərilib.
APA-nın əldə etdiyi məlumata görə, cinayət işi hakim Əlisultan Osmanovun icraatına verilib.
O da bildirilir ki, G.Əhmədovanın məhkəməsinin hazırlıq iclasının keçiriləcəyi tarix bu ayın sonuna qədər açıqlanacaq.
“Yeni Müsavat” isə yekunlaşan istintaq və sabiq deputatın gerçəkləşəcək məhkəməsi barədə istintaq orqanlarından ilginc məlumatlar əldə edib. Belə ki, hələlik G.Əhmədovanın cəmi bir vəkili var. Bu da Əfsər Talıbovdur. Raqif Mustafayevdən imtina edəndən sonra başqa bir vəkillə müqavilə bağlamayan sabiq deputatın müdafiəsində cəmi bir vəkilin olacağı indidən şübhə doğurur.
İstintaq materialları ilə vəkillərdən ancaq Ə.Talıbov tanış ola bilib. R.Mustafayevə G.Əhmədovanın işi ilə bağlı hər hansı sənəd verilməyib. Amma Ə.Talıbovun məhkəməyə çıxması üçün G.Əhmədovanın onunla yenidən müqavilə bağlaması şərtdir. Bunu da istintaq orqanlarından bildirdilər.
Əldə etdiyimiz digər bir məlumatda isə bildirilir ki, hələlik prosesin açıq, yoxsa qapalı keçiriləcəyi ilə bağlı qərar verilməyib. Amma G.Əhmədova prosesin qapalı keçirilməsində israrlıdır. Sabiq deputat bu məsələnin ictimailəşməsinin əleyhinədir. Məhz bu səbəbdəndir ki, aylardır vəkillərinə və ailə üzvlərinə media nümayəndələri ilə ünsiyyəti kəsməyi tapşırıb.
Son qərarın verilməsi isə hakimiyyətin iradəsindən asılıdır. Məhkəmə prosesi çox güman ki, seçkilərdən sonraya təsadüf edəcək. Hakimiyyət seçki sonrası ictimai rəyin fərqli istiqamətə yönləndirilməsi üçün prosesin açıq keçirilməsi ilə bağlı qərar verə bilər.
G.Əhmədovanın istintaq materiallarında isə diqqətçəkən nüanslar çoxdur. Bunlardan biri onun İstanbulda dünyasını dəyişən Sevinc Babayeva ilə sözügedən şəhərə gedəndən sonra skayp vasitəsilə etdiyi danışıqların istintaq materiallarına daxil edilməsidir. S.Babayevanı Türkiyədə himayə edən türkiyəli iş adamı Səlcuq Ağlayanın mobil telefonu vasitəsilə baş tutan danışıqlar, habelə G.Əhmədovanın həyat yoldaşı Fikrət Əhmədovun, oğlu Toğrul Əhmədovun da bu işdəki əlaqələri konkret sübutlarla öz əksini tapıb. Materiallarda F.Əhmədovun İstanbulda qaldığı hotelə S.Babayevanın daxil olması barədə videogörüntülər də var. Bundan başqa, oğlu T.Əhmədovun S.Babayevanın İstanbulda yerləşdirilməsi üçün Türkiyədəki vasitəçilərlə mesajları, habelə S.Ağlayanın Bakı səfəri zamanı bu vasitəçilərlə görüş səhnələri istintaq materiallarına daxil edilib.
Bu arada hakimiyyətin G.Əhmədovaya münasibətdə nisbətən yumşaq davranacağı gözlənilir. Belə ki, bugünlərdə S.Babayevanın zəhərlənməməsi barədə ekspertiza nəticələrinin açıqlanması, S.Ağlayanın S.Babayevanın ölümündə Elşad Abdullayevi suçlaması ilə bağlı bəyanat verməsi gözlənilən “humanizm” üçün zəmin hazırlayır. Buna səbəb isə G.Əhmədovanın həbsindən sonra hakimiyyətin göstərişindən kənara çıxmaması, özünü ssenariyə uyğun aparmasıdır.
Yaddan çıxarmaq olmaz ki, G.Əhmədovanın məhz bu işdə adı hallandırılan oğlu Toğrul Əhmədov anasının həbsindən əvvəl hərbi xidmətə aparılmış, bununla da sonuncunun danışmaq, hakimiyyəti ifşa etmək şansları minimuma enmişdi. Bundan başqa, elə hərbi xidmətdə olan vaxt T.Əhmədovun qolunun qırılması da təsadüf sayılmazdı. Hər nə qədər bunu təsadüfi qəza ilə izah etsələr də, həmin ərəfədə G.Əhmədovanın istintaqa ifadə verdiyi heç kimə sirr deyil.
Həyat yoldaşı F.Əhmədovun adının isə bu işdə çəkilməsinə baxmayaraq, hələ də azadlıqda olması iqtidarın bu məsələdə G.Əhmədova ilə anlaşmaya getdiyini göstərən detallardandır.