Asılmış vəziyyətdə aşkarlanan bankirlə bağlı yeni xəbər
“Bank of Baku”nun Əməliyyat Mərkəzinin şöbə müdiri Rauf Abdullayevin müəmmalı intiharı ilə bağlı araşdırmalar davam edir. İstintaqçılar R.Abdullayevin hansı səbəbdən intihar etməsini aydınlaşdırmağa çalışırlar. İstintaqa yaxın mənbədən “Yeni Müsavat”a daxil olan məlumata görə, R.Abdullayevi tanıyan şəxslər dindirilərkən onun hər hansı bir problemi olması müəyyən olunmayıb. Mənbə R.Abdullayevin özünü asmağa hazırlaşması fikrini yaradan daha bir məqamın müəyyən edildiyini deyib: “Rauf Abdullayevin meyiti asılmış vəziyyətdə aşkarlanandan sonra istintaqçılar onun əynindəki geyimin cibindən özünün fotosunu tapıblar. Həmin fotonun arxasında ”qəbirimin üstünə bu fotomu vurdurarsız" sözləri yazılıb".

Mənbə bildirib ki, R.Abdullayevin meyitinin aşkarlandığı qazanxana işçisi də dindirilib: “Həmin işçi istintaqçılara deyib ki, Rauf Abdullayevi hadisədən az əvvəl çalışdığı bank binasının damında görüb. Səhər saat 7-8 radələrində Rauf Abdullayevin binanın damında gəzməsinə təəccüblənən şahid heç bir söz demədən qazanxana binasına girib. Az sonra isə qazanxanaya çəkilmiş əsas qaz borusundan bir nəfərin asılmış vəziyyətdə tapılmasını eşidib. Ora gedəndə bu şəxsin bir qədər əvvəl damda olan Rauf Abdullayev olduğunu görüb”.

Mənbə bildirib ki, istintaq hazırda bir neçə versiya üzərində işləyir: “Belə məlumatlar olub ki, Rauf Abdullayevin çalışdığı banka 90 min manat borcu olub. Bu məlumatın nə dərəcədə doğru olması nəzərdən keçirilir. Rauf Abdullayev maddi baxımdan çətinlik içində yaşayan olmayıb. Bu gün də ona məxsus bahalı avtomobil bank binası qarşısındadır. Həmin maşının 90-100 min manat qiyməti olduğu da deyilir. Yəni bu şəxsin maddi sıxıntı üzündən intihar etməsi inandırıcı görünmür. Buna görə də istintaq hər bir məlumatı diqqətlə araşdırır”.

Qeyd edək ki, noyabrın 20-də səhər tezdən Nərimanov rayonu, Ağa Nemətulla küçəsi 63/65 ünvanda yerləşən “Bank of Baku”nun Əməliyyat Mərkəzinin yerləşdiyi binanın arxasında qaz borusundan asılmış kişi meyiti aşkarlanıb. Məlum olub ki, asılmış vəziyyətdə meyiti aşkarlanan şəxs uzun illər bankın “Problemli kreditlər şöbəsi”nin müdiri vəzifəsində çalışan 1956-cı il təvəllüdlü Rauf Abdullayevdir. Onun həyat yoldaşı yoxdur. 1 qızı var və o, ailə həyatı quraraq ayrı mənzildə yaşayır. Mərhum hər gün işdən qayıdandan sonra qızı ilə danışarmış. Noyabrın 19-da isə belə olmayıb. Buna görə də R.Abdullayevin kürəkəni bütün tanışlarından onu xəbər alıb. Lakin kimsə R.Abdullayevin işdən çıxaraq hara getməsi haqda məlumatlı olduğunu deməyib. Bundan sonra onun kürəkəni hüquq mühafizə orqanlarına üz tutub və R.Abdullayevin meyiti aşkar edilib.
Hazırda faktla bağlı Nərimanov Rayon Prokurorluğunda Cinayət Məcəlləsinin 125-ci - özünü öldürmə həddinə çatdırma maddəsi ilə araşdırma aparılır. Cinayət işinin araşdırılmasında Baş Prokurorluğun Ağır Cinayətlərə Dair İstintaq İdarəsi müstəntiqlərinin də iştirak etməsi haqda məlumatlar var.
Xatırladaq ki, bu intihar Azərbaycanın bank sektorunda ilk deyil. Ötən ilin bu günlərində Azərbaycan Sənaye Bankının şöbə müdiri, 33 yaşlı Seymur Səmədov itkin düşmüşdü. Sonradan onun meyiti Xəzər dənizində aşkarlandı. Bu günə qədər S.Səmədovun müəmmalı ölümünün səbəbi ictimaiyyətdən gizli saxlanılır.