O, yeni ticarət mərkəzi tikdirir, “Karvan”da “yanan” xırda ticarətçilər isə...

“Ticarət mərkəzinin sığortası vardı. Həmin yanğın hadisəsindən bir neçə gün sonra sahibi 3 milyon manat sığortasını aldı, elə yaxınlıqda birini də tikir. Vay bizim halımıza...”

Bunu Sumqayıtdakı “Karvan” ticarət mərkəzindəki yanğından əziyyət çəkən xırda sahibkarlar deyir. Onların sözlərinə görə, yanğından bir ay ötdü. Yanmış “Karvan” ətrafında bir ayda nələr baş verdi?

Ticarət mərkəzində mağazası olmuş xırda sahibkarlar virtualaz.org saytının müxbirinə ünvanladıqları şikayətlərində deyirlər ki, banklardan götürdükləri kreditlərin aylıq ödənişləri bir neçə aylığa dondurulub. Ancaq onlar bu don açıldıqdan sonra vəziyyətlərinin daha da ağırlaşacağını bildirirlər.

“Karvan”da böyük geyim mağazalarından olmuş “Murassimo”nun və daha bir neçə kiçik geyim mağazalarının sahibi Muxtar İsgəndərzadənin sözlərinə görə, ən böyük zərər “Murassimo”ya dəyib - 320 min manat.

Qalan mağazalara da xeyli zərər dəyib - ümumi zərər 700 min manat civarındadır.

Banklardan götürdüyü kreditlərin aylıq ödənişləri dondurulsa da Muxtar İsgəndərzadəni 4-5 aydan sonrakı vəziyyət narahat edir: “Ödənişlər 4-5 aylığa dondurulub. Bu isə çıxış yolu deyil. Yəqin ki, mart ayından banklar qapılarımızı döyməyə başlayacaqlar. Üstəlik, indi dondurulmuş aylıqlarımız 4-5 aydan sonra ödəməyə başlayacağımız borclara əlavə ediləcək və gələcək borclarla yanaşı hazırkı borcları da ödəyəcəyik. “Karvan”ın sahibi sığortasını aldı və yeni bazar tikir. Biz isə evlərimizi də banklarda girov qoymuşuq. Şəxsən mənim 700 min manatlıq malım yanıb”.



“Karvan”dakı mağazalarda alver edənlər mallarını sığortalatmamışdılar. Bu üzdən də onlara dəyən zərər ödənilməyəcək.

Ticarət mərkəzində xırda ticarətçilərdən olmuş və yanğından 160 min manat zərər çəkmiş Eldar Babayev deyir ki, iki qoçun buynuzlaşması xırda ticarətçilərin başında çatlayıb: ““Karvan”ın sahibi icra başçısı ilə dolanmırdı, icra başçısı da sahibkarın ad günündə “Karvan”dakı yanğını ona “sürpriz” elədi. Sahibkara nə var ki... Birini də tikir. Zərbə bizə dəydi. Başçı sahibkarı yox, bizi pis vəziyyətdə qoydu. Evim bankda girovda, özüm də boğaza qədər borcun içində. Ailə üzvlərimə də demişəm, banklar dirəniş göstərsələr, özümü öldürəcəyəm. Bundan əvvəlsə bütün xarici səfirliklərə gedib məmurlarla sahibkarlar arasında yemə çevrildiyimizi yazıb qoyacam”.

“Karvan”ın sahibi AğamirzəƏhədov yanğından bir-iki gün sonra ticarət mərkəzinin ikinci mərtəbəsində mağazaları yanmış xırda ticarətçilərlə görüş keçirmişdi. Onlara əlindən gələn köməyi edəcəyini bildirmişdi. Ancaq ticarətçilər deyirlər ki, sahibkarı sonuncu dəfə elə yanğından iki gün sonra görəndirlər. Özünü görə bilməsələr də sorağını hər gün eşidirlər - sığortasını alıb, tikintisi ilə məşğuldur...

Bir sözlə, yanğından bir ay ötdü, sahibkarın başı yeni ticarət mərkəzinin tikintisinə qarışdı. Deyəsən, vəd də yaddan çıxdı...