Qazax DYP əməkdaşının güllələnməsinin pərdəarxası məqamları; Cinayətin gizlədilməsində iki yüksək vəzifəli məmurun adı hallanır

Bir neçə gün bundan əvvəl kütləvi informasiya vasitələrində Qazax rayonunda baş vermiş bədbəxt hadisə barədə məlumatlar yayımlanmışdı. Məlumatlarda bildirilirdi ki, yol polisi əməkdaşının əlində olan şəxsi silahının açılması nəticəsində güllə həmin əməkdaşın özünə dəyərək onu qarın nahiyəsindən yaralayıb. Rəsmi məlumatda bildirilirdi ki, hadisə nəticəsində Baş Dövlət Yol Polisi İdarəsinin zabiti, Bakı-Qazax magistral yolunda xidmət edən 47 yaşlı Malik Qəhrəmanov silahla ehtiyatsız rəftar etməsi səbəbindən özünə atəş açıb. Güllə polis əməkdaşının qarın nahiyəsinə dəyib. Dərhal Qazax rayon Müalicə Diaqnostika Mərkəzinə yerləşdirilən zabitə tibbi yardım göstərilib. Vəziyyətinin ağır olduğu nəzərə alınaraq polis əməkdaşı Bakı şəhərində daxili işlər orqanlarının əməkdaşları üçün fəaliyyət göstərən hospitala aparılıb.
Hadisə ilə bağlı dünən redaksiyamıza ilginc məlumatlar daxil olub. Məlumatı təqdim edən mənbə Qazax rayon Polis Şöbəsindən KİV-ə verilən məlumatın həqiqətə uyğun olmadığını iddia edir. Mənbə bildirir ki, Malik Qəhrəmanov heç də özü özünü yaralamayıb. Aldığımız məlumatda hadisəni törədən şəxsin diğər bir DYP əməkdaşı, polis serjantı Tural Hacıyev olduğu qeyd olunur. Mənbə bildirir ki, hadisə bu iki şəxsin bir süfrə arxasında oturaraq yeyib-içdikləri zaman baş verib. Spirtli içki qəbul edən polis əməkdaşları arasında mübahisə yaranıb. Bu zaman Malik Qəhrəmanova məxsus tabel silahı masanın üzərində olub. Fürsətdən istifadə etmək qərarına gələn Tural Hacıyev isə həmin silahı götürərək Malik Qəhrəmanovu güllələyib.
Daha sonra isə məlumatda Qazax rayon Polis Şöbəsi tərəfindən hadisəyə dair KİV-ə səhv informasiya ötürülməsinin səbəbləri barədə maraqlı açıqlamalar verilir. Qeyd olunur ki, Tural Hacıyev Bakı Apellyasiya Məhkəməsinin hakimi İlqar Murğuzovun yaxın qohumudur. Baş vermiş hadisədən dərhal xəbər tutan İ.Murğuzov qohumunu məsuliyyətdən qurtarmaq məqsədilə təcili tədbirlərə əl atıb. Bunun nəticəsində isə cinayət hadisəsi ictimaiyyətə bədbəxt hadisə kimi təqdim olunub. Məlumatda bu da qeyd olunur ki, Malik Qəhrəmanov ilkin olaraq faktların təkzib olunmasına qarşı çıxıb. Lakin Tural Hacıyevin qohumlarının təkidi, İlqar Murğuzovun nüfuzu və ən əsası da vəd olunan külli-miqdarda maddi kompensasiya sonda Malik Qəhrəmanovu fikrini dəyişməyə razı sala bilib. Bizə daxil olan məlumata görə T.Hacıyev həm də Respublika DYP-sinin yüksək vəzifəli zabiti Elcan Haciyevin yaxın qohumudur və onun da məsələyə müdaxiləsi hüquq-mühafizə orqanlarının loyallığında rol oynayıb.
Digər tərəfdən isə baş vermiş hadisənin olduğu kimi icraata alınaraq istintaqın başlanması, nəticə etibarı ilə yaralanaraq zərərçəkmiş qismində çıxış edəcək M.Qəhrəmanovun özü üçün də əlverişli deyil. Belə ki, istintaqın gedişində yaralı zabitin özünə qarşı bir çox suallar yarana bilər. İlk növbədə Malik Qəhrəmanov tabel silahının başqasının əlinə keçməsinə necə şərait yaratdığına dair xoşagəlməz izahatlar vermək məcburiyyətində qalacaq. Daha sonra xidmət saatlarında tabeliyində olan Tural Hacıyevlə içki məclisi qurmasına aydınlıq gətirməli olacaq. Yox, əgər hadisə xidmət zamanında baş verməyibsə, bu zaman Malik Qəhrəmanovdan tabel silahını ümumiyyətlə hansı səbəbdən özündə saxladığı soruşula bilər. Təbii ki, bu insident ən azından hər iki polis əməkdaşının hüquq mühafizə orqanlarında bundan sonrakı xidmətlərini mümkünsüz edə bilər. Göründüyü kimi M.Qəhrəmanovu “barışığa” vadar edən arqumentlər kifayət qədər ciddidir. Buna görə də ictimiyyətdən gizlədilən, hətta rəsmi sənədlərə də yanlış qeyd olunan hadisənin uzun müddət gizli saxlana biləcəyini düşünmək olmaz.

Tural