“Tağıyev qardaşlarının təkcə Bakıdakı villalarını satmaqla bütün zərərçəkənlərin pulunu qaytarmaq olar”


“Gündəm Xəbər”in elektron ünvanına kollektiv müraciət daxil olub. Adlarının açıqlanmasını istəməyən müraciət müəllifləri özlərini “Birlik” MMC-nin qurbanları hesab edir. Onların iddiasına görə dələduzluq yolu ilə əldə edilmiş əmlak sahiblərinə qaytarıla bilər .Lakin bu qalmaqallı işin ibtidai istintaq və məhkəmə araşdırmasından ciddi narazılıq var. Kifayət qədər maraq doğurduğundan müraciəti qısa ixtisarla təqdim edirik.
Zərərçəkən Şaiq Aqil oğlu Həsənovun 16 dekabr 2013-cü il tarixində mətbuatda dərc olunmuş məktubu bizi də hərəkətə keçməyə məcbur etdi. “Birlik” MMC-nin rəhbəri Tağıyev Elman və onun qardaşları tərəfindən 500 nəfərdən artıq əsil zəhmətkeş insanın min əziyyətlə qazandığı vəsaiti dələduzluq və aldatma yolu ilə mənimsəyən, iki ildən artıq bir vaxtda “güya istintaq gedir” adı altında heç bir iş görməyən hüquq mühafizə orqanları səbir kasamızı tükəndirib.
Tağıyev qardaşları (Məhərrəm, Adil, Rafiq, Aqil və Elman) havadarlarına arxayın olaraq bizim pullarla Bakının mərkəzində - Binəqədi rayonu ərazisində, Nəsimi metro stansiyası ətrafında qanunsuz torpaq zəbt etməklə özləri üçün hər birinin dəyəri bir neçə milyon manatla ölçülən villalar tikdirib, Abşeron kəndlərində bağ evi adı ilə malikanələrə sahib olub, çoxsaylı bahalı maşınlara, beton, örtük plitələr zavodlarına və digər çoxsaylı əmlaka yiyələniblər. İki ildə bunları müsadirə edib bizim halal pullarımızı qaytarmaq əvəzinə, istintaq fəhlə qismində işləyən üç nəfər günahsız adama qarşı həbs qəti imkanı seçib. Əvəzində maddi məsul şəxslər: MMC sahibi olan Elman Tağıyev və baş mühasibi azadlıqda saxlanılıb.
İki il ərzində Elman öz əmlakını başqalarının adına rəsmləşdirərək, özünə cəmi 3,5 mln. manatlıq əmlak saxlamış, iki ildə nə özü, nə də hüquq mühafizə təşkilatları qarşısında öhdəlik götürmüş qardaşları zərərçəkənlərə- bizlərə heç bir ödəniş etməmiş və etmək niyyətləri də yoxdur. Buna baxmayaraq, hakim Novruz Kərimov yenə də məhkəmə prosesini uzadır. Bu qardaşların təkcə Bakıdakı villalarını satmaqla bütün zərərçəkənlərin pulunu qaytarmaq olar. Biz çox xahiş edirik, bizim halal pulumuzun qaytarılmasına tədbir görülsün. Onların tutulması, hansı cəzaya məhkum olması, bizə maraqlı deyil, biz öz halal pulumuzu tələb edirik.

Nadir