Dünən baş tutmalı olan hazırlıq iclası niyə keçirilmədi?
Hazırda həbsdə olan sabiq deputat Gülər Əhmədovanın cinayət işi üzrə keçiriləcək məhkəmə prosesinin 30 sentyabr tarixinə təyin olunan hazırlıq iclası baş tutmadı. Halbuki sentyabrın 27-də Bakı Ağır Cinayətlər Məhkəməsindəki mənbədən APA-ya hazırlıq iclasının sentyabrın 30-na təyin edildiyini bildirmişdilər. Bundan başqa, bu mövzuya bələd olan bəzi ekspertlər də prosesin sözügedən tarixdə baş tutacağını təsdiqləmişdilər.
Saat 10.30-da baş tutacağı gözlənilən proses üçün saat 10.00-dan etibarən məhkəmənin qarşısına toplaşan jurnalistlər sürprizlə qarşılaşdılar. Hamı - həm məhkəmə nəzarətçiləri, həm də qapıda dayanan nəzarətçi sentyabrın 30-da G.Əhmədovanın məhkəməsi olmayacağını bildirdi. “Bu gün (dünən) Gülər Əhmədova bura gətirilsəydi, xəbərimiz olardı”. Cavab təxminən belə idi.
Bu arada xatırladaq ki, məhkəmə binasının qarşısında G.Əhmədovanın hər hansı yaxını, qohum-əqrəbası gözə dəymirdi. Özünü hüquq-müdafiə təşkilatının əməkdaşı kimi təqdim edən bir nəfər isə G.Əhmədovanın həyat yoldaşı Fikrət Əhmədova telefon açaraq məhkəmə ilə bağlı məlumat almaq istədi. F.Əhmədov həmin şəxsə bildirdi ki, onların məhkəmə barədə hər hansı məlumatı yoxdur.
Jurnalistlərin qeyri-müəyyən vəziyyətdə məhkəmə binasının qabağında gözlədikləri vaxt isə G.Əhmədovanın yeganə vəkili olan Əfsər Talıbov orada göründü. Əməkdaşımızın ona yaxınlaşaraq “Əfsər bəy, Gülər Əhmədovanın məhkəməsi bu gün baş tutacaqmı?” sualına cavab olaraq vəkil “gedin onu ”Yeni Müsavat"dan soruşun, onlar hər şeyi bilirlər" deyə istehzalı cavab verərək uzaqlaşdı. Daha bir jurnalist isə ondan israrla məhkəmə vaxtını soruşanda Ə.Talıbov bildirdi ki, onda bu barədə məlumat yoxdur: “Məhkəmə tarixi dəqiqləşsə, bu barədə bizə bildiriş göndərəcəklər. Hələ ki bildiriş gəlməyib”.
Bu arada Bakı Ağır Cinayətlər Məhkəməsinin Qəbul Şöbəsindən bizə bildirildi ki, cinayət işi üzrə hazırlıq iclası oktyabrın 21-də keçiriləcək. Bu məlumatı alandan sonra demək olar ki, məhkəmənin bütün işçiləri onu təkrarlamağa başladı: “Gedin, proses ayın 21-də olacaq, bu gün burda heç kimi gözləməyin”.
Hətta bəzi məhkəmə nəzarətçiləri jurnalistlərin yanına gəlib “vallah, billah, anamın canı üçün bu gün Gülər Əhmədovanın məhkəməsi olmayacaq” deyib and-aman edirdilər. (Məhkəmə binasından hazırlanan və musavat.com saytında yayımlanan videosüjetdə bu detalar öz əksini tapıb-S.T)
Gün ərzində bir neçə dəfə dəqiqləşdirmə aparsaq da, G.Əhmədovanın məhkəməsinin baş tutmadığı bildirildi.
Amma hesab edirik ki, jurnalistləri bu cür məhkəmə tarixi ilə bağlı yanıltma cəhdləri səbəbsiz deyil. Məhkəməsini qapalı keçirməyə cəhd edən, amma hüquqi baxımdan buna imkanı olmayan G.Əhmədova və təbii ki, hakimiyyət prosesin maksimum səs-küysüz, jurnalistlərin gözündən uzaq baş tutmasına çalışır. Bundan başqa, sentyabrın 24-də hakimin icraatına verilən işin hansı səbəbdən az qala bir ay sonra - oktyabrın 21-ə təyin edilməsi də bir başqa söhbətin mövzusudur. Jurnalistlər ehtimal edir ki, G.Əhmədovanın məhkəməsini medianın işıqlandırmaması üçün onun tarixi ilə bağlı belə təzadlı xəbərlər yayırlar.
Xatırladaq ki, fəaliyyəti dayandırılmış Azərbaycan Beynəlxalq Universitetinin sabiq rektoru Elşad Abdullayevin ötən ilin sentyabrında yaydığı qalmaqallı videodan sonra Gülər Əhmədova mandatından imtina edib. Fevralın 13-də isə G. Əhmədova barəsində həbs-qətimkan tədbiri seçilib. Bundan sonra həmin müddət iki dəfə artırılıb.
G. Əhmədova Cinayət Məcəlləsinin 178.3.2-ci (etibardan sui-istifadə etməklə özgənin külli miqdarda əmlakını ələ keçirmə) və 307.1-ci (ağır və ya xüsusilə ağır cinayətin hazırlanmasını və ya törədilməsini bilərək həmin cinayət barədə xəbər verməmə ) maddələri ilə təqsirləndirilir.
G.Əhmədovanın cinayət işi üzrə ibtidai istintaq yekunlaşaraq baxılmaq üçün Bakı Ağır Cinayətlər Məhkəməsinə göndərilib. Cinayət işi hakim Əlisultan Osmanovun icraatına verilib.