Ürək və damar xəstəlikləri mərkəzinin rəhbəri Rəşad Mahmudov əməliyyat üçün məcburi köçkündən 10 min manat istəyib

“Biz elə bir vəziyyət yaratmalıyıq ki, buna ehtiyac olmasın. Azərbaycanda ən yüksək tibbi xidmət, ən yüksək peşəkarlıq olmalıdır. Mən əminəm ki, birgə səylər, həm dövlət tərəfindən aparılan siyasət, yeni tibb ocaqlarının yaradılması, müasir avadanlığın mövcudluğu və həm də həkimlərin peşəkarlığı, təkmilləşməsi bizi bu məqsədə nail olmağa gətirib çıxaracaqdır». Bu sözləri bir neçə ay öncə səhiyyə işçiləri ilə keçirdiyi görüş zamanı ölkə prezidenti İlham Əliyev bildirmişdi.

Prezidentin də söylədiyi kimi, bu gün imkanlı şəxslərin çoxu müalicə üçün xarici ölkələrə üz tuturlar. Ölkədə səhiyyə sisteminin inkişafına dövlət dəstəyinin artırıldığı bir dövrdə vətəndaşlarımızın bir hissəsinin xaricdə müalicəyə yollanması bəzi məqamlardan xəbər verir. Daha dəqiq desək, onların yerli səhiyyə sisteminə inamsızlığını ifadə edir. Əslində, müalicə üçün xarici ölkələrə gedən insanları qınamaq düzgün deyil. Bir halda ki, yerli xəstəxanalarda adi burun-boğaz əməliyyatı üçün həkimlər xəstədən 1500 manat tələb edirlər, nəyə görə də vətəndaşlarımız xaricə getməsin? Uzun sözün qısası, hazırda Azərbaycanda fəaliyyət göstərən dövlət və özəl səhiyyə ocaqlarında qiymətlər od tutub yanır. Yarım əsrdən çoxdur fəaliyyətdə olan Mərkəzi Neftçilər Xəstəxanasında da səhiyyə bərbad vəziyyətdədir. Zəngilan rayonundan məcburi köçkün düşən, uzun müddət dövlətə və dövlətçiliyə sədaqətlə xidmət edən, ömrünün çox hissəsini hərbi sistemə həsr etmiş, Qarabağ döyüşlərində igidlik göstərmiş Cəfər Həsənəliyev Tia.az- a etdiyi şikayətdə bildirdi ki, Mərkəzi Neftçilər Xəstəxanasında həkimlər xəstələrə açıq-aşkar qazanc gözündə baxırlar: «Ürəyimdə yaranan problemlə bağlı olaraq xəstəxanaya müraciət etdim. Mərkəzi Neftçilər Xəstəxanasının ürək və damar xəstəlikləri mərkəzinin rəhbəri Rəşad Mahmudovun yanına getdim. Burda məni müayinə edəndən sonra bildirdilər ki, əməliyyat olunmalısan. Sağlamlığımın bərpası üçün əməliyyata razılıq verdim və Rəşad həkim məni köməkçilərinin yanına göndərdi. Əməliyyatın qiyməti ilə maraqlananda şoka düşdüm. Həkimlər dedilər ki, ilkin olaraq 8500 manat ödəməliyəm. Əlavə olaraq da 1500 manat tələb etdilər. Bir sözlə, ürək əməliyyatı üçün məndən 10 min manat pul istədilər. Məcburi köçkündə bu qədər pul hardandır?».

Maddi durumunun Azərbaycanda əməliyyat olunmasına imkan vermədiyini deyən Cəfər müəllim qeyd etdi ki, dərdinə çarə tapmaq məqsədilə Ukraynaya yollanıb: «Kiyev Kardiologiya Mərkəzində müayinədən keçdim. Burda gördüyüm mənzərə mənə müsbət mənada çox yaxşı təsir etdi. Mərkəzdə Ukrayna vətəndaşlarının ürək əməliyyatı üçün sadəcə 300 ABŞ dolları lazımdır. Xarici vətəndaşlar isə 5000 dollar ödəməlidir. Mərkəzi Neftçilər Xəstəxanasındakı qiymətlər bura ilə müqayisədə qat-qat bahadır. Bizim səhiyyəmizi yaman günə qoyanlar Rəşad Mahmudov kimi həkimlərdir». Qeyd etməliyik ki, Azərbaycanla müqayisədə Ukraynanın səhiyyə sistemi çox inkişaf edib. Əgər burda ürək əməliyyatı üçün yerli vətəndaşlardan 300 dollar istənilirsə, bizdə nəyə görə qiymətlər bahadır? Səhiyyə naziri Oqtay Şirəliyev niyə bu məsələlərə öz münasibətini bildirmir?

Tutaq ki, birinin 10 min manatı yoxdur, yıxılıb ölməlidir..? Pulu olmayanı əməliyyat etmirlər, Oqtay Şirəliyev, Rəşad Mahmudov? Mərkəzi Neftçilər Xəstəxanasının ürək və damar xəstəlikləri mərkəzinin rəhbəri Rəşad Mahmudovun maddi durumu yaxşı ola bilər. Amma hamı onun kimi varlı deyil. 10 min manatı heç kim çöldən yığmır. Kasıb insanlar isə ümumiyyətlə, heç vaxt bu məbləği bir yerdə görməyiblər. Yaxşı olardı ki, xəstəxananın baş həkimi Leyla Seyidbəyova bu kimi hallara diqqət yetirsin, vətəndaşlarımızı müayinə üçün xaricə getməyə məcbur edən Rəşad Mahmudov kimi həkimləri cəzalandırsın. Gələn saylarımızda daha tükürpədici faktları dərc edəcəyik. Heç kim bizdən inciməsin. Bizi izləməyi unutmayın.

Qarşı tərəfin də cavab haqqını tanıyırıq.

Şahin