Milli Məclisin təhlükəsizlik və müdafiə komitəsinin üzvü Zahid Oruc hesab edir ki, Müdafiə Nazirliyinin tabeliyində olan hərbi hissələrə hərbi xidmətə çağırılan gənclərin təkrar müayinədən keçirilməsi ordudakı mənfi halların qarşısını alacaq.
Müdafiə naziri Zakir Həsənovun əmrinə əsasən, hərbi xidmətə çağırılan gənclərin sağlamlıq vəziyyəti Silahlı Qüvvələrin birliklərində, Əlahiddə Ümumqoşun Ordusu və Bakı qarnizonu üzrə toplanış məntəqəsində yaradılmış tibbi komissiyalarda təkrar yoxlanışdan keçiriləcək. Xəstəlik aşkar edilən çağırışçılar geri qaytarılacaq.

“Media forum” saytına danışan Zahid Oruc bildirib ki, müdafiə nazirinin əmrini yüksək qiymətləndir. Onun fikrincə, əsgər intiharlarının, əsgərlər və əsgərlərlə zabitlər arasında münaqişələrin əsas səbəblərindən biri hərbi xidmətə yararlı olmayan gənclərin orduya cəlb olunmasıdır: “Çağırışçının səhhətində problemlər olduğunu bildikləri halda onu orduya aparırlar. Əgər orduya xəstə, problemləri olan şəxslər cəlb edilirsə, bu, ordudakı mənəvi-psixoloji və fiziki şəraitə təsir göstərməklə bərabər ordunun bütövlükdə sağlamlıq durumu haqqında mənfi rəy formalaşdırır, müxtəlif şərhlərə şərait yaradır. Ona görə də ordu sağlam şəxslərin xidmət elədiyi bir məkan olmalıdır. Sağlam ordu dövlətin təhlükəsizliyini və millətin müdafiəsini təmin edir. Ordu sağlam insanlardan təşkil olunmasa, əsgərlər sadəcə öz sağlamlıqları uğrunda çarpışacaq, əsas gücləri də özlərinə gedəcək. Hər kəs bilir ki, əsgər ilk olaraq psixoloji varlıqdır. Fiziki göstəricilər, bilik səviyyəsi, hansısa texnikanı mənimsəməsi, təlimlərə yanaşması və yoldaşları ilə davranışı sonrakı yerdə gəlir”.

Komitə üzvü hesab edir ki, hazırkı şəraitdə əsas məsələ orduda xidmət edən əsgərlərin sayı deyil: “Ordunun gücü onun yüz iyirmi və ya yüz otuz min əsgərdən ibarət olmasında deyil. Əsgərin sayını bu qədər artırmaq da olar, amma orduda müxtəlif xəstəlikləri daşıyan əsgərlər xidmət edirsə, sağlam olan əsgərləri də hansısa səviyyədə yoluxdurursa və yaxud da onların mənəvi aləminə mənfi təsir göstərirsə, bütün əziyyət hədər gedir, görülən tədbirlər nəticəsiz qalır. Ordu say gücü ilə öyünə bilməz. Ən güclü ordu yüksək sağlamlığa və peşəkarlığa, keyfiyyətə malik ordudur”.

Müdafiə nazirinin yeni əmrinin Səfərbərlik və Hərbi Xidmətə Çağırış üzrə Dövlət Xidmətinə etimadsızlıq kimi qiymətləndirilməsinə gəlincə, Zahid Oruc bildirib ki, heç bir etimadsızlıqdan söhbət gedə bilməz: “Hər birimiz etiraf eləyirik ki, müxtəlif şəxslər çağırışa yararlı olmadıqları halda orduya cəlb olunurlar. Baxmayaraq ki, həmin çağırışçılar, valideynləri buna etiraz edirlər. Belə faktların olduğu inkar edilmir. Bəs bunu hansı formada aradan qaldırmaq olar? Öncə, hərbi xidmət və hərbi vəzifə haqqında qanunun tələblərinə görə, şəxslərin hələ orta məktəb illərindən tibbi durumu haqqında informasiya bankı yaradılmalıdır. Əgər həmin insanların məlumat bankında yararsız olmaları haqqında məlumat varsa, bunun əsasında dövlət onların müalicəsinin qayğısına qalmalıdır. Kimsə deyə bilər ki, bu, həddən artıq maliyyə yüklü proqramdır və qanunun müddəası büdcənin daha çox resursunu bu sahəyə yönəltməyə əsas verə bilər. Amma bizim başqa alternativimiz yoxdur. Həmin norma başqa ölkələrdə də var. Biz hərbi həkim komissiyalarından imtina edərək hərbi klinikalar və poliklinikalar yaradaraq hər bir şəxsin xidmətə yararlığını daha yüksək səviyyədə ortaya qoya bilərik. Bunun tabeçilik baxımından hərbi səfərbərlik idarəsinə, yoxsa Müdafiə Nazirliyinə və ya digər quruma aid olmağı çox az önəm daşıyır. Əsas məsələ şəxslərin fiziki durumunu və sağlamlıq şəraitini müəyyənləşdirməkdir”.