Saray qəsəbəsi korrupsioner məmurların girovuna çevrilib

Demokratik cəmiyyətlərdə belə bir ənənə var. Kişi məsul bir posta gəlir. İmanı qarşısında and içir, sonra papağını qoyur stolun üstünə və başlayır adam kimi işini görməyə. Ölkəsinə, xalqına vicdan və ləyaqətlə xidmətini edir, sonra da çıxır gedir balıq tutmağa, ov ovlamağa, golf oynamağa vs. Hətta işə velosipedlə gəlməyi belə “ictimai qınaq” nöqtəsinə çevrilmir. O ki qaldı, bir ətək pul verib posta gətirilməyə, bu baş tutmadıqda aldığı borcu geri ödəyə bilmədiyindən özünə qəsd etməyə, (bu tip intaharlar haqqında dəfələrlə yazmışıq) verilən “vəd” baş tutduqda isə vəzifəsini sui istifadə edərək “qaz vurub” “qazan doldurmağa”, vəzifəyə olan “işgüzar” məhəbbətindən kreslosuna kök salmağa bax, onda fələyin çarxına kəf gəlinir!
YAP yığınağının dediyinə görə dövlətimiz günü-gündən güclənir, çiçəklənir, hətta gülünün ətrini digər dövlətlərə də qondurur, dünyanın dörd bir yanında bağ salır, müvafiq “tələblər” qarşısında xeyriyyə yardımları edir, daha bir çox möhtəşəm layihələr. Bu başa düşüləndir! Amma əsas məsələ evin içidir. Deyilənə görə büdcə gəlirlərimizin ilbə-il çoxaldığı, xüsusiylə də son 7 ildə 13 dəfə artdığı bir dönəmdə, Azərbaycana edilən beynəlxalq yardımların ikiyə qatlandığı bir vaxtda, neft-qaz gəlirlərimizin kəllə çarxa çıxdığı bir zamanda, bölgələrin infrastrukturuyla bağlı inkişaf programlarının icra edildiyi tuthatutda yerlədə vəziyyət elə yer olaraq da qalmaqdadır.
2013-ci ildə ümumi büdcə xərclərinin 7.5 faiz artması proqnozlaşdırılıb və “Nəqliyyat və rabitə” xərclərinin payı isə 23.9 faiz nəzərdə tutulub. Belə olduğu təqdirdə isə nəqliyyat sisteminin inkişafının məqsəd və hədəfləri, onun idarə olunmasında, dayanıqlı inkişafında, fıaliyyətinin tənzimlənməsində dövlətin rolu, qlobal nəqliyyat xidmətləri bazarının Azərbaycanın yeri, ərazimizdən keçən beynəlxalq nəqliyyat dəhlizlərinin vəziyyəti, əlaqədar yeni texnologiyaların istifadə olunması nəqliyyatda təhlükəsizliyin və ekoloji tələblərin təmin edilməsi müvafiq strukturun güclənməsinə gətirib çıxarmalıdır. Ancaq təəssüflər olsu ki, yaxşıya doğru heç nə hiss olunmur. Sadalananlar kağız üzərində və ya elektron səhifələrdə göz çıxarır. Prezidentin açılışını etdiyi yollar qısa vaxt ərzində təkrar təmirə dayandırılır. Yolların bərpasına, yenidən qurulmasına, yeni yolların çəkilişinə ayrılan büdcə vəsaitinin dolayısıyla xalqın hər bir fərdinin boğazından tutulduğu unudulmamalıdır. Necə ki, göylərə sovrulur. Göylərə sovrulması ilə bərabər ciblərə axır.
Ölkəmizdə bir çox həllini tapmayan ciddi problemlər, azalmaqdansa hələ də qalmaqdadır. Əslində demək olar ki, bu “inkişaf” artan xətt üzrə iri addımlarla hərəkətdədir. Biz də öz imkanımız müqabilində yükün kiçiyindən yapışırıq. Dərd bir olar , iki olar...
Görülən mənzərə budur ki, dövlət başçısının tapşırıqları qulaq ardına vurulur, nazirlərin başı “zər tutmağa” yaman qarşıb, məsuliyyətsiz kəslər məsul vəzifələri icra edir. Artıq Zakir Fərəcovun “Kalyon macərası” və ya “Dubay sevdası”ndan danışmaq fikrimiz yoxdur. Abşeron rayon Saray qəsəbə sakinlərinin “Gündəm xəbərə” ünvanladığı şikayətlə əlaqədar qəsəbədə olduq. Həqiqətən də məhəllələr arası bərbad yolların şahidi olduq. “Üzümlük” “Badamlıq” deyilən ərazidə salınmış məhəllənin ara yolları ümumiyyətlə keçilməzdir.
Sakinlərin hesabına yola səpilmiş çınqıl səthi olduğundan yağış yağarkən hərəkət edən maşınlar palçıqda batmalı olurlar. Qəsəbə nümayəndəliyi ilə Saray Bələdiyyəsi arasındakı “qucaq dolusu sevgi”dən də söz açmayacağıq. Ona görə ki, Saray qəsəbəsində bu səlahiyyətli “Zatlar” məsul olduğu ərazidən obyekt kimi istifadə edirlər. Görəcəyi işləri belə unudublar. Sakinlərin dəfələrlə yol infrastuktur və onları narahat edən problemlərlə bağlı şikayətlərinə baxılmır.
Araşdırmalarımız davam edir... Növbəti yazımızı gözləyin.
Kənan