83 yaşlı Leyla ana: “3 oğlumu vətənin müdafiəsinə göndərdim, əgər Cavidə bir şey olsa, 3 gündən artıq yaşamaram”


İmişli rayonunda yaşayan Qarabağ qaziləri Ali Baş Komandan İlham Əliyev və birinci xanım Mehriban Əliyevaya müraciət ediblər. Müraciətin surəti redaksiyamıza ünvanlanıb. Onlar dövlət başçısı və birinci xanımdan onkoloji xəstəlikdən əziyyət çəkən qazi, I qrup əlil Cavid Nəriman oğlu Şahbazovun müalicəsinin nəzarətə götürülməsini xahiş edirlər.
Azərbaycan Vətən Müharibəsi Veteranları İctimai Birliyinin İmişli rayon şöbəsinin sədri Taleh Evaz oğlu Tapdıqov deyir ki, təəssüf ki, Ronaldinyonun Bakıya gəlişinə 2 miliyon dollar xərc çəkənlər I qrup Qarabağ qazisi, onkoloji xəstə Cavid Nəriman oğlu Şahbazovun İsraildə müalicəsi üçün 50 min dollardan keçmək istəmirlər: “Vətənin müdafiəsində yaralanan, sağlamlığını vətənə olan sevgisinə qurban verən, Qarabağ uğrunda döyüşən Cavid bəyin 2 azyaşlı oğlu və 2 məktəbli qızı var. Ali Baş Komandanımızın bir çağırışında Vətənin müdafiəsinə qalxmağa daim hazırıq. Prezidentimizdən umacağımız isə Cavid bəyin müalicəsinə dəstək verməsidir. Onun 4 övladını, anası 83 yaşlı Leyla ananı gözüyaşlı qoymamağı acizanə sürətdə xahiş edirik”.

83 yaşlı Leyla ana deyir ki, iyulda (2016-cı il) I qrup qazi oğlu Elman dünyasını dəyişib, belim bükülüb, 3 oğlumu vətənin müdafiəsinə göndərdim, əgər Cavidə bir şey olarsa 3 gündən artıq yaşamaram: “Deputat Hadi Rəcəbli mənim göz yaşlarımdan, Cavidin 4 övladının nisgillə yaşamağından utansın. Ayıb olsun ona, mandat ona haramdır.O mənim kimi anaları dövlətə, prezidentə qarşı aqressiv etməyindən utanmalıdır, etdiyi ciddi səhvə görə üzr istəyib , mandatı təhvil verməlidir. Mənim qazi olmuş 3 igid oğlanlarım, onun yaxınları kimi yağ-bal içində yaşamayıb, hətta ölümlə vuruşduğu anlarında da Cavid şikayət etməyi ummur. “Mənim qızım artıq məktəbi qurtarır, qız atası kimi ummaq, şikayət etmək, qaziyə yaraşmır”- deyir. Prezidentdən, Birinci xanımdan, Səhiyyə nazirindən oğlumun müalicəsinə kömək etmələrini 3 qazi oğlu, 83 yaşlı ana kimi rica edirəm, onları bağrıma basıram”.

Taleh Tapdıqov da möhtərəm prezidentimizdən qazilərin rəhbəri kimi, ziyalı qazi kimi Cavid Nəriman oğlu Şahbazovun müalicəsinə nəzarətə götürməyi xahiş edir.

Erməni tankını vurduğuna görə Umummilli Lider Heydər Əliyev tərəfindən Azərbaycan Bayrağı ordeni ilə təltif edilən Cəbrayilov Şamil Əhliman oğlu isə deyir ki, biz qazilər Prezidentimizdən, eləcə də rayonun icra başçısı V.Hacıyevdən razıyıq: “Başçı öz prezidentinə, xalqına sadiq birdir, sözsüz ki, məsum deyil, Yalnız sonuncu peyğəmbərimiz Məhəmməd(s.ə.s)-ə məsumluq məxsusdur.Cavidin müalicəsi, nə başçı V.Hacıyev, nə də baş həkim Cəsur Paşayev səviyyəsində deyil.Cəsur Paşayev özü də müharibə qazilərindən biridir.O, İmişli təcili yardım həkimlərinə tapşırıb ki, Cavidə əlinizdən nə gəlirsə köməyinizi əsirgəməyin.Sağ olsun təcilin yardımın şöbə rəisi Elnur həkimə Cavid bəyiN müalicəsini təşkil etiyinə görə təşəkkür edirik.Ancaq yalnız Ali Baş Komandanımız möhtərəm İ.Əliyev və Birinci xanım M.Əliyevanın göstərişi sayəsində Cavid İsraildə sağala bilər ki, xahişimizİ mətbuat vasitəsi ilə dövlət başçısımıza çatdırırıq. Qeyd edim ki, Cavid bəy qururlu kişidir, bizim hamımızın bir arzusu var ki, Cavidi dövlətimiz himyayə götürsün. Cavid kimi kişilərin haqqı var ki, heç vaxt kimdənsə sağaldılmasını istəməsin və istəmir də. Oonun əvəzinə biz istəyirik, Cavidə olan isti münasibət bu xalqın qəhrəmanlarına olan münasibətdir”

Qeyd edək ki, Azərbaycan prezidenti İlham Əliyevə və birinci xanım Mehriban Əliyevaya ünvanlanan müraciəti Azərbaycan Vətən Müharibəsi Veteranları İctimai Birliyinin İmişli rayon şöbəsinin sədri Taleh Evaz oğlu Tapdıqov, müavini Babaşov Valeh Nurəddin oğlu, “Azərbaycan Bayrağı” ordenli Cəbrayilov Şamil Əhliman oğlu, Sultanov Atif Sultan oğlu( Abbasqulu Şadliniskinin nəvəsi), Soltanov Faiq Zahid oğlu, Əliyev Cavid Nərbala oğlu imzalayıblar.

Məhbub Zülfüqarlı