Sürücü uzun müddət əlini hərəkətdə olan avtobusun sükanından çəkərək əl çalır
Yol Bakıda sərnişin daşıyan avtobusda gülməli, amma digər tərəfdən baxanda sözün əsl mənasında acınacaqlı hadisə baş verib. Sosial şəbəkələrdə yayımlanan və həvəskar kamera ilə sərnişinlərdən birinin çəkdiyi videoda Qaradağ rayonu istiqamətində hərəkət edən avtobusda aşığın əlində saz avtobus sərnişinlərinə şou göstərməsi əks olunub.

Sanki özünü avtobusda deyil, yerli şou proqramlardan birində təsəvvür edən aşıq böyük can fəşanlıqla aşıq havası ifa edir. Ondan dala qalmayan sərnişinlər isə onu həvəslə müşaiyət edirlər. Bu şounu acınacaqlı edən isə gördüyünüz kimi şouya sükan arxasında oturan və avtobusu idarə edən sürücünün də aktiv qoşulmasıdı. O uzun müddət əlini hərəkətdə olan avtobusun sükanından çəkərək əl çalır.

Məsələ ilə bağlı Nəqliyyat Nazirliyi ilə də əlaqə saxladıq. Nazirliyin ictimaiyyətlə əlaqələr şöbəsinin müdiri Namiq Həsənov bizə bildirdi ki, baş vermiş hadisə araşdırılır. Və hansı sərnişin avtobusunda və hansı sürücü tərəfindən törədildiyi aydınlaşdığı təqdirdə bununla bağlı aidiyyatı tədbirlər görüləcək.