Gələcəyin əsgərini, həkimini, müəllimini və polisin  qorumaq şərəf borcudur

Səbail Rayon Polis İdarəsinin təşkilatçılığı ilə Landau məktəbində “Narkotik əsrin bəlasıdır, zərərli vərdişlərə yox deyək!” mövzusunda maarifləndirici görüş keçirilib. Tədbirdə RPİ-nin rəisi, polis polkovniki Hikmət Qasımov, rayon İcra Hakimiyyəti başçısının müavini Eldar Ağayev, DİN Mətbuat Xidmətinin rəis müavini, polis polkovnik-leytenantı Hafiz Təmirov, məktəbin icraçı direktoru  Timur Leznik, eləcə də rayonun aidiyyəti dövlət qurumlarının nümayəndələri, məktəbin pedaqoji heyəti və yuxarı sinif şagirdləri iştirak ediblər.

Əvvəlcə torpaqlarımızın azadlığı uğrunda canlarından keçən şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib.Tədbiri giriş sözü ilə açan məktəbin icraçı direktoru T.Leznik polisin narkomaniyaya qarşı mübarizədə təbliğat işinə böyük önəm verdiyinə diqqət çəkərək görülən işlərdə vətəndaşların da asayiş keşikçilərinə dəstək olmalarının, həmrəylik nümayiş etdirmələrinin vacibliyini vurğulayıb.  Görüşdə çıxış edən RPİ-nin rəisi, polis polkovniki H.Qasımov narkomaniyanın törətdiyi fəsadlardan danışaraq bildirib ki, narkomaniya da narkotiklərin qanunsuz dövriyyəsinin coğrafiyası kimi sərhəd tanımır. Bu dəhşətli xəstəlik hamı üçün eyni dərəcədə təhlükəlidir; o cinayətkarlığı, zorakılığı və korrupsiyanı yaradır, sosial-iqtisadi inkişafı səngidir, ailə və icmaları dağıdır. Ölkəmizdə narkotiklərin qanunsuz dövriyyəsi ilə məşğul olan şəxslərin aşkar edilməsi istiqamətində aparılan qətiyyətli mübarizə tədbirlərinin nəticələri barədə məlumat verən İdarə rəisi narkotacirlərə və narkotik istifadəçilərinə qarşı hüquq mühafizə orqanlarının barışmaz mövqe sərgilədiyini də dinləyicilərin nəzərinə çatdırılıb. Müasir dövrdə bütövlükdə bəşəriyyət üçün böyük bəlaya çevrilən narkomaniya ilə mübarizənin vacibliyindən, sağlam gəncliyin və etibarlı gələcəyin qurulması baxımından belə maarifləndirici görüşlərin davamlı təşkilinin zəruriliyindən danışan RİH başçısının müavini E.Ağayev “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair Dövlət Proqramı”nın uğurla icra olunduğunu bildirib.

Tədbirdə çıxış edən polis polkovnik-leytenantı H.Təmirov qeyd edib ki, narkomaniya cəmiyyətin ciddi bəlasına çevrilən, mənəvi və əxlaqi dəyərlərə böyük zərbə vuran ən ağrılı problemlərdəndir. O, zərəli vərdişlərdən uzaq olmaq, gələcək karyeralarında uğur qazanmaq üçün şagirdlərin diqqətlərini elmə, təhsilə, idmana, bir sözlə, cəmiyyətə faydalı olacaq işlərə yönəltməklərinin əhəmiyyətindən danışıb, tövsiyələrini çatdırıb.Sonra çıxış edənlər son illər respublikamızda narkotik vasitələr və onların prekursorlarına qarşı mübarizə tədbirlərinin gücləndiyini, bu sahəyə cavabdeh olan dövlət orqanları ilə yanaşı ictimai təşkilatların da fəallığının artdığını, gənclərin maarifləndirilməsi məqsədilə müxtəlif tədbirlərin, o cümlədən “dəyirmi masa”lar, diskussiyalar, inşa yazı və rəsm müsabiqələrinin təşkil edildiyini, gənclərin asudə vaxtlarının düzgün və səmərəli keçirilməsinə ciddi diqqət yetirildiyini bildiriblər.Sonda narkomaniyanın fəsadlarından, bu bəlaya düçar olan şəxslərin acınacaqlı həyatından bəhs edən videoçarx nümayiş olunub.

Gundemxeber.az