Bu gün Milli Məclisdə “Şəhərlərin formalaşmasında hüquq bir alət kimi” mövzusunda dəyirmi masa keçirilib.

Virtualaz.org modern.az-a istinadən xəbər verir ki, dəyirmi masa Azərbaycan parlamenti və Almaniya Beynəlxalq Əməkdaşlıq Cəmiyyətinin (GİZ) “Cənubi Qafqazda məhkəmə və hüquq islahatlarının dəstəklənməsi” proqramı çərçivəsindəı baş verib. İclasda Milli Məclis Aparatının inzibati və hərbi qanunvericilik şöbəsinin müdir müavini Səyyad Kərimov, Dövlət Şəhərsalma və Arxitektura Komitəsinin sədr müavini Dövlətxan Dövlətxanov, Fövqəladə Hallar Nazirliyinin, şəhər və rayon icra hakimiyyətlərinin nümayəndələri, Ali Məhkəmə və Apelyasiya məhkəmələrinin hakimləri və Almaniyadan nümayəndələr iştirak edib.

S.Kərimov çıxış edərək bildirib ki, iclasın mahiyyəti Şəhərsalma və Tikinti Məcəlləsinin hazırlanması və tətbiqi ilə bağlıdır: “Son illər ərzində Azərbaycanda davamlı olaraq hüquqi islahatlar həyata keçirilir. Bunlardan biri də inzibati sahədir ki, dövlət-vətəndaş münasibətlərinin tənzimlənməsində mühüm sahədir. Prezidentin göstərişi ilə Şəhərsalma və Tikinti Məcəlləsi hazırladıq. Bu məcəllənin hazırlanmasında beynəlxalq təcrübədən istifadə olunub və beynəlxalq ekspertlərlə birlikdə işlənilib. Bizim məqsədimiz Şəhərsalma və Tikinti Məcəllənin tətbiqindən bir il sonra meydana çıxan problemlərin həlli yollarının axtarılması və bununla bağlı beynəlxalq ekspertlərin rəylərini almaqdır”.

Almaniya və Beynəlxalq Əməkdaşlıq Cəmiyyətinin “Cənubi Qafqazda məhkəmə və hüquq islahatlarının dəstəklənməsi” proqramının Azərbaycan üzrə layihə rəhbəri Tomas Melser bildirib ki, keçən müddət ərzində bu qanunun icrasında bir qədər lənglik olub, problemlər ortaya çıxıb:

“Hüquq komitəsinin sədri Əli Hüseynli ilə danışarkən o, problem barədə öyrənib və bildirib ki, sənədin icrası ilə bağlı narahatçılıq var. Milli Məclisin Aparat rəhbəri Səfa Mirzəyev isə mənimlə danışarkən bildirib ki, bu qanun beynəlxalq standartlara uyğun hazırlanmalıdır ki, nümunəvi qanun olsun. İndi əsas məqsəd bütün maraqları nəzərə almaqla qanunun icrasını təmin etməkdir. Əsas məsələ şəhərin özünəməxsusluğunu qoruyub saxlamaqdır. Bu, inzibati qaydada həyata keçirməlidir".

S.Kərimov bildirib ki, Məcəllədəki prinsiplərdən biri ərazinin məskunlaşdırılmasıdır: “Ərazilərin planlaşdırılmasında ictimaiyyətin iştirakının olması, əhaliyə kifayət qədər məlumat verilməsi çox əhəmiyyətli məsələdir. Ərazinin planlaşdırılması məsələsində maraqlı şəxslərin hüquqlarının qorunması üçün lazımi tədbirlər görülməlidir. Məcəllə qəbul edildikdən sonra ərazi planlaşdırılması ilə bağlı kifayət qədər problem var. Bu problem kadr resurslarının və sənədlərin hazırlanması ilə bağlıdır. Bizim üçün həssas olan bu problemlərin həlli istiqamətində Məcəllə mühüm rol oynaya biləcək”.

S.Kərimov qeyd edib ki, ictimai istifadə üçün nəzərdə tutulan sosial obyektlərdə mühüm problemlər var: “Məsələn, yaşlı, ahıl və əlil insanlar bu obyektlərdə sərbəst hərəkət edə bilmirlər. Əlillərin yolun bir tərəfindən o birinə keçməsi, səkilərdə nəqliyyata minməsi, metroya düşməsi və yerüstü obyektlərdən istifadə imkanları yoxdur. Bundan sonra sosial obyektlərin tikintisində belə hallar nəzərə alınmalıdır. Ölkə ərazisində hərəkət çevikliyinin təmin edilməsi mühüm məsələdir.

Şəhərsalma və Tikinti Məcəlləsində dövlət və bələdiyyəçilik də nəzərə alınıb. Tikintiyə icazə ilə bağlı islahatlar apardıq. Tikintinin istismara qəbul edilməsi institutu ləğv edilərək, Tikintiyə İcazə İnstitutu yaradıldı”.