Avqustun 3-də, gecə saatlarında Bakının ən gözəl prospektlərindən birində ağır yol hadisəsi baş verdi. Səhəri gün bu xəbər ildırım sürəti ilə ölkədə yayıldı.
Məlum oldu ki, “Mercedes Gelandewagen” markalı avtomobillə “Mazda” markalı avtomobil yarışdığı zaman qəza baş verib. Qəza nəticəsində “Mercedes Gelandewagen” olan Mehdi Əliyev adlı şəxs həlak olub. Eləcədə hadisə zamanı yolu keçən piyada Vaqif Əsədov ölüb. Daha iki piyada, Türkiyə vətəndaşları - Mutallib Tekiş və Songül Tekiş xəsarət alıb.
Normalda ölkədə hər gün onlarla qəza olur, bunun nəticəsində bir çox vətəndaşımız həlak olur və ya xəsarət alır.
Ancaq iş ondadır ki, “Mercedes Gelandewagen” markalı avtomobilin sahibinin baş nazirin müavini, Qaçqın və Məcburi Köçkünlərin İşləri üzrə Dövlət Komitəsinin sədri Əli Həsənovun nəvəsi Nail Allahverdiyevə məxsus olub. Üstəlik hadisəyə səbəb ehtiyatsızlıq deyil, qudurğanlıq olub. Azərbaycanda məmur övladlarının bahalı avtomobillərinin olması, bəzilərinin hətta avtomobil kolleksiyasına sahibliyi artıq sirr deyil. Məsələ ondadır ki, son illər məmur övladlarının sadə insanları saymaması, şəhərdə istədiklərini etməsi sanki adi hal alıb. Hətta bu cür hərəkətə görə, bu yaxınlarda general Novruzəli Orucov işdən azad edilib. Onun oğlu da avtobus sürücüsünü “əzişdirmişdi”. Ancaq nədənsə bu kimi hallar davam edir.



Nail Allahverdiyevin babası 3-4 sanballı vəzifə tutur. Uzun illərdir ki, Qaçqın və Məcburi Köçkünlərin İşləri üzrə Dövlət Komitəsinin sədridir. Bu sahəyə indiyə qədər milyardlarla vəsait ayrılıb. Hətta bir zamanlar Əli Həsənov məcburi köçkünlərə məsləhət görürdü ki, dövlətin onlara verdiyi 36 manat elektrik və mavi yanacaqla bağlı kompensasiyanı bazara aparıb ərzaq almasınlar, dərhal sosial ödənişləri yönəltsinlər. 36 manata böyük məbləğ deyən qaçqınkom sədri nəvəsi Nail Allahverdiyevin 150-200 min manatlıq avtomobilə sahib olması, “avtoşluq” etməsi, habelə “Soho Lounge Bar”-ın sahibi olmasına necə haqq qazandıra bilər?
Bəzən haram pullar ailələrə vaciə yaşadır. Odur ki, vəzifədə olub-olmamaqdan asılı olmayaraq insan gözü tox olmalı, dövlətin imkanlarından bəhrələnərək yaxın ətrafına şərait yaratmamalı, mümkün qədər sadə həyat tərzi sürməlidir. Nə yazıq ki, bizim məmləkətimizdə məmurların bu cür olması gözlənilən, ağlabatan deyil.
Şəxsən məni ilgiləndirən odur ki, Əli Həsənov qaçqınkomun sədri kimi dövlət adına mənə də hansısa formada dəstək olmalıdır. Çünki mən 9 yaşımda Ermənistandan qaçqın düşmüşəm, dədə-baba torpağımdan qovulmuşam. Ancaq bu günə qədər “qaçqınkomun” mənim kimi minlərlə qaçqının problemini dinləməsini görməmişəm. Ancaq hansısa reket jurnalistə köçkünlər üçün tikilən binada ev verildiyi bəlli olmuşdu. Üstəlik onun nəvəsinin dəyəri 100 minlərlə ölçülən avtomobilləri var. Məsələn, cavan bir uşağın təxminən avtomobil kolleksiyasının ümumi dəyəri 3 milyon dollar olduğu haqda xəbərlər yayılıb.
Əli Həsənov təkcə baş nazirin müavini, qaçqınkomun sədri deyil. O, eyni zamanda Beynəlxalq Humanitar Yardım üzrə Respublika Komissiyasının, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının sədridir.
Mən doğulanda və özümü anlayanda bildim ki, babam müharibədə həlak olub. Mülk kəndində kolxoz sədri olsa da, özü könüllü müharibəyə getmək qərarını vermişdi..

Nemət Orucov
Redaktor