H3N2 virusu ilə mübarizə üçün antibiotik yetərli deyil
Burun axma, öskürək, qızdırma və baş ağrısı ilə son zamanlar xəstəxanalara müraciət edənlərin sayı ciddi şəkildə artıb. Eyni hal Türkiyədə də özünü göstərir. Mütəxəssislər isə əhaliyə xəbərdarlıq edir: “Bu, hamımızın qorxduğu donuz qripi deyil. Təəssüf ki, hazırda daha ağır olan H3N2 virusu ilə qarşı-qarşıyayıq. Hər xəstə ən azı 1 həftə istirahət etməli, risk qrupuna daxil olanlar isə mütləq həkimə getməlidilər”.

Türkiyəli professor bildirib ki, mövsümlə əlaqədar olaraq hazırda qripdən əziyyət çəkənlərin sayında bir artım var. Mövsümi qrip adlandırdığımız H3N2 virusu və H1N1 virusu ağır epidemiyadır. Ancaq biz əsasən insanlarda H3N2 virusunu görürük. Əslində bir neçə il öncədən adı hallandırılan və donuz qripi adlandırılan H1N1 virusu olsaydı, daha yaxşı idi. Çünki həmin xəstəlik daha sürətlə sağalır, amma H3N2 daha ağır keçir. Hazırda qripə yoluxanların 80 faizində məhz H3N2 virusu özünü göstərir. Təxminən 1 həftə istirahət şərtdir. Təəssüf ki, antibiotiklərin heç bir təsiri yoxdur. Müvafiq dərmanları isə xəstəliyin ortaya çıxmasından etibarən 48 saat ərzində istifadə etmək lazımdır. Gecikəndə heç bir faydası olmur. Peyvənd üçün də çox gec deyil. Fevral ayının axırına qədər peyvənd olunmaq mümkündür”.

Həkim onu da deyib ki, insanlar donuz qripi sözünü eşidəndə çox qorxurlar. Halbuki indi insanlar arasında geniş yayılmış qrip donuz qripindən daha təhlükəlidir. İnsanlar donuz qripini daha yüngül və tez keçirir. Amma H3N2 virusu daha gec keçir və insanın orqanizmini çox yorur. Dekabrın əvvəlindən başlanan xəstəlik hazırda ən yüksək səviyyəyə çatıb. Evdə istirahət etmədən işə, tam sağalmadan məktəbə gedənlərin ucbatından xəstəlik sürətlə yayılır. Xronik ürək xəstələri, xərçəngdən əziyyət çəkənlər, yaşlılar və hamilələr mütləq həkim nəzarətində olmalıdır.

Həkimlər məsləhət görür ki, xəstələr əbəs yerə antibotiklərdən istifadə etməsin. Apteklərə müraciət edib, H3N2 virusuna qarşı xüsusi dərmanlardan almaq xəstəliyə qarşı daha effektiv müalicə sayılır.