Ümid Partiyası qərargahında partiyanın Gənclər Təşkilatının Konfransı keçirilib. Təşkilat komitəsinin sədri, Ümid Partiyası sədrinin gənclər üzrə müavini Ruslan İzzətli, tədbiri açıq elan etdikdən sonra, tədbiri idarə edəcək şəxslər - Elvin Camalov, İbrahim Nəsirli və Turqut Əliyev seçilib. Konfransda Ümid Partiyası sədri İqbal Ağazadə, partiyanın gənclər üzrə müavini Ruslan İzzətli, ADP gənclər təşkilatının sədr müavini Azər Sadıqov, Müsavat Partiyası Gənclər Təşkilatının sədri Tural Abbaslı, Milli Fikir Mərkəzinin sədri Şəhriyar Məcidzadə, VHP Gənclər Təşkilatının sədri Pünhan İmanlı, Ümid partiyasının üzvləri və jurnalistlər iştirak ediblər.

Tədbir aparıcısı Elvin Camalov hesabat üçün sözü Ruslan İzzətliyə verib. Tədbiri giriş sözü ilə açan Ümid Partiyası sədrinin Gənclərlə İş üzrə Müavini Ruslan İzzətli Konfrans iştirakçılarını və qonaqları salamlayıb. Ümid Gənclər Təşkilatının konfransa hazırlıq üzrə Təşkilat Komitəsinin son üç ayda gördüyü işləri yüksək qiymətləndirən R.İzzətli regionlarda keçirilən görüşləri xüsusi qeyd edib. “Təşkilat komitəsinin hesabatı və təşkilat komitəsinin fəaliyyəti yüksək qiymətləndirilməlidir. Gənclər Təşkilatı olaraq dostlarla görüşəndə bizə sual verirlər: “ Niyə Ümid sıralarında olmalıyıq?” Ümid Partiyası Azərbaycanda fəaliyyət göstərən çoxsaylı partiyadan biridir. Amma meydanda hər zaman döyüşən və haqqı deyən partiyadır. Bizim partiyamız və sədrimiz istər Qarabağ müharibəsində, istər meydan davasında xalqın ehtiyacı olduğu zamanlarda önə çıxıb, xalqın haqqını tələb edib. Digərləri hakimiyyət davası aparırdığı bir dövrdə İqbal Ağazadə Qarabağ döyüşlərində qazi olub. 2003-cü ildə Azərbaycan xalqı saxta seçkilərə etriaz olaraq meydanlara çıxdıqda İqbal Ağazadə Milli Məclis mandatından imtina edərək 17 ay zindanda yatdı. 2008-ci ildə Ümid Partiyası prezident seçkilərinə qatıldı. O zaman sağdan, soldan, hər tərəfdən bizim üzərimizə gəldilər. Biz bu hakimiyyətin insanları əzmək, rüşvətxorluq, haqsızlıq siyasətini ən azı efir vaxtı ilə insanlara çatdıracağıq, fikirlərimizi onlarla bölüşəcəyik, deyirdik. Bu gün isə prezident seçkilərində vahid namizədlik məsələsi üzərində dava gedir. O zaman soruşuram: 2008-ci ildə avtoritar idi, indi demokratiyadırmı? Yoxsa Seçki Məcəlləsi dəyişib? Yaxud ölkədəki demokratik proses dəyişdi ki, seçkiyə qatılmaq istyəyirsiz? Biz yenə 2013-də bu xalqa səslənəcəyik. Çünki, 10 aydan sonra biz seçkilərə qatılıb yenidən sizlərə səslənəcəyik. Bu gün Gənclər Təşkilatı adından bəyan edirik, vahid namizəd məsələsi gənclər üçün aktuallığını itirib. Biz Gənclər Təşkilatı olaraq 2013-cü il prezident seçkilərində İqbal Ağazadəni dəstəkləyəcəyik və Ümidçi gənclər olaraq partiyanın hansı qərarı olmasından asılı olmayaraq heç bir namizədə güzəştə getmək fikrimiz yoxdur. Son zamanlar üzərimizə hücumlar oldu, mətbuatda və sosial şəbəkələrdə üzərimizə gəldilər. Amma bunların hər birinin cavabını verdik. Bəzən onların cavabını İqbal bəy yox, İqbal bəylə 17 ay zindanda yatıb zülm çəkən, işgəncə görən insanlar onların cavabını verdi ki, əxlaqlı olun. Biz bu ölkəni dağına, dərəsinə, təbiətinə görə sevmədik. Biz bu ölkəni insanına görə sevdik. Bu ölkəni Məhəmməd Əminə görə sevdik, Səttar xanına görə sevdik, Pişəvərisinə görə sevdik, Elçibəyinə görə sevdik, hətta Əliyevlərinə görə sevdik. Bizim üçün insanı tənqid etmək var, amma təhqir etmək yoxdur. Bizi heç bir zaman nə mətbuatda, nə sosial şəbəkələrdə şantaj edə bilməzlər ki, siz kimlərisə təhqir etmisiz. Biz Azərbaycanın tarixində olan bütün simaları qəbul edirik. Bizim leksikonumuzda heç bir zaman təhqir olmayacaq. Insanların üzərinə bağıraraq, qışqıraraq, aşağılayaraq getmədik. Çünki bizim üçün bir deviz var: “Liderinə, başqanına hörmət edən gənclər heç vaxt başqasının lider və sədrini təhqir etməz”. Bu bizim üçün əsas prinsipdir”.

Ruslan İzzətlinin çıxışından sonra söz Ümid Partiyasının sədri millət vəkili İqbal Ağazadəyə verildi. İqbal bəy də qonaqları salamladıqdan sonra gənclərə öz təbriklərini çatdırdı. “Azərbaycanın sahibi nə keçmiş, nə indiki liderlər yox, gənclərdir. Fəhləsi fəhlə kimi, prezidenti prezident kimi, naziri nazir kimi bu ölkəni hər kəsdən təhvil ala biləcək bir gənc nəsil yetişir. Azərbaycanın tarixində müxtəlif dönəmlərdə müxtəlif hərəkatlar, müxtəlif proseslər, liderlər olub. Məhəmməd Əmini lider seçməyimizin bircə nədəni var. O insan çevrəsində olanlarla, dostları ilə, rəhbəri olduğu Müsavat partiyası ilə Azərbaycanı dünya dövlətləri içərisində tanıdan, imzasını imzalar içərisinə yazan bir dövlətin başçısı olub. Bizim Xətai kimi, Ağa Məhəmməd Şah Qacar kimi, Nadir kimi, ərazimizdə olan ayrı-ayrı dövlətlərin liderlərinə qədər hər kəs olub. Hər kəsi sayğı ilə qiymətləndiririk. Amma böyük öndərin – Məhəmməd Əmin Rəsulzadənin və onun silahdaşlarının rolu onda idi ki, 23 ay Azərbaycanda dünyanın tanıdığı, hər kəsin tanıdığı bir Azərbaycan imzası var. Onun portretinin, onun şəklinin yanında İqbal Ağazadənin və mənim kimi nə qədər siyasi partiya liderlərinin şəkilinin və portretinin dayanmağa haqqı yoxdur. Azərbaycanda mövcud iqtidarın siyasətini yanlış və qüsurlu, Azərbaycan gəncliyinin, Azərbaycan xalqının, Azərbaycan vətəndaşlarının mənafe və məqsədlərinə xidmət etmədiyini dəfələrlə sizlər bu kürsüdən də, televiziya ekranlarından da, mətbuat səhifələrindən də, dilimizdən eşitmisiniz, mövqeyimizi açıq və səmnimi etiraf etmişik. Amma məncə bunu ifadə etməyə elə bir ehtiyac yoxdur. Hər birimiz yaşamımızda, gündəlik sosial qayğılarımızda, təhsil aldığımız yerdə, işlədiyimiz müəssisələrdə Azərbaycan iqtidarının Azərbaycan gəncliyinə münasibətini çox aydın şəkildə görürük. Istər insan təməl hüquq və azadlıqlarının yerinə yetirilməsində, istərsə də gündəlik sosial qayğıların çoxluğunda və onun məhz bu iqtidar tərəfindən nəinki həll edilmədiyində gördük. Uzun illər xalqımızı narahat eləyən milli problemlərə sahib çıxılmamasının və Azərbaycanın ərazi bütövlüyünün təmin olunmamasında görürük. Nə etməliyik? Sualın bircə cavabı var: “Azərbaycan iqtidarı dəyişməlidir. Azərbaycan iqtidarını dəyişməliyik.”

Azərbaycan cəmiyyəti, Azərbaycan xalqı mühafizəkar xalqdır. O, dəyişməyə meyilli deyil. Bir evə girsəniz 20 il ərzində hətta məişət avadanlıqlarının yerini dəyişməyə meyl etmirlər. Amma dünya dinamikdir. Dünya həddindən artıq çox dəyişir. Bu gün qarşımızda olan bir telefon cihazı hər 3 aydan, hər 6 aydan bir yeni modellərlə əvəz olunursa, dünya yeni texnologiyalarla təmin olunursa, siz gənclik də bundan istifadə edirsinizsə, demək ki, hakimiyyətlərin də dəyişməsinin dinamikliyi də vacibdir. Dəyişiklik pisdirsə, Amerika dünyaya bu gün bütün sferalarda nümunə ola biləcək bir idarəetmə, nümunə ola biləcək bir iqtisadiyyat, nümunə ola biləcək bir siyasət, nümunə ola biləcək dövlət etibarı yaradıbsa, nədən hakimiyətlərinin maksimum müddəti 8 ildir. Nədən 8 ildən bir dövlət başçısı mütləq dəyişməlidir və yeni bir sistem gəlməlidir? Sizcə pisdirsə nədən dəyişir? Bizə dəyişiklik pisdir deyənlər dəyişməyən yerdə bircə dənə yaxşı nümunə göstərsin. Dəyişməyən kimlərdir? Koreya, Çin, Kuba, Cənubi Afrika Respublikaları, Cənubi Amerika dövlətləri, Afrikanın bir sıra ölkələri, Ərəb ölkələri və s. Ona görə də gənclik birinci növbədə dəyişməyə meyilli olmalıdır. Biz Azərbaycanın problemlərini bilirik, Azərbaycanın problemlərini həll etməyin yollarını da bilirik. Biz gəncliyin təhsillə təmin olunmasinda, iş yerlərinin müəyyən olunması, ipoteka kreditlərinin verilməsi və onun müəyyən şəkildə əhalinin sosial büdcəsinə uyğun şəkildə formalaşdırılması, Azərbaycan büdcəsi, Ermənistan-Azərbaycan münaqişəsinin həlli istiqamətində fundamental konsepsiyalara malik bir partiyayıq. Qarşımızda böyük bir proses var. Azərbaycanın demokratikləşməsi. Azərbaycanın demokratikləşməsi 2013-cü ilin seçki prosesi ilə mümkün olan şey deyil. Demokratik seçki təkcə demokratik cəmiyyət quruculuğu demək deyil. 2013-cü ilin demokratik seçkilərini keçirə bilərik, amma 2014-cü ildə fərqli bir ya xaos, ya yeni bir avtoritarizm, ya yeni bir diktatura ortaya çıxa bilər. Biz insanlarımızı tolerant, liberal olmağa öyrətməliyik. Bayaq Ruslan bəy dedi ki, Azərbaycanı dağına, dərəsinə görə sevmirik. Bəli, Azərbaycanı biz insanlarına görə sevirik. Insanlarımızın biri ağıllı, biri dəli, biri elmli, biri elmsiz, biri fədakar, biri qəhrəman ola bilər. Bizim gücümüz, bizim vəzifəmiz, bizim borcumuz ondadır ki, insanları doğru-dürüst tanıyıb yerləşdirə bilək”.

Konfrans qonaqların çıxışları ilə davam edib. Daha sonra Ümidçi gənclərin elan etdiyi “Ümidlərini Ümidə Bağlayanlar” yazı müsabiqəsinin qalibləri mükafatlandırıldı. Birinci yer “Yeni Müsavat” qəzetinin əməkdaşı Fərahim İlqaroğlu 500 manat, ikinci yer “Bizim yol” qəzetindən Vüsal Hacıoğlu 300 manat və üçüncü yerin sahibi Ədalət qəzetinin əməkdaşı Ədil Ədilzadə 200 manat pul mükafatı və diplomlarla təltif edildilər.

Konfransın sonunda Ümid Partiyasının Gənclər Təşkilatı yeni sədrini seçdi. Ayaz Həsənli Ümidçi gənclərin yeni sədri olub.