Əhliman Abbas növbəti dönəm üçün Gənclər Təşkilatına rəhbərlik edəcək...
Noyabrın 17-də Müsavat Partiyası gənclər təşkilatında yeni sədr seçkiləri keçirildi. Müsavatın gənc fəalı, partiya başqanının həbsdə olan müavini Tofiq Yaqublunun qızı Nərgiz Yaqublu tədbiri açıq elan etdi. O, əvvəlki seçkidə bəzi texniki qüsurlar olduğunu xatırladaraq nəticələrin ləğv edildiyini qeyd etdi.

Nərgiz Yaqublu bu seçkilərdə seçici siyahısında 105 müsavatçı gəncin iştirak etdiyini, 6 nəfərdən ibarət say komissiyası olduğunu vurğuladı.

Sədrliyə namizədlərdən biri Əhliman Abbas partiya daxilində həmişə şəffaf seçimlər keçirildiyini, 100 illik tarixi olan partiyada gənclər təşkilatı sədri vəzifəsinin məsuliyyətli iş olduğunu qeyd etdi, bu ağır məsuliyyətin altına girməyə hazır olduğunu dedi: “Ölkə daxilində və beynəlxalq miqyasda var gücümüzlə işləyəcəyimizə inanıram. Müsavat gəncləri olaraq hədəflərimizə çatmaq üçün birlikdə hərəkət etməliyik. Müsavat 100 illik tarixi olan partiyadır. Bu yolu davam etdirmək bizim borcumuzdur”.

Digər namizəd Rüfət Hacıbəyli söylədi ki, qürurlu və həlledici bir gündür: “Biz Məmməd Əminin, Cəfər Cabbarlının, Əhməd Cavadın Müsavatının üzvüyük. Bu illərdə ağır sınaqlardan keçmişik. Həbslər, repressiyalar. azadlıq uğrunda mübarizəyə bir gün ara verməmişik. 2003-cü ildən Müsavatın üzvüyəm. Partiyanın ən çətin günlərində ön cərgədə olmuşam. Biz ailəvi müsavatçıyıq, seçki təbliğatlarında, bütün aksiyalarda fəal iştirak etmişik. 2011-ci ildən başqanın gənclər üzrə müşaviriyəm, 2 aprel məhbusuyam. Həm həbsdə, həm azadlıqda adını Müsavata layiq daşımışıq. Seçilib-seçilməsəm də müsavatçı olaraq qalacam. Rəsulzadə-Elçibəy yolunda mücadiləmizi davam etdirəcəyik”.

Üçüncü namizəd Nurlan Əliyev çıxışında namizədliyini geri götürdüyünü açıqladı. O, bu addımı namizəd Rüfət Hacıbəylinin xeyrinə atdığını söylədi. N.Əliyev R.Hacıbəylinin mübarizliyini, fədakarlığını qeyd edərək sədrliyə onu layiq bildiyini bəyan etdi: “Rüfət bəyin bu vəzifəni layiqincə davam etdirəcəyinə inanıram. O, meydanlarda, həbsdə, çıxışlarında öz fədakarlığı ilə seçilib. Namizədliyimi onun xeyrinə geri götürürəm”.

Ardınca qapalı səsverməyə gedildi. Səsvermənin nəticələri elan ediləndə bəlli oldu ki, Əhliman Abbas Müsavat Partiyası Gənclər Təşkilatının sədri seçilib.

“Bizim bundan sonrakı əsas hədəflərimiz təşkilatı məsələlər və beynəlxalq əlaqələri genişləndirmək olacaq. Partiyada üzvlərinin sıralarını genişləndirmək üçün əlimizdən gələni edəcəyik. Eyni zamanda beynəlxalq əlaqələri möhkəmləndirməliyik. Beynəlxalq münasibətlərdə irəliyə doğru addımlar atmalıyıq. Əlaqələrimiz olmayan təşkilatlarla münasibət qurmalıyıq”.

Bu sözləri seçkidən dərhal sonra qəzetimizə açıqlamasında Müsavat Gənclər Təşkilatının yeni sədri Əhliman Abbas bildirdi. O qeyd etdi ki, ölkə daxilində gənclər təşkilatları ilə əlaqələri gücləndirmək lazımdır: “Məqsədimiz demokratik hərəkata maksimum dərəcədə töhfə verməkdir. Mən bu günə kimi müsavatçı gənc olaraq bir çox tədbirlərdə, aksiyalarda iştirak etmişəm. Ancaq indi üzərimə daha böyük bir məsuliyyət düşür və bir yerdə gənclər təşkilatının fəaliyyətinin daha da gücləndirəcəyik”.

Arayış üçün bildirək ki, Əhliman Abbas 2010-cu ildə parlament seçkilərinin nəticələrinə etiraz olaraq, tələbə kimi Müsavat Partiyasına üzv olub. Partiyanın tədbirlərində, aksiyalarında iştirak edib. Azərbaycan Dövlət İqtisad Universitetində, sonra İngiltərədə təhsil alıb.

Yeni sədri təbrik edir, ona uğurlar arzu edirik.

Fotolar: Məhəmməd Türkmən, Emil Salamoğlu