"Bu ilin doqquz ayı ərzində Azərbaycanda QİÇS-ə yoluxan insanların sayı 4171 nəfər təşkil edir.

Onların 96%-i Azərbaycan vətəndaşı, qalanları isə əcnəbidir”. Lent. az-ın məlumatına görə, bunu Respublika QİÇS-lə Mübarizə Mərkəzinin direktoru Esmira Alməmmədova Bakıda keçirilən "Dünya QİÇS həftəsi ərəfəsində yeniyetmələrin İİV testindən keçməsi istiqamətində təbliğat” mövzusunda beynəlxalq konfransda bildirib.

Direktor vurğulayıb ki, QİÇS mərhələsində olanların sayı 1248 nəfər təşkil edir: "Bu xəstəlikdən dünyasını dəyişənlərin sayı isə 578 nəfərdir. Eyni zamanda, xilasedici AİV terapiyaya qoşulanların sayı ildən-ilə artır. Bu ilin 9 ayının nəticələrinə görə, 1627 nəfər olub. Bunlardan 380 nəfəri bu ilin 9 ayında müalicəyə qoşulub.
İİV-in yayılmasınınq qarşısının alınması əsas yolu odur ki, vaxtında testdən keçmək lazımdır”.

E. Alməmmədova bildirib ki, ona görə də yeniyetmələr arasında testləşməni daha əlçatan etmək lazımdır: "Epidemiyanın səviyyəsindən asılı olmayaraq, hər bir yeniyetmənin belə bir imkanı olmalıdır. Lakin bu sahədə bir neçə qanunvericilik tərəfindən olan çətinliklərlə rastlaşırıq. Yeniyetmələrin hüquq tərəfdən belə bir qərar vermə ixtiyarı yoxdur. Bu qərarı ya valideynləri, yada maraqlarını müdafiə edən qəyyumlar verir. Bu, çox aktual bir problemdir. Dövlət, Səhiyyə Nazirliyi tərəfindən beynəlxalq fondlar tərəfindən addımlar atılır”.