Sabiq nazir «AST Telman»la biznes planları qurur

Uzun illər Azərbaycanda müxtəlif sahələrə maraq göstərən və investisiya qoymaq istəyən «AST Telman» kimi məşhur olan Telman İsmayılov həmişə bu niyyətini həyata keçirməkdə problemlərlə üzləşib. Daha doğrusu, məşhur biznesmenin hər dəfə bu cür cəhdləri sonradan nəyə görəsə səmərəsiz qalıb.
Məsələn, ötən ilin fevralında qəzetlərdən biri yazırdı ki, yəhudi əsilli azərbaycanlı milyarder Azərbaycanda iri biznes layihələrinə yatırım qoymaq üçün hökumətdəki müəyyən çevrələrlə danışıqlar aparır. Biznes dairələrindəki məlumatlı mənbənin bildirdiyinə görə, o, Rusiyada fəaliyyətini məhdudlaşdırdıqdan sonra kapitalının bir hissəsini ölkəmizə yönəldib. «Telman İsmayılovun artıq bir neçə iri biznes layihəsini başlatdığı, lakin iş adamının bu layihələri gizli saxlamaqda maraqlı olduğu bildirilir» deyə vurğulanıb. Amma sonradan bu istiqamətdə yeni heç bir bilgi ortaya çıxmadı və bu da bir çoxlarında belə bir qənaəti bir daha möhkəmləndirdi ki, növbəti dəfə "AST Telman"ın Bakıda biznes qurması əngəlləndirilib. Bu ilin yazında isə Telman İsmayılovun Azərbaycanda «futbol biznesi»nə girişmək istədiyi, hansısa klubun sponsorluğunu üzərinə götürməyə can atdığı və bu vasitə ilə də sonradan ölkəmizdə biznes imkanlarını genişləndirməyi hədəflədiyi yönündə xəbərlər yayıldı. Sonradan bu istiqamətdə də heç bir dəyişiklik baş vermədi, əvvəlki illərdə olduğu kimi, tanınmış milyarderimizin niyyəti yenə də hansısa səbəblər ucbatından reallaşmamış qaldı. Bəzi müşahidəçilərin fikrincə, bu, Telman İsmayılova etimadsız münasibətlə bağlıdır. Yəni onun siyasi səhvlərə yol verməsi istisna edilmir. Məsələn, tanınmış milyarder Rusiyada hakimiyyətin qəzəbinə tuş gəlməsi, özünü həddən artıq güclü hesab etməyə başlaması və "yüksəkdən uçmağa" cəhd etməsi ilə əsaslandırılır. Analoji səhvlərə Telman İsmayılovun Azərbaycanda da yol verməyəcəyinə isə təminat yoxdur. Daha bir maraqlı iddia isə vaxtilə bizim hökumətdə önəmli vəzifə tutmuş, amma sonradan vəzifədən alınmış bir çox sabiq məmurlarla isti münasibətləri haqqındadır. Bildirilir ki, belə sabiqlərin bəziləri ilə «AST Telman»ın yaxın münasibətlər saxlaması vaxtilə onlarla hakimiyyətdaxili toqquşma şəraitində olan və hələ də vəzifəsində qalan bir çox iri məmurları qıcıqlandırır. Bu xüsusda sabiq iqtisadi inkişaf naziri Heydər Babayevin adını çəkmək olar. Məlumata görə, «AST Telman» la Babayevin səmimi münasibətləri var, onlar bir-birlərinə hədsiz ehtiram və etibarla yanaşırlar. Bu da bəzi şəxsləri narahat edir. Son nəticədə isə onlar adıçəkilən azərbaycanlı milyarderin ölkəmizdə biznes yatırımı ilə məşğul olmasına sıcaq yanaşmırlar.
«AST Telman» la Heydər Babayevin münasibətlərindəki yaxınlıq və səmimiyyəti sabiq iqtisadi inkişaf nazirinin indiyədək ən azı iki dəfə Türkiyənin Antalya şəhərində dünyanın ən bahalı hotellərindən biri olan, Telman İsmayılova məxsus "Mərdan Palace"da qonaq olması da təsdiqləyir. Bir xeyli əvvəl isə sabiq iqtisadi inkişaf nazirinin qardaşı, "Qara Yaşar" ləqəbi ilə tanınan Yaşar Heydərovun da " Mardan Palace"də dincəldiyi xəbəri yazılmışdı. Bu isə sabiq nazirin milyarderlə yaxın münasibətlərinin olduğu, hətta işgüzar əlaqələrinin belə ola biləcəyi yönündə səslənən iddialarda həqiqət payının varlığına inanmaq üçün əsas verir. Əlbəttə, İsmayılovun Azərbaycanda biznes qurmaq və onu genişləndirmək niyyətinin illərdən bəridir təxirə düşməsində bu amilin rolunun nə qədər olduğunu birmənalı demək də çətindir. Vəziyyəti ümumi şəkildə analiz etsək, keçmiş nazirin «AST Telman» vasitəsilə Türkiyədə geniş biznes quracağı da istisna edilmir.

Malik