Xəbər verdiyimiz kimi, II qrup Qarabağ əlili Zaur Həsənov Azərbaycan Həmkarlar İttifaqları Konfederasiyasının qarşısında üstünə benzin tökərək özünü yandırıb. Hazırda xəstəxanada olan Qarabağ qazisinin vəziyyəti ağırdır. O, xəstəxanada “Meydan” TV-yə müsahibə verib.

Əlilin atası Həsən Həsənov isə deyib ki, oğlunun özünü yandırmasına səbəb deputat, Həmkarlar İttifaqları Konfederasiyasının sədri Səttar Mehbalıyevin onun əlindən obyektini almasıdır. O deyib ki, deputat Bibiheybət qəsəbəsində yerləşən bu yerin istirahət mərkəzi üçün söküləcəyini və əvəzində ona yeni obyekt tikiləcəyi vəd edib. Amma obyekt söküləndən sonra orada heç nə tikilməyib, əlil üçün də əlavə obyekt tikilməyib. Bir il davam edən məhkəmə prosesində Zaur Həsənovun iddiaları təmin olunmayıb.

Yada salaq ki, Səttar Mehbalıyev Prezident Administrasiyası ictimai-siyasi şöbəsinin müdiri Əli Həsənovla yaxın qohumdur. Onlar qudadır.

* * * 19:05

“Özləri cəzalandırsınlar, elə etməsinlər ki, biz onun cəzasını verək”

Azad Qarabağ Uğrunda Alyansa (AQUA) daxil olan təşkilatlar bu gün özünü yandıraraq intihara cəhd edən II qrup Qarabağ əlili Zaur Həsənovla bağlı bəyanat yayıb.

AQUA-dan virtualaz.org saytına verilən məlumatda deyilir ki, Zaur Həsənov Respublika Həmkarlar Konfedarasiyasının sədri, deputat Səttar Mehbalıyevin ədalətsiz və qeyri-insani münasibəti nəticəsində intihar edib. Hazırda həkim nəzarətində olan əlilin həyatı üçün təhlükə davam edir.

Bəyanatda deyilir: “Zaur Həsənovun azyaşlı övladları var. Biz ona qarşı haqsızlıq edən məmurları Allah qarşısında lənətləyirik.

Dövlət əlilinə sahib şıxmalı, bu hadisədə günahkar olan məmurlar ciddi şəkildə cəzalandırılmalıdırlar. Elə etməsinlər ki, biz özümüz onların cəzalarını verək”.

Jalə

Virtualaz.org

* * *13:21

Qarabağ əlilləri aksiya keçirəcəklər

Azərbaycan Həmkarlar İttifaqları Konfederasiyası (AHİK) tərəfindən obyekti sökülən II qrup Qarabağ əlili Zaur Həsənov bu gün - dekabrın 25-də səhər saat 11-də Həmkarlar İttifaqının qarşısında özünü yandırıb. Üzərinə benzin tökən əlilin vəziyyəti ağırdır.

Zaur Həsənovun qaynı Rəfael Hüseynov virtualaz.org saytına açıqlamasında dedi ki, təcili yardım tərəfindən 5 saylı klinik xəstəxananın yanıq şöbəsinə aparılan Zaur Həsənovun vəziyyəti orta-ağır qiymətləndirilib: “Zaur 4 uşağını kiçik çayxana işlətməklə dolandırıb. Çayxananın abadlaşdırılması üçün bankdan pul götürülüb. Şıxov çimərliyinin yanında həmkarlar təşkilatına məxsus obyektlər var. Həmin obyektlərdən gələn gəlir bu quruma gedir. Zaur bankın borcunu ödəyə bilmədiyinə görə ailənin son sığınacağı olan evi də əlindən alınır”.

R.Hüseynov onu da dedi ki, hələ mərhum prezident Heydər Əliyevin dövründə və onun tapşırığı ilə Qarabağ əlillərinin yaşayışlarının yaxşılaşdırılması məqsədi ilə dəniz kənarında torpaq sahəsi verilib. Lakin Həmkarlar İttifaqı əlilləri məhkəməyə verərək yerin onlara məxsus olduğunu deyib.

Qeyd edək ki, bu, Zaur Həsənovun intihara ikinci cəhdidir. O, birinci dəfə damarlarını doğrasa da həyatını xilas etmək mümkün olmuşdu.

Xatırladaq ki, virtualaz.org saytı Qarabağ əlilinin problemini işıqlandırarkən AHİK-dən təkzib xarakterli cavab göndərilmişdi. Sayta ünvanlanan məktubda bildirilirdi ki, Qarabağ qazisi Zaur Həsən oğlu Həsənovun iaşə obyekti kimi işlətdiyi torpaq sahəsi Bakı şəhər Xalq Deputatları Sovetinin 22 mart, 1985-ci il tarixli, 1/12 saylı qərarı ilə dənizkənarı sahil zonası yaratmaq üçün Azərbaycan Həmkarlar İttifaqları Konfederasiyasının “Kurort” Səhmdar Cəmiyyətinin tabeçiliyində olan «Şıx» sanatoriyası üçün ayrılıb: “İstifadəmizdə olan torpaq sahəsi hətta inzibati ərazi kimi Bakı Şəhər İcra Hakimiyyəti başçısının 31 avqust, 2000-ci il tarixli, 811 saylı qərarı ilə Bibiheybət bələdiyyəsinə təhvil verilmiş olsa da onun mülkiyyətinə verilməyib və torpaq istifadəçisi dəyişdirilməyib. Bundan başqa, «Azərbaycan Respublikasında Xəzər dənizi sahillərindən istifadənin tənzimlənməsinə dair tədbirlər haqqında» Azərbaycan prezidentinin 13 yanvar, 2003-cü il tarixli sərəncamı ilə Xəzər dənizinin Azərbaycan Respublikasına mənsub olan bölməsinin sahilboyu 80-130 metrlik zolağının altında olan torpaqların dövlətin müstəsna mülkiyyətində olması müəyyənləşdirilib. İcarə müqaviləsi bağlanan zaman mübahisəli torpaq sahəsi dövlətin müstəsna mülkiyyətində olmaqla «Şıx» sanatoriyasının qanuni istifadəsində olub. Bibiheybət bələdiyyəsi tərəfindən “Şıx” sanatoriyasının qanuni və daimi istifadəsində olan 1,67 hektar torpaq sahəsi hüdudlarında torpaq sahəsinin Zaur Həsənova icarəyə verilməsi, həmin ərazidə iki otaqdan ibarət ictimai-iaşə obyektinin tikilməsi, sahil boyunca stol və stulların qoyulması qanunauyğun deyil. Azərbaycan Həmkarlar İttifaqları Konfederasiyasının “Kurort” Səhmdar Cəmiyyətinin tabeçiliyində olan “Şıx” sanatoriyasının qanuni istifadəsində olan torpaq sahəsinin Zaur Həsənov tərəfindən zəbt edilməsi ilə bağlı məsələyə 1 saylı Bakı Yerli İqtisad Məhkəməsində, Bakı Apelyasiya Məhkəməsində, Ali Məhkəmədə baxılıb və Zaur Həsənovun şikayəti əsassız sayılıb”.

Məktubda Z.Həsənovun müxtəlif vaxtlarda yuxarı instansiyalara böhtan dolu, təhqiramiz, şantaj xarakterli məktublar yolladığı iddia olunurdu: “Zaur Həsənov məktublarının birində isə Səttar Mehbalıyevdən dediyi sözlərə görə üzr istəyib”.

Qeyd edək ki, Qarabağ əlili Z.Həsənovun doğulduğu Bibiheybət kəndi ərazisində işlətdiyi çayxana ərazisi AHİK-nin balansında olduğundan onun sökülməsi haqqında qərara etiraz olaraq 14 gün aclıq aksiyası keçirmişdi.

AHİK mətbuat xidmətinin rəhbəri Nazim Ağamalıyev bu gün baş verən intihar olayına isə münasibət bildirməkdən imtina etdi.

Virtualaz.org saytının ona ünvanlanan sualına əsəbiləşən mətbuat rəhbəri intiharla bağlı hüquq-mühafizə orqanlarının araşdırma aparacağını deməklə kifayətləndi.

Z.Həsənovun hüquqlarını müdafiə edən Vətən Müharibəsi Əlilləri İctimai Birliyinin sədri Firidun Məmmədov isə virtualaz.org saytına açıqlamasında dedi ki, Z.Həsənovun başına gətirilənlər Qarabağ əlilləri tərəfindən narazılıqla qarşılanıb. Əlillər məsələni müzakirə edəndən sonra aksiya ilə bağlı qərar verəcəklər.

* * * 12:47

Bakının mərkəzində, Həmkarlar İttifaqının qarşısında dəhşətli intihara cəhd olub.

Virtualaz.org-un məlumatına görə, ikinci qrup əlil, 5 uşaq atası Zaur Həsənov Həmkarlar İttifaqının rəhbəri, millət vəkili Səttar Mehbalıyevin gözü qarşısında üstünə benzin tökərək özünü yandırıb.

Ərazidə olan polis əməkdaşlarının və sakinlərin səyi nəticəsində Z. Həsənovun həyatı xilas edilib. O, əraziyə çağırılan təcilli yardım ilə xəstəxanaya aparılıb.