“O yazıda məmur adı çəkilmir, bizim yazımızı təhrif edirlər”
Milli Məclisin rəsmi orqanı olan “Azərbaycan” qəzetinin 22 dekabr sayında şəhər təsərrüfatına dair tənqidi məqalə dərc edilib.
“Tıxac probleminin həlli niyə ”tıxac"a düşüb" başlıqlı məqalədə paytaxtın kommunal təsərrüfatına görə birbaşa məsuliyyət daşıyan Bakı Şəhər İcra Hakimiyyəti (BŞİH) nişan verilib: “Bakıda nəqliyyatın hərəkətini iflic edən səbəblərdən biri küçələrin tez-tez təmirə bağlanmasıdır.

Biz hələ bəzən təmir işlərinin lüzumsuz aparılmasını və onun da günlərlə yox, aylarla uzanmasını demirik... İnanmırıq ki, Bakının yol təsərrüfatı qurumları təmir üçün hər hansı küçəni bağlayanda yol polisi ilə məsləhətləşsin. Deyə bilmərik, bu, hansının zəifliyi, yaxud məsuliyyətsizliyidir. Bütün hallarda həmin qurumlar əlbir işləməlidir... Yollar təkcə təmir üçün bağlanmır. Su, kanalizasiya, qaz xətlərinin çəkilişi ilə bağlı hətta təmirdən təzə çıxmış yolların qazılıb dağıdılmasının azmı şahidiyik? Görəsən, şəhərin kommunal təsərrüfatlarının yol istismar təşkilatları ilə əlbir işləməyinə nə və ya kim mane olur?! Axı ”əvvəl təmir, sonra qazıntı üsulu"nun həm şəhərin yol infrastrukturuna, həm də dövlət büdcəsinə xeyli ziyan vurduğunu başa düşmək xüsusi istedad tələb etmir".

Qəzet daha sonra Dövlət Yol Polisinin (DYP) fəaliyyətini tənqid edərək tıxaclara səbəb olan başqa bir detala - avtobus dayanacaqlarının “işğalına” toxunur: “Ancaq belə əcaib vəziyyətin yaranmasında adamı təəccübləndirən başqa amildir. Bu da problemin həllində yol polisinin acizliyidir. DYP əməkdaşlarının tıxacların yaranmasında kifayət qədər yüksək ”xüsusi çəki"yə malik belə hallara qarşı biganəliyinin heç bir bəraətə sığmaması qənaətinə gəlməkdən savayı əlac qalmır. Axı avtobus dayanacaqlarında minik avtomobillərinin saxlanması təkcə sürücü mədəniyyətsizliyi deyil, həm də yol hərəkəti qaydalarının kobud surətdə pozulmasıdır. Necə olur ki, DYP-nin evaukatorla silahlanmış əməkdaşları bir-iki dəqiqəlik mağazaya və ya aptekə girənin, yaxud xəstəxanaya xəstə gətirənin avtomobillərini yolda hərəkətin intensivliyinə mane olmadığı halda belə bir göz qırpımında xəbərdarlıqsız-filansız götürüb naməlum istiqamətə apara bilirlər, amma taksilərin gecə-gündüz avtobus dayanacaqlarını işğal etmələrinə göz yumurlar?!"
Məqalədə daha sonra ictimai nəqliyyat sahəsindəki problemə toxunulur.

“Azərbaycan” qəzetinin baş redaktoru Bəxtiyar Sadıqov isə “Yeni Müsavat”a açıqlamasında bu yazının bəzi müxalifyönlü saytlarda “dövlət qəzeti Abutalıbovu vurdu” şəklində yayılmasından narazıdır. Müsahibimiz öncə xatırlatdı ki, sözügedən məqalənin müəllifi özü deyil: “Digər tərəfdən bizim nə dövlət başçısı, nə Prezident Administrasiyası, nə də hansısa qurumlar qarşısında müqaviləmiz var ki, kimisə işdən çıxaranda bu barədə əvvəlcədən yazaq. Belə bir iş metodu, əlaqə yoxdur. Əgər dövlətin başçısı kimisə işdən çıxarmaq istəyirsə, bu, onun fövqəladə səlahiyyətidir. Bəlkə də sovet dövründə belə bir şey var idi, amma indi yoxdur”.

Müsahibimiz dedi ki, tıxac mövzusu hamını narahat edən hadisədir. Onun sözlərinə görə, həm dövlət başçısı, həm də Bakı Şəhər İcra Hakimiyyətinin rəhbərliyi o tıxacları, habelə əsəbi vəziyyəti aradan qaldırmaq üçün çox işlər görürlər: “Bunların hamısı faktdır, intellektual idarəetmə sistemi qurulub. Bununla belə, yenə də tıxaclar var, harasa gedib-gələndə əsəb keçiririk. Bu tıxaclar azalmır ki, azalmır. Səbəblərdən biri də kreditlə maşın satışının artmasıdır. Əlində 5-10 manatı olan kimi insanlar gedib maşın alırlar. Əvvəl 40 adam bir avtobusda gedirdisə, indi 40 adamın yarısı xüsusi maşınlarla gedib-gəlir. Bu eyni zamanda həm firavanlığın, həm də görməmişliyin nəticəsidir. Konkret bir daha yazıya qayıdım ki, o, problem xarakterli yazıdır. Orada bir idarənin, dövlət məmurunun adı çəkilmir. Sadəcə, problemlər ardıcıllıqla sadalanır, diqqəti həmin problemə yönəldirik ki, bir daha kimlərsə nəsə etsinlər”.

“Biz heç kimi vurmamışıq, mövcud vəziyyətə diqqət çəkmişik” deyən müsahibimiz hətta problemin həlli ilə bağlı öz fikirlərini də açıqladı. Dedi ki, ondan olsa, kreditlə maşın satmağı dayandırardı: “Amma sahibkarın fəaliyyətini məhdudlaşdırmaq olmaz. Bu məqamda jurnalist həmkarlarından da inciyirəm. Çünki bizim araşdırma kimi hazırladığımız məqaləyə siyasi rəng verirlər. Müxalifət mətbuatı bundan nəsə tapır, yazır. Jurnalist vəzifəyə qoyan, vəzifədən çıxaran deyil. Bizdə də elə təcrübə yoxdur. Problem xarakterli yazıdır, jurnalist araşdırmasıdır. Bunu götürüb bu cür hallandıranda bizim yazımızı da təhrif edirlər”.