"Domodedovo" hava limanında saxlanılan şəxs 1965-ci il təvəllüdlü Yadigarov İlqar Heydər oğludur
Musavat.com BBC-nin Azərbaycan xidmətinə istinadən bildirir ki, Domodedova hava limanında Azərbaycandan olan keçmiş məmur saxlanılıb.
Azərbaycan Müdafiə Nazirliyi Rusiyada həbs olunan keçmiş hərbi qulluqçu barədə açıqlama verib.

Nazirliyin mətbuat xidmətindən APA-ya bildirilib ki, Rusiyada tutulan keçmiş hərbi qulluqçu, Sumqayıt şəhər sakini, 1965-ci il təvəllüdlü Yadigarov İlqar Heydər oğludur.

O, 1986-cı ildə Yaroslav Ali hərbi Maliyyə Məktəbini bitirib. 4 aprel 2011-ci ildə isə xidməti uyğunsuzluğuna görə Silahlı Qüvvələr sıralarından tərxis olunub.

APA-nın əldə etdiyi məlumata görə, İ. Yadiqarov Müdafiə Nazirliyinin əməkdaşı olmayıb, Silahlı Qüvvələrin müxtəlif hərbi hissələrində çalışıb.

Qeyd edək ki, beynəlxalq axtarışda olan Azərbaycan Müdafiə Nazirliyinin sabiq əməkdaşı Rusiya paytaxtının “Domodedovo” hava limanında saxlanılıb. Onun saxlanılması barədə Rusiya Daxili İşlər Nazirliyinin İrkutsk vilayəti üzrə Baş İdarəsi məlumat yayıb.

Adı açıqlanmayan şəxs Azərbaycanın hüquq-mühafizə orqanları tərəfindən dələduzluq ittihamı ilə axtarışa verilib. O, 2010-cu ildə Müdafiə Nazirliyində çalışarkən xidməti vəzifəsindən istifadə edərək saxta mühasibatlıq sənədləri əsasında dövlətə təxminən 125 min dollar miqdarında ziyan vurmaqda ittiham olunur. 2011-ci ildə həmin şəxs saxta sənədlərlə Rusiya sərhədini keçib və İrkutsk vilayətinin Nijneudinsk rayonunun Xudoelansk kəndində fəhlə kimi işə düzəlib. İrkutsk polisi onun şəxsiyyətini müəyyənləşdirdikdən sonra Azərbaycan vətəndaşı gizlənməyə çalışıb və Moskvaya uçaraq oradan Rusiyanı tərk etməyə cəhd göstərib. İrkutsk polisi bu barədə Rusiya DİN-in “Domodedovo” aeroportundakı idarəsinə məlumat verib və azərbaycanlı hava limanında saxlanılıb.

Musavat.com-a bu məsələ ilə bağlı açıqlama verən hərbi ekspert Üzeyir Cəfərov vurğuladı ki, İlqar Yadigarovun həbsinin Azərbaycanın hüquq-mühafizə orqanlarının Rusiyaya təqdim etdiyi sənədlər əsasında reallaşdırıldığı tamamilə inandırıcıdır: "Ancaq onun həbsiylə bağlı olan bütün məqamları yalnız Müdafiə Nazirliyi ictimaiyyətə çatdıra bilər. Çünki məhz Müdafiə Naziri həbs edilən şəxsin dövlətə vurduğu ziyanın həcmini daha dəqiq bilir".

Üzeyir Cəfərov bu həbsin keçmiş müdafiə naziri Səfər Əbiyevlə əlaqədar ola biləcəyinin inandırıcı olmadığını da vurğuladı: "İlqar Yadigarov 2011-ci ildə ordudan tərxis olunub. İndi onun həbsinə səbəb olmuş maliyyə yoxlaması da məhz elə Səfər Əbiyevin müdafiə naziri olduğu dövrdə başladılıb. Ona görə də, bunun S.Əbiyevlə bağlı bir həbs ola biləcəyi qətiyyən inandırıcı deyil".