Bununla bağlı bildiririk ki, Xırdalan şəhərinin su-kanalizasiya xətlərinin böyük əksəriyyəti 1970-ci illərdə çəkilmiş və bu xətlər 20-25 min nəfər əhali üçün nəzərdə tutulmuşdur. Ötən dövr ərzində xətlərin əksər hissəsi istismar müddətini başa vurduğu üçün yararsız hala düşmüşdür. Hazırda əhalisi dəfələrlə artaraq, 200 min nəfərə çatan Xırdalan şəhərində içməli su və kanalizasiya xətləri əhalinin mövcud tələbatını ödəmir.

Yay dövründə susuzluqdan, payız-qış mövsümündə yağışlı havalarda subasmadan, kanalizasiya sularının evlərə dolmasından əziyyət çəkən Xırdalan sakinlərinin bu sahədə olan ciddi problemləri nəzərə alınaraq, Xırdalan şəhərinin su-kanalizasiya şəbəkəsinin yenidən qurulması qərara alınmışdır.
Azərbaycan Respublikasının Prezidenti cənab İlham Əliyev tərəfindən təsdiq olunmuş "Azərbaycan Respublikası və Səudiyyə İnkişaf Fondu arasında Xırdalan şəhərinin su təchizatı və kanalizasiya sisteminin genişləndirilməsi və yenidən qurulması layihəsi üzrə” Kredit Sazişinin təsdiq edilməsi haqqında Azərbaycan Respublikasının Qanununa uyğun olaraq, "Azərsu” Açıq Səhmdar Cəmiyyətinin keçirdiyi tenderin qalibi olmuş podratçı təşkilatlar tərəfindən 2017-ci ilin iyul ayında Xırdalan şəhərinin su-kanalizasiya şəbəkəsinin yenilənməsi işlərinə başlanılmışdır. Layihə çərçivəsində iki il ərzində 168 km uzunluğunda içməli su, 110 km uzunluğunda kanalizasiya xətlərinin çəkilməsi və ev birləşməsinin verilməsi nəzərdə tutulur.
Əsasən 3-4 metr dərinlikdən keçən və diametri 600, 800, 1000 mm olan magistral xətlərin çəkilməsi üçün bütöv yolun qazılması qaçılmazdır. Bu da sakinlər arasında müəyyən narazılıqlara səbəb olur. 3-4 metr dərinlikdə və 4-5 metr enində qazılaraq bu xətlərin çəkilib, üstü örtüldükdən sonra gələcək fəsadların olmaması üçün xətlərin test edilməsi və ev birləşmələrinin verilməsi müəyyən zaman tələb edir.
Küçə və yolların qazılmasından əziyyət çəkən sakinlərimizin vəziyyəti nəzərə alınaraq, su-kanalizasiya işinə rəhbərlik edən "Azərsu” ASC-nin aidiyyəti vəzifəli şəxsləri Rayon İcra Hakimiyyətinə dəvət olunaraq, podratçı təşkilatların, Xırdalan şəhər inzibati ərazi dairəsinin nümayəndəliyin, rayon sukanal idarəsinin işçilərinin iştirakı ilə dəfələrlə müşavirələr keçirilmiş, qazılmış yerlərin ev birləşmələrinin verilərək bərpa edilməsinin sürətləndirilməsi barədə podratçı təşkilatlara ciddi xəbərdarlıqlar olunmuşdur. Bərpa işləri ilə bağlı rayon İcra Hakimiyyəti lazım olan öz köməkliyini göstərməkdədir.
Kanalizasiya və su xətlərinin çəkilməsi qazıntı işi aparılmaqla həyata keçirilir və bu zaman küçə və yollarda əhalinin, nəqliyyat vasitələrinin hərəkətində çətinliklərin yaranması başa düşülən olmalıdır.
Su-kanalizasiya ilə bağlı uzun müddətdir problemlər yaşayan Xırdalanımızın gələcək inkişafına, əziyyət çəkən sakinlərimizin problemlərinin həllinə xidmət edəcək bu böyük layihənin növbəti il ərzində başa çatdırılması üçün Abşeron rayon İcra Hakimiyyəti "Azərsu” ASC ilə birlikdə mümkün olan bütün tədbirlər görür və bu iş rayon İcra Hakimiyyətinin ciddi nəzarətində saxlanılır.
Yaranmış narahatlıqla bağlı Xırdalan sakinlərimizdən üzr istəyir və onları təmkinli olmağa çağırırıq.

Abşeron rayon İcra Hakimiyyəti