Həmin gün Amil Əliyev qızı Günelə öyüd-nəsihət vermək üçün yaşadığı evə gedir. Lakin Günel onun sözlərinə məhəl qoymayaraq istədiyi kimi yaşayacağını deyir. Bundan qəzəblənən Amil qızına sillə vurur. Bu zaman Günel yerdən daş parçası götürərək atasına tərəf atır. Beləliklə, ata və qız arasında dava başlayır...


Ailəli və bir uşaq anası olan qadın başqa kişiyə qoşulub Bakıya qaçır


Hadisə bu il avqustun 9-da Şamaxı rayonunda baş verib. Belə ki, Günel Məmmədova ailəli və bir uşaq anası olmasına baxmayaraq, başqa kişiyə qoşulub Bakıya qaçır. Həmin günün səhəri Günelin atası Amil və digər ailə üzvləri qızı yenidən evinə qaytarırlar. Bundan bir müddət sonra Günel yenidən evdən qaçır. Lakin bu dəfə polis idarəsinə. Orada qardaşı Alimin onu döydüyünü bildirir və şikayət ərizəsi yazır. Həmin gün Amil öz maşını ilə qızı Güneli yenidən evlərinə qaytarır. Öyüd-nəsihət vermək üçün həyətdə çardağın altında qızı ilə söhbət edir. Günel isə öz həyatını bildiyi kimi yaşayacağını deyir. Bundan qəzəblənən ata qızına bir sillə vurur. Bu zaman Günel yerdən daş götürərək atasının başına zərbə vurur. Bundan daha da qəzəblənən ata qızını öldürmək qərarına gəlir. O da yerdən daş götürərək qızının başına zərbə endirir. Ata ilə qız əlbəyaxa davaya çıxırlar. Bu zaman Amil cibindəki bıçağı çıxararaq Günelə 9 bıçaq zərbəsi vurur.


“Gəl, qızını apar evinə”


İlkin istintaq zamanı Amil Əliyev elan olunmuş ittihamda özünü tam təqsirli bildiyini deyir: “Günel Məmmədova ən kiçik övladım idi. 8-ci sinfə kimi Şamaxı şəhərində yerləşən 6 saylı tam orta məktəbdə təhsil alıb. Sonra təhsil almaq istəmədiyindən onu məktəbdən çıxardıb gələcəkdə dərzi olması üçün Şamaxı rayonunda peşə məktəbinə qoymuşduq. 3 il bundan əvvəl Günel Şamaxı sakini Bilal Məmmədova qoşulub evdən qaçıb və könüllü olaraq onunla cinsi əlaqədə olub. Bunu bildikdən sonra Bilalın Güneli almasının əleyhinə oldum. Lakin el içində rüsvay olmamaq üçün razılaşdım. Bilalla Günel arasında rəsmi nikah yox idi. Onların birgə nikahından Yağmur dünyaya gəlmişdi. Təxminən 1 ay bundan əvvəl Bilal mənim mobil telefonuma zəng edərək “gəl, qızını götür, apar evinə” dedi. Nə baş verdiyini öyrənmək üçün dərhal Bilalın yaşadığı evə getdim. Bu zaman Bilal mənə heç nə demədi. Güneli götürüb aparmağı və nə olduğunu Günelin başa salacağını bildirdi. Mən də evdə Güneldən nə baş verdiyini soruşdum. Heç bir səbəb demədi. Elə həmin gün axşam üstü Günel inad edərək körpə uşağının yanına getmək istədiyini, nə olursa-olsun Bilalla birlikdə yaşamaq istədiyini dedi. Mən də məcbur olub Güneli gətirib Bilalgilə qoydum. Aradan 1-2 saat keçdikdən sonra Bilal yenə mənə zəng elədi: “Qızını evimə məni xataya salmaq üçün gətirmişdin, qızın qoşulub başqa bir oğlana qaçıb”. Nə baş verdiyini öyrənmək üçün iki oğlumla birlikdə Günelgilə gəldim. Günel orda olmadığı üçün avtomaşınla Şamaxı şəhərinin küçələrində onu axtarmağa başladıq. Lakin tapa bilmədik. Bilal Günelin mobil telefonunu mənə göstərərək “Günel evdən çıxanda telefonunu evdə qoyub” dedi. Bilal telefona baxanda ekranda tanımadığımız oğlan şəklinin olduğunu gördük. Bundan sonra rayon polis şöbəsinə yollandıq. Telefonda həmin oğlanın nömrəsi də var idi. Adı Taleh yazılmışdı. Rayon polis şöbəsində polis əməkdaşına müraciət etdik. Bu zaman oğlanlarımdan hansısa Talehin mobil telefonuna zəng etdi. Taleh əvvəlcə Astara rayonunda olduğunu bildirdi, sonra isə telefonunu söndürdü. Bundan sonra polis əməkdaşı Talehin mobil telefonuna zəng edərək ondan Güneli gətirməsini tələb etdi. Təxminən 5-10 dəqiqə sonra qızım Günel tanımadığım mobil telefondan mənə zəng elədi və yanımızda olan polis əməkdaşı ilə danışdı. Günel öz istəyi ilə Talehə qoşulub Bakıya qaçdığını və onunla ailə həyatı quracağını bildirdi. Lakin növbəti gün evə qayıtdı. Bir gün səhər yuxudan oyananda Günelin çarpayısının boş olduğunu gördüm. Bu zaman polis şöbəsinin əməkdaşı zəng edərək Günelin rayon polis şöbəsində olduğunu bildirdi. Mən də rayon polis şöbəsinə getdim. Orada öyrəndim ki, Günel qardaşı Alim Əliyevin onu döyməsi ilə bağlı ərizə verib. Bundan sonra Günellə birlikdə yaşadığımız evə gəldik. Güneli başımıza gətirdiyi biabırçılıqla bağlı danışmaq üçün həyətdə olan çardağın altına çağırdım.


“Bu nə oyundu başımıza açmısan?”


Həmin vaxt evdə heç kim yox idi. Mən Günelə “bu nə oyundu başımıza açmısan?” dedim. Günel isə əvəzində “mən özüm həyatımı bildiyim kimi yaşayacam” cavabını verdi. Günelə “öz həyatını pozğunluqla yaşayacaqsan?” dedim. Günel cavab verərək həyatını pozğunluqla yaşayacağını bildirdi. Bu vaxt Güneli tənbeh etmək məqsədilə ona sillə vurdum. Günel də yerdən daş götürərək mənim başıma bir dəfə vurdu. Zərbənin təsirindən başım dumanlandı. Günel qaçmaq istəyərkən onu tutdum və yerdən daş götürüb başına zərbələr endirdim. Həmin vaxt Günel üzü üstdə yerə yıxıldı. Sonra çönüb qalxmaq istəyərkən yerdən başqa daş götürüb bu dəfə də sifətinə vurdum. Sonra cibimdən bıçağı çıxardıb dayanmadan onun bədəninə bir neçə zərbə endirdim. Günelin müqavimət göstərmədiyini görüb nəfəsini yoxladım. Öldüyünə əmin olduqdan sonra evin həyətində olan çəlləkdən vedrə ilə su götürüb əl-üzümü yudum. Bundan bir müddət sonra oğlanlarım evə gəldilər. Onlara polisə zəng edərək məlumat vermələrini dedim” .



“Arvadımı telefonda oğlanla danışanda tutdum”


Günel Məmmədovanın əri Bilal Məmmədov isə ifadəsində Günel Məmmədovanı peşə məktəbinə dərsə gedib gələrkən görüb bəyəndiyini, ondan mobil nömrəsini alaraq əlaqə saxladıqlarıını, aralarında olan yaxın münasibətdən sonra 2010-cu ildə Günellə ailə həyatı quraraq birlikdə yaşadıqlarını deyib: “Ailə qurduqdan sonra Günellə aramızda çox mehriban münasibət var idi. Ancaq Günelin ailəsi ilə münasibəti soyuq idi. Bir gün Günelin qulaqcıq vasitəsilə kiminləsə telefonla danışdığını gördüm. Ondan kiminlə danışdığını soruşanda mahnılara qulaq asdığını dedi. Lakin telefona baxanda orada tanımadığım nömrə gördüm. Bundan sonra Günelin atasına zəng edərək qızını başqa oğlanla danışarkən tutduğumu dedim. Atası gəlib Güneli apardı. Ancaq bir neçə saatdan sonra yenidən evə qaytardı. Həmin gün təxminən saat 22 radələrində Günelin evdən qaçdığını bildim.

"Onunla bir neçə dəfə görüşüb cinsi əlaqədə olmuşduq"

Taleh Tarıverdiyev isə Günellə hələ peşə liseyində oxuyarkən tanış olduğunu deyib: “Əvvələr peşə liseyində bir oxumuşuq. Lakin aramızda heç bir münasibət olmayıb. Son vaxtlar Günel mənə zəng edərək ailəli olub ayrıldığını, hal-hazırda həyatında heç kim olmadığı üçün çox darıxdığını, həyatının mənasız olduğunu, yaşamaq istəmədiyini, həmçinin mənə çox ehtiyacı olduğunu deyirdi. Mən də onun qəlbini qırmamaq üçün daha yaxından münasibət saxlayırdım. Günel ondan ayrılsam, özünü öldürəcəyini söyləyirdi. Onunla bir neçə dəfə görüşüb cinsi əlaqədə olmuşduq. Lakin o, mənimlə Bakıya gedəndə ailələi olduğunu dedi. Mən də onu evlərinə geri qaytardım”.

Qeyd: Bu cinayət işi üzrə məhkəmə prosesi hazırda Bakı Ağır Cinayətlər Məhkəməsində davam etdirilir. İşə hakim Zeynal Ağayevin sədrliyi ilə baxılır.

QEYD: Yazı cinayət işinin ittiham aktı əsasında xüsusi olaraq Ailəm.az saytı üçün hazırlanıb.