Təsadüflə yüksələn «Bakıelektrikşəbəkə» şefinin maxinasiyaları

gundemxeber.az «Bakıelektrikşəbəkə»nin vətəndaşlara qarşı haqsız davranışı, xüsusilə sayğac məsələsində qanundakı boşluqdan sui istifadə edən idarə əməkdaşlarının insanlara qarşı haqsız davranışından çox yazılıb. Həmin yazıda «Bakıelektrikşəbəkə»nin sosial narazılıqlar mənbəyinə çevrildiyini və bu səbəbdən idarədə inqilab rüzgarının əsdiyini bildirmişdik. İndi isə həmin qurumun rəhbəri Baba Rzayev haqqında əldə etdiyimiz ilginc faktlara nəzər salaq.
«Bakıelektrikşəbəkə»nin rəhbəri ilə bağlı ən maraqlı məqam onun bu vəzifəyə təyin olunmasıdır. Çünki Arabul getdikdən sonra B.Rzayevin bu posta gətirilməsindən nə Bakı şəhər icra hakimiyəinin başçısı Hacıbala Abutalıbovun, nə də ölkədəki ən xırda təyinatları belə diqqətdə saxlayan Prezident Aparatının rəhbəri Ramiz Mehdiyevin xəbəri olub. Belə olan halda ortaya sual çıxır: O, necə parladı?
B.Rzayevin yüksəlişi keçmiş iqtisadi inkişaf naziri Heydər Babayevin təklifi ilə Arif Paşayevin bağ evinin işıqlandırılması işindən başlayıb. Özünü çox sakit və işgüzar göstərən Rzayev Arif müəllimin etimadını qazana bilir. Bundan istifadə edən Heydər Babayev Arabulun «torbasını tikməyə» də öz yardımlarını edib. Bir müddətdən sonra isə heç kimə məlum olmayan şərtlər daxilində o «Bakıelektrikşəbəkə» ASC-yə sədr təyin edilir. Belə sıçrayışlı yüksəlişdən eyforiyaya düşən B.Rzayev daha qətiyyətli addımlar atmaq qərarına gəlir. Energetika gününü özünəməxsus qeyd etmək qərarına gələn Baba müəllim 20 oktyabr 2010-cu ildə təkcə Heydər Əliyevin məzarını ziyarət etməklə kifayətlənmir. Həmişə «şef»in fikirləini gözündən oxuyan, birinci müavini Zaur Hüseynovun təklifi ilə fəxri xiyabandakı energetiklər Zirə qəbiristanlığına, B.Rzayevin atası mərhum Hüseynağa kişinin məzarını ziyarətə gedirlər. Böyük ziyarət Zirə ilə qurtarmır. Peşə bayramı «Çanaqqala» restoranında böyük ziyafətlə yekunlaşır. Maraqlıdır, artıq böyük iddialar ortaya qoyan Bakının «baş işıqçısı» əslində kimdir?
Bakı kəndlərinin birində dünyaya gələn Baba Rzayevin nə akademik Arif Paşayevlə, nə də onun yaxınları ilə heç bir qan qohumluğu yoxdur. Heydər Babayevin köməyi ilə böyük vəzifə tutmuş Baba müəllim ilk əvvəllər «Bakıelkto» kiçik müəssisəsinin direktoru olub. Buna qədər isə Azərbaycan energetikləri onu yalnız Dərnəgül yolundakı elektrik avadanlıqları mağazası ilə tanıyıblar. Hansısa mağaza müdirinin «Bakelktrikşəbəkə» ASC-yə direktor təyin olunması böyük sensasiyaya səbəb olsa da, Baba müəllimin ustalıqla həyata keçirdiyi siyasət nəticəsində çox tez unuduldu.
Yeni iş yerində qazandığı uğurlar nəticəsində Zirə kəndində Kabel zavodu, Ziya Bünyadov prospektində üçmərtəbəli möhtəşəm, qiyməti yüz min manatlarla ölçülən «Santral elektrik» ticarət mərkəzi və adını çəkmək istəmədəyimiz onlarla böyük obyektlərin sahibi oldu.
Və bununla «Bakıelektrikşəbəkə»yə lazım olan bütün avadanlıqları və kabelləri özünəməxsus Zirə Kabel zavodundan (yeri gəlmişkən, bu zavodun direktoru qardaşı Emin Rzayevdir) alır. Həmin zavodda istehsal edilən keyfiyyətsiz kabelləri «Bakıelektrikşəbəkə» vasitəsilə silir və Orta Asiya respublikalarına ixrac etməklə ikiqat gəlir əldə edir. Yeri gəlmişkən, adının açıqlanmasını istəməyən mənbənin məlumatına görə, bir neçə həftə bundan əvvəl bir vaqon kabel Bakı Dəniz Limanı vasitəsilə Qazaxıstana göndərilib (həmin vaqonun fotoşəkli və nömrələri də əlimizdədir).
Əslində Baba Rzayev heç də bu gün sürgün ömrü yaşayan Rza İbadovdan geri qalmır. O da «yuxarılara göndəriləsi» vəsaitin yarısını mənimsəyir. Məsələn, MTK-larda texniki şərt (xalq dili ilə desək, işıq vermək üçün) verilən rüşvətin, reketçiliklə əhalidən cərimə adı ilə alınan küllü miqdarda nəğd pul vəsaitinin izini itirmək üçün «Bakıelektrikşəbəkə» ASC-nin Nəzarət Departamentini ləğv edir, əvəzinə birinci müavin Zaur Hüseynovun yaxın dostu olan Qara Nəbiyevin rəisi olduğu satış departamentinə həvalə edir. Deyilənə görə, nəzarət departamentinin ləğvi «ümumi büdcə»dən oğurlanan pullardan yuxarıların xəbər tutmaması üçün edilib.
Digər bir məlumata görə, B.Rzayevin birinci müavini Z. Hüseynov, satış departamentinin direktoru Qara Nəbiyev, idarədə «Şef» ləqəbi ilə tanınan Səhət Hacıyevin əli ilə nəzarətçi müfəttişlərin yığdığı qeyri-qanuni vəsaitin yarısını mənimsəyirlər. Üstəlik, «Şef»-in əli ilə hər yeni işə qəbul olunan işçidən 6-7 min manat alınır, müavin və departement rəisi arasında bölünür. İnsafən, deyilənə görə, bundan Baba Rzayevin xəbəri yoxdur.
Artıq respublikada heç kim bu müəssisə ilə biznes əlaqəsinə girmək istəmir. Çünki «Tender haqqında» qanunu heç kim yada salmır, çox pul vəd edən qalib elan olunur və nəticədə illərlə qapı kandarında durmağa məcbur olur. Bu işgörəndən pul qoparmaq prinsipi illərdir ki, özünü doğruldur. Ona görə ki, Molla Nəsrədinin bir əhvalatında oluğu kimi, hər ay, hər il pulunu itirməsin deyə biznesmenlər güzəştə gedirlər. Nəticədə malın dəyərinin 45-65 faizi Baba Rzayev və onun ətrafındakılara qalır.
Bəs bu millətin işığını oğurlayan təşkilatda daha nələr olur?.. Baba Rzayevin gənc oğlunun Dubaydakı firmaları, Şüvəlanda tikilən beşmərtəbəli bağ evi və digər məsələrlə bağlı qəzetimizin gələn saylarımızda daha ətraflı məlumat verəcəyik.

Çingiz

P.S. Mövzunu davam etdirəcəyik və növbəti sayımızda yazıda sadalanan faktlarla bağlı qarşı tərəfin də münasibətin dərc etməyə hazırıq.