Veteranlar Mehriban Əliyevaya müraciət etdilər

Mingəçevirdə yaşayan müharibə veteranları Azərbaycan Respublikasının Birinci vitse-prezidenti Mehriban Əliyevaya müraciət ediblər. Surəti "Azərbaycan Vətən Müharibəsi Veteranları" İctimai Birliyinin sədri Fizuli Rzaquliyevə, Qarabağ Azadlıq Təşkilatının sədri Akif Nağıya, İcbari Tibbi Sığorta Agentliyinin sədrinə göndərilən müraciət redaksiyamıza da daxil olub.

Müraciətdə deyilir: "Hörmətli Mehriban xanım! Yazıb Sizə məlum edirikki, "Azərbaycan Vətən Müharibəsi Veteranları" İctimai Birliyi Vətən müharibəsi zamanı qanlı-qadalı anları yaşamış üzvlərin şərəf -ləyaqətini uca tutmaqla yanaşı, onların hüquq, imtiyazlarını, bir sözlə, veteranların mənafelərini qorumaq, maddi, fiziki, mənəvi təlabatlarının ödənilməsində, döyüş xidmətləri müqabilində layiqli qiymətlərinin verilməsində veteranlara yardımçı olur. İctimai birlik onların öz aralarında ünsiyyət və əlaqələrini möhkəmləndirmək, gənclər və yeniyetmələr arasında milli vətənpərvərlik tərbiyəsini gücləndirmək, müharibə veteranlarının, əlillərinin sosial -iqtisadi vəziyyətlərinin yaxşılaşdırılmasında yaxından iştirak edir, onlara mənəvi dəstək verir.

Bununla belə hazırda fəaliyyət göstərdiyimiz Mingəcevir şəhərində yerləşən cəmiyyətimizin fəaliyyətinə, veteran və əlillərin haqqına girən məmurlar da var ki, onların ucbatından müharibə veteranları təhqir və təhdid olunur".


Şikayətçilər bildirir ki, Mingəçevir şəhər Mərkəzi Xəstəxanasında yenicə fəaliyyətə başlamış İcbari Tibbi Söğortanın direktoru, publik hüquqi şəxs Könül Ələkbərova isə veteranlara, onların hüquq və imtiyazlarına qarşı qayğı və hörmətlə yanaşmır: "Əksnə onun tərəfindən mütəmadi olaraq təhdid və təhqirlərlə rastlaşırıq.Bir sözlə, bu şəxs nə hüquqi şəxs olaraq , nə də vətəndaş olaraq bizi tanımaq istəmir. O, bizi aşağılayır, təhqir etməkdən usanmır. Görəsən, biz döyüşərkən Könül həkim harada olub? Yaşı elə onun da ön cəbhədə erməni elə döyüşdə olduğunu deyir. Görəsən bu, belədirmi? Döyüş zamanını görmüş olsaydı, yəqin ki, bizlərlə belə davranmazdı".

Şikayətçi daha sonra yazır: " Könül Ələkbərova bu günlərdə hətta II qrup Qarabağ əlili Teymur Sadə oğlu Qədirova qarşı vəzifə səlahiyyətlərini aşaraq kobudluq göstərib. Belə ki, o, Mingəçevir Mərkəzi Xəstəxanasında müharibə əlilinin müayinə-diaqnoz kağızını və reseptini gözünün qarşısındaca cıraraq, onu xəstəxanadan qovub. Əlilin dərman preparatları ilə təmin olunması ilə bağlı xahişini isə "mənim sənə veriləsi dərmanım yoxdu "deyərək rədd etmişdi. Biz Qarabağ veteranları və əlilləri dərman preparatlarını və ümumiyyətlə, özümüzə qarşı diqqət və qayğını onun timsalında olan məmurlardan deyil, dövlətdən görürük. Könül həkim hələ də başadüşmür ki, əlili dərmanla o deyil, dövlət təmin edir".

Daha sonra müraciətdə bu sətirlər yer alıb: "Hörmətli Mehriban xanım! Xahiş edirik, Qarabağ müharibəsi veteran və əlillərinin vətən uğrunda, vahid Azərbaycan uğrunda tökülən qanının Könül Ələkbərov kimi məmurların ayaqları altında tapdamasına yol verməyəsiniz.

Öncədən Sizlərə "Azərbaycan Vətən Müharibəsi Veteranları "İctimai Birliyinin Mingəçevir şəhər təşkilatı adından təşəkkürümüzü bildiririk və inanırıq ki, haqq səsimizi eşidərək bizi dəstəkləyəcəksiniz".

P.S. Müraciət çapa hazırlanan günü Mingəçevir şəhərindən daha bir ilginc xəbər aldıq. Mingəçevir Mərkəzi Xəstəxanasında müalicə alan "Qarabağ Vətən Müharibəsi Veteranları" İctimai Birliyinin Ərazi üzrə səlahiyyətli nümayəndəsi, Mingəçevir şəhər şöbəsinin sədri Natiq Nəriman oğlu Həsənov redaksiyamıza belə bir məlumat verdi ki, o, müharibə zamanı kəllə-beyin nahiyəsindən xəsarət ciddi aldığı üçün mütamadi olaraq Mingəçevir Mərkəzi xəstəxanasında müalicə alırmış. Hazırda onun müalicə alması yarımşıq dayandırılıb. Buna səbəb isə Mingəçevir şəhərində fəaliyyət göstərən Məcburi Tibbi Sığortanın direktoru Könül Ələkbərovanın Natiq Həsənovun ondan Mehriban xanıma şikayət edəcəyini öyrənməsidir. Bu müraciətə görə Könül Ələkbərova Natiq Həsənovu xəstəxanadan çıxarıb.