“Təbii ki, sözügedən strategiyanı işləyib hazırlayan komissiyanın üzvü kimi, mən təhsilin inkişafının strateji məqsədlərində 12 illik sistemə keçidin müəyyən edilməsini düzgün hesab edirəm”.
Tələbə Qəbulu üzrə Dövlət Komissiyasının sədri Məleykə Abbaszadə bunu ANS PRESS-in sorğusuna cavabında bildirib.

Məleykə Abbaszadə respublikamızda 12 illik ümumi təhsilə keçidin Dövlət Strategiyasına əsasən təsbit edildiyini bildirib: “Azərbaycan Respublikası prezidentinin 2013-cü il 24 oktyabr tarixli sərəncamı ilə “Azərbaycan Respublikasında təhsilin inkişafı üzrə Dövlət Strategiyası” təsdiq edilmişdir. Həmin strategiyada respublikamızda 12 illik ümumi təhsilə keçidin təmin olunması təsbit edilmişdir”.

“12 illik təhsil sisteminə keçidlə əlaqədar olaraq TQDK-nın fəaliyyətində hansı dəyişikliklər olacaq” sualına Komisssiya sədri Məleykə Abbaszadə sərəncama əsasən, 5 ay ərzində Təhsilin inkişafı üzrə Dövlət Strategiyasının icra mexanizmi hazırlanıb prezidentə təqdim edilməli olduğunu söyləyib: “Təhsil haqqında Azərbaycan Respublikası qanununun tətbiq edilməsi barədə Azərbaycan Respublikası prezidentinin müvafiq fərmanına əsasən, təhsil sahəsində vahid dövlət siyasətini həyata keçirən qurum Təhsil Nazirliyidir”. Məleykə Abbaszadə bildirib ki, strategiyada hansı mexanizmin hansı müddətə həyata keçiriləcəyini Təhsil Nazirliyi müəyyən edəcək: “Bunu nazirlik müəyyən edəcək ki, strategiyada təsbit olunmuş hədəflər hansı mexanizm üzrə və hansı müddətdə həyata keçiriləcək”.

TQDK sədri 12 illik sistemə keçidlə əlaqədar planlar açıqlandıqca Komissiyanın fəaliyyətində müəyyən dəyişikliklər olacağını söyləyib: “Öz tərəfimdən isə onu deyə bilərəm ki, TN-nin taktiki planları açıqlandıqca TQDK öz fəaliyyətini tənzimləyən normativ sənədləri işləyib hazırlayacaq”.

M. Abaszadə yeni sistemə keçidlə əlaqədar qəbul qaydalarında dəyişiklik ola biləcəyini də söyləyib. Məleykə Abbaszadə qəbul qaydaları ilə bağlı hər hanşı dəyişiklik olarsa, əvvəlcədən məlumata verəcəklərini bildirib: “Ümumiyyətlə, təhsil sistemi canlı orqanizmdir. Hər bir orqanizmdə olduğu kimi, burada da hərəkət, dəyişiklik-həyatdır, durğunluq isə ölümdür. Şübhəsiz, yeni sistemə keçidlə bağlı qəbul qaydalarında hər hansı dəyişikliklərin həyata keçirilməsi zərurəti yaranarsa, bu haqda 1-2 il əvvəl məlumat veriləcək”.

TQDK sədri 12 illik təhsil sisteminə keçidin Azərbaycan təhsilinə təsiri ilə bağlı dərin və tutarlı araşdırmaların aparılmasının tərəfdarı olduqlarını qeyd edib. O, belə elmi araşdırmaların komissiya tərəfindən hər il aparıldığını söyləyib: “Belə təhlillər həm sosioloqlar, həm demoqraflar, həm də iqtisadçılar tərəfindən aparıla bilər. Eyni zamanda, elmi konfranslar və seminarlar çərçivəsində peşəkarlar və mütəxəssislər tərəfindən belə məsələlər ətrafında fikir mübadiləsinin aparılması mövcud problemlərin dərk edilməsinin səviyyəsinin artırılması ilə nəticələnə bilər”.